കാട്ടിലെ രാജാവെന്നാണ് സിംഹം അറിയപ്പെടുന്നത്. സിംഹത്തിന്റെ നിരവധി വിഡിയോകള്‍ സോഷ്യല്‍ മീഡിയയില്‍ വൈറലാകാറുണ്ട്. എന്നാലിപ്പോള്‍ കുവൈത്തിലെ നിരത്തിലൂടെ കുതറിയോടാന്‍ ശ്രമിക്കുന്ന സിംഹത്തെ കൈയ്യിലെടുത്ത് നീങ്ങുന്ന ഒരു യുവതിയുടെ ദൃശ്യമാണ് സൈബര്‍ ഇടങ്ങളില്‍ നിറയുന്നത്.

കൂട്ടിനുള്ളില്‍ നിന്ന് ചാടിയ വളര്‍ത്തു സിംഹമാണ് ആളുകളുടെയിടയില്‍ പരിഭ്രാന്തി പരത്തിയത്. സബാഹിയ പ്രദേശത്തായിരുന്നു സംഭവം. സിംഹത്തിന്റെ ഉടമയായ സ്ത്രീ തന്നെയാണ് പൊലീസ് ഉദ്യോഗസ്ഥരുടെ സഹായത്തോടെ ജനവാസ കേന്ദ്രത്തില്‍ നിന്നും സിംഹത്തെ പിടികൂടിയത്.

യുവതിയുടെ കൈയ്യില്‍ നിന്ന് സിംഹം കുതറിയോടുന്നത് ദൃശ്യങ്ങളില്‍ വ്യക്തമാണ്. യുവതിയുടെയും പിതാവിന്റെയും ഉടമസ്ഥതിയിലുള്ളതാണ് സിംഹമെന്ന് പൊലീസ് പറഞ്ഞു. വന്യമൃഗങ്ങളെ വളര്‍ത്തുന്നത് കുവൈറ്റില്‍ കുറ്റകരമാണ്.


എന്നാലും അനധികൃതമായി സിംഹം, കടുവ, ചീറ്റ എന്നിവയെ വളര്‍ത്തുന്നവരും ഏറെയാണ്. 2018 ലും ഇതിന് സമാനമായ സംഭവം നടന്നിരുന്നു. അന്ന് നിരത്തിലിറങ്ങിയ സിംഹത്തെ മയക്കുവെടിവച്ച് പിടിച്ച് മൃഗശാല അധികൃതര്‍ക്ക് നല്‍കുകയായിരുന്നു. നാല് ലക്ഷത്തിലധികം ആളുകളാണ് ഇതിനോടകം ദൃശ്യങ്ങള്‍ കണ്ടത്.



നിരവധി അറബികള്‍ വീടുകളില്‍ വന്യജീവികളെ വളര്‍ത്താറുണ്ട്. അടുത്തിടെ വീട്ടില്‍ ഓമനിച്ചു വളര്‍ത്തിയ സിംഹത്തിന്റെ കടിയേറ്റ് ഉടമ മരിച്ച സംഭവം സൗദിയില്‍ നിന്ന് റിപ്പോര്‍ട്ട് ചെയ്തിരുന്നു.


കൂട്ടില്‍ നിന്ന് അബദ്ധത്തില്‍ പുറത്തിറങ്ങിയ സിംഹം ഗൃഹനാഥനെ ആക്രമിക്കുകയായിരുന്നു. പൊതുജനങ്ങളുടെ സുരക്ഷ ഉറപ്പുവരുത്തുന്നതിനായി വന്യമൃഗങ്ങളെയോ വംശനാശഭീഷണി നേരിടുന്ന മൃഗങ്ങളെയോ കൈവശം വയ്ക്കുന്നത് യുഎഇ നിയമം തടയുന്നുണ്ട്.

ഇത്തരത്തില്‍ നിയമലംഘനം നടത്തുന്നുണ്ടോയെന്നറിയാന്‍ ദുബായ് മുനിസിപ്പാലിറ്റിയുമായി ചേര്‍ന്ന് പോലീസ് സ്ഥിരമായി പരിശോധനകള്‍ നടത്തുകയും നിയമലംഘകര്‍ക്കെതിരെ കര്‍ശന നടപടി സ്വീകരിക്കുകയും ചെയ്യുന്നുണ്ട്.