ഊട്ടിയിൽ കൊടും തണുപ്പ്. പതിനഞ്ച് വർഷത്തിനിടെ ആദ്യമായി താപനില പൂജ്യം ഡിഗ്രി സെൽഷ്യസായി താഴ്ന്നു. നീലഗിരി ജില്ലയിലെ സാൻഡിനല്ല ഗ്രാമത്തിലാണ് ഏറ്റവും കുറഞ്ഞ താപനില രേഖപ്പെടുത്തിയത്. പതിനഞ്ച് വർഷം മുൻപാണ് ഇതിന് മുൻപ് താപനില ഇത്രയും താഴ്ന്നത്. ഇതോടെ പ്രദേശത്ത് ജനജീവിതം ദുഷ്‌കരമായിരിക്കുകയാണ്. കഴിഞ്ഞ ഏതാനും ദിവസങ്ങളായി കടുത്ത മഞ്ഞാണ് പ്രദേശത്ത് അനുഭവപ്പെടുന്നത്.

മഞ്ഞുമൂടി കിടക്കുന്നതിനാല്‍ ആളുകൾക്ക് പുറത്തേക്കിറങ്ങാൻ കഴിയാതെ വീട്ടിൽ തന്നെ കഴിച്ചു കൂട്ടേണ്ട അവസ്ഥയാണ്. സാൻഡിനല്ലയുടെ അടുത്ത പ്രദേശമായ കണ്ടലാണ് തൊട്ടരികിൽ. ഇവിടെ രണ്ടു ഡിഗ്രി സെൽഷ്യസാണ് രേഖപ്പെടുത്തിയത്. ഊട്ടിയിൽ ഏഴു ഡിഗ്രി സെൽഷ്യസാണ് താപനില. കഴിഞ്ഞ 20 മുതലാണ് നീലഗിരിയിൽ‍ തണുപ്പ് തുടങ്ങിയത്. രാത്രിയും അതിരാവിലെയും കടുത്ത തണുപ്പും മഞ്ഞുമാണ്. പ്രത്യേകിച്ച് ഊട്ടി ബൊട്ടാണിക്കൽ ഗാർഡൻ, എച്ച്.എ.ടി.പി. കളിസ്ഥലം, കുതിരപ്പന്തയ മൈതാനം, കന്തൽ കളിസ്ഥലം, താഴെയുള്ള പുൽമേടുകൾ എന്നിവിടങ്ങളിൽ മൂടൽമഞ്ഞ് രൂക്ഷമാണ്.