അയോധ്യയില്‍ രാമക്ഷേത്രം നിര്‍മിക്കാനുള്ള പ്രവര്‍ത്തനങ്ങള്‍ക്ക് ആക്കം കൂട്ടി വിശ്വഹിന്ദു പരിഷത്. രാമക്ഷേത്രം നിര്‍മിക്കുന്നതിന് രാജ്യത്തിന്റെ വിവിധ ഭാഗങ്ങളില്‍ നിന്നു ശേഖരിക്കുന്ന ശിലകളുടെ ഒരു ഭാഗം കൂടി അയോധ്യയിലെത്തിച്ചു. രാംസേവക് പുരത്ത് ശിലകള്‍ സൂക്ഷിച്ചിട്ടുണ്ടെന്നും രാം ജന്മഭൂമി പ്രസ്ഥാനത്തിന്റെ അധ്യക്ഷന്‍ സ്വാമി നൃത്യഗോപാല്‍ ദാസിന്റെ നേതൃത്വത്തില്‍ പൂജ നടത്തിയതായും വിഎച്ച്പി വക്താവ് ശരത് ശര്‍മ പറഞ്ഞു.
അയോധ്യയില്‍ രാമക്ഷേത്രം നിര്‍മിക്കാനുള്ള സമയമായി. ക്ഷേത്രനിര്‍മാണത്തിനാവശ്യമായ കല്ലുകള്‍ എത്തിയിട്ടുണ്ട്. ഇനിയും കല്ലുകള്‍ വരുന്നത് തുടരും. മോഡി സര്‍ക്കാരില്‍ നിന്നും ക്ഷേത്രനിര്‍മാണം തുടങ്ങാനുള്ള അടയാളം ലഭിച്ചതായും രാം ജന്മഭൂമി പ്രസ്ഥാനത്തിന്റെ അധ്യക്ഷന്‍ സ്വാമി നൃത്യഗോപാല്‍ ദാസ് വ്യക്തമാക്കി.
അതേസമയം, ശിലകളെത്തിയതിനു ശേഷമുള്ള സ്ഥിതിഗതികള്‍ വിലയിരുത്തി വരികയാണെന്ന് ഫൈസാബാദ് എസ്പി മോഹിത് ഗുപ്ത പറഞ്ഞു. ശിലകള്‍ എത്തിയതിന്റെ പശ്ചാത്തലത്തില്‍ വര്‍ഗീയ സംഘര്‍ഷം ഉണ്ടായാല്‍ കര്‍ശന നടപടി സ്വീകരിക്കുമെന്നും അദ്ദേഹം അറിയിച്ചു.
രാജ്യവ്യാപകമായി ശിലാശേഖരണത്തിന് ആറു മാസം മുമ്പാണ് വിശ്വഹിന്ദു പരിഷത്ത് ആഹ്വാനം നല്‍കിയത്. മൊത്തം 2.25 ലക്ഷം ചതുരശ്ര അടി ശിലകളാണ് ക്ഷേത്ര നിര്‍മാണത്തിന് വേണ്ടത്. വിഎച്ച്പി ആസ്ഥാനത്ത് 1.25 ലക്ഷം ചതുരശ്ര അടി ശിലകള്‍ ശേഖരിച്ചു കഴിഞ്ഞതായി വക്താവ് അവകാശപ്പെട്ടു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha