ഭക്ഷ്യവിഷബാധയേറ്റ് ഒരു കുടുംബത്തിലെ നാലുപേര്‍ക്ക് ദാരുണാന്ത്യം. അബ്ദുള്ള ദൊക്കാഡിയ (40), ഭാര്യ നസ്രിന്‍ ദൊക്കാഡിയ (35), മക്കളായ ആയിഷ (16), സൈനബ് (13) എന്നിവരാണ് മരിച്ചത്. മുംബയ്‌യിലെ പൈധുനിയിലാണ് സംഭവം. ഇക്കഴിഞ്ഞ ശനിയാഴ്ച രാത്രി 10:30ഓടെ ബന്ധുക്കളോടൊപ്പം ബിരിയാണി കഴിച്ച കുടുംബം, പിന്നീട് പുലര്‍ച്ചെ ഒരു മണിയോടെ തണ്ണിമത്തന്‍ കഴിച്ചതായും പറയപ്പെടുന്നു. ഇതേതുടര്‍ന്ന് അടുത്ത ദിവസം പുലര്‍ച്ചെ 5:30ഓടെ നാലുപേര്‍ക്കും കടുത്ത ഛര്‍ദ്ദിയും വയറിളക്കവും അനുഭവപ്പെടുകയായിരുന്നു.

ആദ്യം കുടുംബ ഡോക്ടറെ കാണിച്ചെങ്കിലും സ്ഥിതി ഗുരുതരമായതിനെത്തുടര്‍ന്ന് നാലുപേരെയും ആശുപത്രിയിലേക്ക് മാറ്റി. ചികിത്സയിലിരിക്കെ ഇന്നലെ രാവിലെ പത്തുമണിയോടെ ഇളയ മകള്‍ സൈനബ് ആണ് ആദ്യം മരണത്തിന് കീഴടങ്ങിയത്. ഞായറാഴ്ച രാത്രിയോടെ അബ്ദുള്ളയും മരിച്ചു. പിന്നാലെ നസ്രിനും മൂത്തമകള്‍ ആയിഷയും മരണപ്പെട്ടു. പോസ്റ്റ്‌മോര്‍ട്ടം നടപടികള്‍ പൂര്‍ത്തിയായെങ്കിലും ആന്തരികാവയവങ്ങളുടെ പരിശോധനാ ഫലം വന്നതിന് ശേഷം മാത്രമേ മരണകാരണം സ്ഥിരീകരിക്കാന്‍ കഴിയൂ എന്ന് പൊലീസ് അറിയിച്ചു. അസ്വാഭാവിക മരണത്തിന് കേസെടുത്ത് പൊലീസ് അന്വേഷണം ആരംഭിച്ചിട്ടുണ്ട്.