കേന്ദ്ര ധനമന്ത്രി അരുണ്‍ ജെയ്റ്റ്‌ലി പ്രസിഡന്റായിരിക്കെ ഡല്‍ഹി ക്രിക്കറ്റ് അസോസിയേഷനില്‍ നടന്ന അഴിമതികളെക്കുറിച്ച് ഡല്‍ഹി സര്‍ക്കാര്‍ അന്വേഷണത്തിന് ഉത്തരവിട്ടു. ബിജെപി എംപിയും മുന്‍ ഇന്ത്യന്‍ ക്രിക്കറ്റ് താരവുമായ കീര്‍ത്തി ആസാദ് ഞായറാഴ്ച വാര്‍ത്താസമ്മേളനം വിളിച്ച് അഴിമതി ആരോപണങ്ങള്‍ ഉന്നയിച്ചതിനു പിന്നാലെയാണിത്. ഡല്‍ഹി ക്രിക്കറ്റ് അസോസിയേഷനിലെ കോടികളുടെ ക്രമക്കേടുകളെക്കുറിച്ച് എന്‍ഫോഴ്‌സ്‌മെന്റ് ഡയറക്ടറേറ്റും ഡയറക്ടറേറ്റ് ഓഫ് റവന്യൂ ഇന്റലിജന്‍സും അന്വേഷിക്കണമെന്ന് കീര്‍ത്തി ആസാദ് ആവശ്യപ്പെട്ടു. ജെയ്റ്റ്‌ലിയെ പേരെടുത്ത് കുറ്റപ്പെടുത്തിയില്ലെങ്കിലും കീര്‍ത്തി ആസാദ് ലക്ഷ്യംവയ്ക്കുന്നത് കേന്ദ്രധനമന്ത്രിയെ തന്നെ. ബിജെപി നേതൃത്വത്തിന്റെ വിലക്ക് ലംഘിച്ചാണ് വാര്‍ത്താസമ്മേളനം വിളിച്ചത്.
മുന്‍ക്രിക്കറ്റ് താരങ്ങളായ ബിഷന്‍സിങ് ബേദി, സുരീന്ദര്‍ ഖന്ന എന്നിവര്‍ക്കൊപ്പം നടത്തിയ വാര്‍ത്താസമ്മേളനത്തില്‍ ഡല്‍ഹി ക്രിക്കറ്റ് അസോസിയേഷനില്‍ വന്‍ക്രമക്കേടുകളാണ് നടക്കുന്നതെന്ന് കീര്‍ത്തി ആസാദ് ആരോപിച്ചു. 2011-12 വര്‍ഷത്തിലെ അസോസിയേഷന്‍ ഭരണസമിതി യോഗത്തിന്റെ വീഡിയോ ക്‌ളിപ്പും പ്രദര്‍ശിപ്പിച്ചു. യോഗത്തില്‍ കീര്‍ത്തി ആസാദ് അഴിമതി ആരോപണങ്ങള്‍ ഉന്നയിക്കുന്നത് ദൃശ്യങ്ങളിലുണ്ട്. ജെയ്റ്റ്‌ലിയെ ചോദ്യംചെയ്യുന്നുമുണ്ട്. സാമ്പത്തിക ക്രമക്കേടുകള്‍ നടക്കുന്നതായാണ് ആരോപണം. ഡിഡിസിഎ ഭാരവാഹികളെ ജെയ്റ്റ്‌ലി പ്രതിരോധിക്കുന്നതും ന്യായീകരിക്കുന്നതും ദൃശ്യങ്ങളില്‍ വ്യക്തം.
നിരവധി കമ്പനികള്‍ക്ക് കോടികളുടെ കരാറുകള്‍ ഡിഡിസിഎ നല്‍കിയതായി ആസാദ് പറഞ്ഞു. ഇതെല്ലാം വ്യാജകമ്പനികളാണ്. മാധ്യമങ്ങള്‍ തട്ടിപ്പ് തെളിവുസഹിതം പുറത്തുകൊണ്ടുവന്നിട്ടും അന്വേഷണമുണ്ടായില്ല. ഒരു ലാപ്‌ടോപ്പിന് 16,000 രൂപ എന്ന നിരക്കിലാണ് പ്രതിദിന വാടക. പ്രിന്ററിന് മൂവായിരവും പൂജാപാത്രത്തിന് അയ്യായിരവും. തന്റെ പോരാട്ടം വ്യക്തിപരമോ രാഷ്ട്രീയമോ അല്ല. നിലപാടുകള്‍ക്കുവേണ്ടിയാണ്. യുപിഎ കാലത്ത് ജെയ്റ്റ്‌ലിയെ പ്രതിയാക്കാന്‍ സോണിയാഗാന്ധിയെ കണ്ടെന്ന ആക്ഷേപം ശരിയല്ല കീര്‍ത്തി ആസാദ് ആവശ്യപ്പെട്ടു.
ബിജെപിയിലെ ട്രോജന്‍ കുതിരയാണ് കീര്‍ത്തി ആസാദെന്ന് ജെയ്റ്റ്‌ലി നേരത്തെ ആക്ഷേപിച്ചിരുന്നു. യുപിഎകാലത്തു തന്നെ കുടുക്കാന്‍ അയാള്‍ സോണിയാഗാന്ധിയെ കണ്ടിരുന്നു. യുപിഎയുടെ കാലത്ത് ആരോപണങ്ങള്‍ ഇഴകീറി പരിശോധിച്ചതാണ്. എന്നാല്‍, തനിക്കെതിരെ തെളിവിന്റെ കണിക പോലും കണ്ടെത്തിയില്ല ജെയ്റ്റ്‌ലി പറഞ്ഞു.
ജെയ്റ്റ്‌ലി രാജിവയ്ക്കണമെന്ന എഎപി ആവശ്യപ്പെട്ടു. മുഖ്യമന്ത്രി കെജ്രിവാള്‍ അന്വേഷണവും പ്രഖ്യാപിച്ചു. അടുത്ത ദിവസം പാര്‍ലമെന്റില്‍ പ്രതിപക്ഷ പാര്‍ടികള്‍ ജെയ്റ്റ്‌ലിക്കെതിരെ ശക്തമായി രംഗത്തുവരും.