ഇനി നാല് ദിവസങ്ങൾ മാത്രം! രാജ്യത്തിന്റെ സ്വപ്ന ദൗത്യമായ  ചന്ദ്ര ഭ്രമണപഥത്തിലേക്ക് എത്തുവാൻ ഇനി ദിവസങ്ങൾ മാത്രമാണ് ബാക്കി. ചൊവ്വാഴ്ച പുലർച്ചെ പേടകം ട്രാൻസ് ലൂണാർ ട്രാജക്ടറിയിൽ പ്രവേശിച്ചിരുന്നു . ഓഗസ്റ്റ് ഒന്നിന് രാത്രി പന്ത്രണ്ടിനും ഒന്നിനും ഇടയിലായിരുന്നു ട്രാൻസ് ലൂണാർ ഇൻജക്ഷൻ നടന്നത്.

ഇനി അടുത്ത ദൗത്യം ചന്ദ്ര ഭ്രമണപഥത്തിലേക്ക് എത്തുക എന്നതാണ്. ഓഗസ്റ്റ് അഞ്ചോട് കൂടി ബഹിരാകാശ പേടകം ദീർഘവൃത്താകൃതിയിലൂള്ള ചാന്ദ്ര ഭ്രമണപഥത്തിലേക്ക് കടക്കും. നിലവിൽ ചന്ദ്രയാൻ-3യുടെ ഭ്രമണപഥം ഉയർത്തിയിരിക്കുന്നത് 288 കിലോമീറ്റർ 3.7 ലക്ഷം കിലോമീറ്റർ എന്നിങ്ങനെയാണ്.ഈ ഭ്രമണപഥത്തിൽ നിന്നാണ് പേടകം ചന്ദ്രന്റെ സ്വാധീന വലയത്തിലേക്ക് പ്രവേശിക്കുന്നത്. ഈ സമയം ചന്ദ്രന്റെ ഭ്രമണപഥത്തിലേക്ക് പ്രവേശിക്കുന്നതിനുള്ള നിർണായക പ്രവർത്തനങ്ങൾ നടക്കുകയും ചെയ്യും .

20 മുതൽ 21 മിനിറ്റ് വരെ സമയമെടുത്താണ് കഴിഞ്ഞ ദിവസം ട്രാൻസ് ലൂണാർ ഇൻജക്ഷൻ വിജയകരമായി പൂർത്തീകരിക്കാൻ സാധിച്ചത് . ഈ സമയം പേടകത്തിന്റെ വേഗതയിൽ ഉൾപ്പെടെ നിർണായകമായ നീക്കങ്ങൾ വരുത്തിയതായി ഐഎസ്ആർഒ അറിയിക്കുകയും ചെയ്തു.ഇതുവരെയും ആസൂത്രണം ചെയ്തത് അനുസരിച്ച് കാര്യങ്ങൾ പോകുന്നതെന്ന് ഐഎസ്ആർഒ ചെയർമാൻ എസ് സോമനാഥ് പ്രതികരിക്കുകയും ചെയ്തു .