ചന്ദ്രയാന്‍ നിര്‍ണായക ഘട്ടവും വിജയം.... ഇന്ത്യയുടെ ചന്ദ്രയാന്‍ 3ന്റെ ലാന്‍ഡിംഗ് മൊഡ്യൂള്‍, പ്രൊപ്പല്‍ഷന്‍ മൊഡ്യൂളില്‍ നിന്ന് വേര്‍പെട്ടു.....ലാന്‍ഡറിന്റെ ഭ്രമണപഥം താഴ്ത്തുക നാളെ വൈകുന്നേരം .

ആഗസ്റ്റ് 23നാണ് ലാന്‍ഡര്‍ ചന്ദ്രോപരിതലത്തില്‍ ഇറങ്ങുക. ചന്ദ്രോപരിതലത്തില്‍ നിന്ന് 100 കി.മീ. മുകളില്‍ വെച്ചാണ് ലാന്‍ഡര്‍ വേര്‍പെട്ടത്.

ചന്ദ്രയാന്‍ -3 വിജയകരമായി ചന്ദ്രനുചുറ്റും വൃത്താകൃതിയിലുള്ള അവസാനഘട്ട ഭ്രമണപഥം പൂര്‍ത്തിയാക്കിയതായി ഐഎസ്ആര്‍ഒ നേരത്തെ അറിയിച്ചിരുന്നു..ഇന്ത്യയുടെ ചന്ദ്രയാന്‍ -3 ഉം റഷ്യയുടെ ലൂണ -25 ഉം അടുത്തയാഴ്ച സോഫ്റ്റ് ലാന്‍ഡിങ്ങിനായി തയ്യാറെടുക്കുന്നു. ചന്ദ്രന്റെ അജ്ഞാത ദക്ഷിണധ്രുവത്തിലേക്ക് ആര് ആദ്യം എത്തുമെന്ന കടുത്ത മത്സരം തന്നെയാണ് ബഹിരാകാശത്ത് നടക്കുക.

ചന്ദ്രന്റെ ദക്ഷിണധ്രുവത്തില്‍ ആദ്യമായി ഇറങ്ങാനായി ലക്ഷ്യമിട്ട് ചന്ദ്രയാന്‍ -3 ആണ് ആദ്യം യാത്ര പുറപ്പെട്ടത് എങ്കിലും ലൂണ-25- ഓഗസ്റ്റ് 21 നോ 23 നോ സോഫ്റ്റ് ലാന്‍ഡിങ് നടത്തുമെന്നാണ് വിലയിരുത്തുന്നത്.

ഇതിന് തൊട്ടുപിന്നാലെ ഓഗസ്റ്റ് 23 നോ 24 നോ ആയി ചന്ദ്രയാന്‍ 3 ഉം ചാന്ദ്രോപരിത്തലത്തിലിറങ്ങും എന്നും ഐഎസ്ആര്‍ഒ വൃത്തങ്ങള്‍ . ഇന്ത്യയുടെ ചാന്ദ്ര പര്യവേക്ഷണ പരമ്പരയിലെ മൂന്നാമത്തെ ദൗത്യമായ ചന്ദ്രയാന്‍- 3 ജൂലൈ 14 ന് വിക്ഷേപിച്ച് ഓഗസ്റ്റ് 5 ന് വിജയകരമായി ചന്ദ്രന്റെ ഭ്രമണപഥത്തില്‍ പ്രവേശിച്ചിട്ടുണ്ടായിരുന്നു.

വിക്ഷേപിച്ച് 40 ദിവസത്തിനുള്ളില്‍ തന്നെ സോഫ്റ്റ് ലാന്‍ഡിംഗ് ശ്രമത്തിനുള്ള തയ്യാറെടുപ്പിനായി ചന്ദ്രയാന്‍ 3 അതിന്റെ ഭ്രമണപഥം സൂക്ഷ്മമായി ക്രമീകരിക്കുന്നുമുണ്ട്.

അതേസമയം 1976-ലെ സോവിയറ്റ് കാലഘട്ടത്തിലെ ലൂണ-24 ദൗത്യം കഴിഞ്ഞ് ഏകദേശം അഞ്ച് പതിറ്റാണ്ടിനു ശേഷം റഷ്യ നടത്തുന്ന ആദ്യ ചാന്ദ്രദൗത്യം ആണ് ലൂണ-25. ഓഗസ്റ്റ് 10-നാണ് ലൂണ 25 വിക്ഷേപിച്ചത്. അതിനാല്‍ ഓഗസ്റ്റ് 21-ന് ഏകദേശം 11 ദിവസത്തിനുള്ളില്‍ തന്നെ ഇതിന് ലാന്‍ഡിംഗ് നടത്താന്‍ സാധിക്കുമെന്നാണ് പ്രതീക്ഷിക്കുന്നത്.