ചില യാത്രക്കാർ കാണിച്ചു കൂട്ടുന്ന തോന്ന്യാസം കാരണം വിമാനത്തിൽ പോലും ഒന്ന് മദ്യാദയ്ക്ക് യാത്ര ചെയ്യാൻ പറ്റാത്ത അവസ്ഥയാണ്. ചിലർ മദ്യപിച്ച് സഹയാത്രക്കാരായ സ്ത്രീകളോടും എയർഹോസ്റ്റസുമാരോടും, എന്തിന് വേണ്ട ചെറിയ കുട്ടികളോട് പോലും വിമാനത്തിൽ മോശമായ രീതിയിൽ പെരുമാറിയ വാർത്ത അടുത്തിടെ പുറത്തുവന്നിട്ടുണ്ട്. ആകാശത്ത് പോലും സ്ത്രീകൾക്ക് രക്ഷയിലാത്ത സാഹചര്യമാണുള്ളത്.

സ്‌പൈസ് ജെ വിമാനത്തിൽ യാത്രക്കാരൻ ഒരു വനിതാ ഫ്ലൈറ്റ് അറ്റൻഡന്റിന്റെയും സഹയാത്രികയുടെയും അടിവസ്‌ത്രത്തിന്റെ ചിത്രങ്ങൾ പകർത്താൻ ശ്രമിച്ച വാർത്തയാണ് പുറത്തുവരുന്നത്. ഈ യാത്രക്കാരനെതിരെ വനിതാ കമ്മീഷൻ നോട്ടീസ് പുറപ്പെടുവിച്ചു.വിമാനത്തിൽ യാത്ര ചെയ്തിരുന്ന മറ്റൊരു യുവതി ഇൻസ്റ്റഗ്രാമിൽ പോസ്റ്റ് ചെയ്ത വീഡിയോയിൽ സംഭവത്തെ കുറിച്ച് വിശദീകരിക്കുന്നുണ്ട്.

2023 ഓഗസ്റ്റ് 16 ബുധനാഴ്ച ഉച്ചയ്ക്ക് സ്‌പൈസ് ജെറ്റിന്റെ ഡൽഹിയിൽ നിന്നും മുംബൈയിലേക്ക് പുറപ്പെട്ട വിമാനത്തിലാണ് സംഭവം.യുവതി പറയുന്നത് അനുസരിച്ച്.. ഫ്ലൈറ്റ് അറ്റൻഡന്റ് ഇയാളുടെ അടുത്ത് നിന്നപ്പോൾ രഹസ്യമായി അവരുടെ അടിവസ്ത്രത്തിന്റെ ചിത്രങ്ങൾ പകർത്താൻ ശ്രമിച്ചു എന്നാണ്. പിന്നീട്, ഫ്ലൈറ്റ് അറ്റൻഡന്റും ഇയാൾ ചിത്രങ്ങൾ പകർത്തിയതായി ആരോപിച്ചു. പിന്നാലെ, ഇയാളുടെ ഫോൺ വാങ്ങി പരിശോധിച്ചപ്പോൾ ഫ്ലൈറ്റ് അറ്റൻഡന്റിന്റേത് കൂടാതെ ഒരു യാത്രക്കാരിയുടെ ചിത്രവും ഇയാളുടെ ഫോണിൽ ഉണ്ടായിരുന്നതായി കണ്ടെത്തി.

പിന്നീട്, സുരക്ഷാ ജീവനക്കാരെ വിവരം അറിയിക്കുകയും വിമാനം എത്തിയപ്പോൾ ഇയാളെ കൊണ്ടുപോവുകയും ചെയ്തു. സംഭവത്തിൽ ഡൽഹി വനിതാ കമ്മീഷൻ സ്വമേധയാ കേസെടുത്ത ശേഷം വെള്ളിയാഴ്ചയാണ് ഡയറക്ടറേറ്റ് ജനറൽ ഓഫ് സിവിൽ ഏവിയേഷനും ഇന്ദിരാഗാന്ധി ഇന്റർനാഷണൽ ഡിസിപിക്കും നോട്ടീസ് അയച്ചത്. സംഭവത്തിൽ വിശദീകരണം നൽകാൻ വനിതാ കമ്മീഷൻ ആഗസ്ത് 23 വരെ സമയം നൽകിയിട്ടുണ്ട്.