ചരിത്രമെഴുതി ചന്ദ്രനിലിറങ്ങിയ ചന്ദ്രയാന്‍ 3യുടെ വിജയത്തില്‍ ഇന്ത്യയെ അഭിനന്ദിച്ച് യു.എ.ഇ വൈസ് പ്രസിഡന്റും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം. എക്‌സ് പ്ലാറ്റ്‌ഫോമില്‍ പങ്കുവച്ച കുറിപ്പിലാണ് അദ്ദേഹം ഇന്ത്യയെ അഭിനന്ദിച്ചത്. ചന്ദ്രനില്‍ വിജയകരമായി ഇറങ്ങിയതില്‍ ഇന്ത്യയിലെ ഞങ്ങളുടെ സുഹൃത്തുക്കള്‍ക്ക് അഭിനന്ദനമങ്ങള്‍. രാഷ്ട്രങ്ങള്‍ കെട്ടിപ്പടുക്കുന്നത് സ്ഥിരോത്സാഹത്തിലൂടെയാണ്. ഇന്ത്യ ചരിത്രം സൃഷ്ചിക്കുന്നത് തുടരുന്നു. അദ്ദേഹം കുറിച്ചു.

അരനൂറ്റാണ്ടുകാലത്തെ ബഹിരാകാശചരിത്രത്തില്‍ ആദ്യമായാണ് ഇന്ത്യ മറ്റൊരുഗ്രഹത്തില്‍ പേടകമിറക്കുന്നത്. അതും ചന്ദ്രന്റെ ദക്ഷിണധ്രുവത്തില്‍ ഇറങ്ങുന്ന ആദ്യ രാജ്യമെന്ന അപൂര്‍വ റെക്കാഡുമായി, ഇന്ന് വൈരിച്ച് 6.04നായിരുന്നു സോഫ്ച് ലാന്‍ഡിംഗ്. ചന്ദ്രനില്‍ ശക്തിപ്രകടനം നടത്തിയ വികസിത രാജ്യങ്ങളുടെ എലൈറ്റ് ക്‌ളബില്‍ നാലാം രാജ്യമായി ചുവടുറപ്പിച്ചത്. അമേരിക്കയും റഷ്യയും ചൈനയും മാത്രമാണ് മുന്‍പ് ചന്ദ്രനില്‍ ഇറങ്ങിയത്. ഇവരാരും ചന്ദ്രന്റെ ദക്ഷിണധ്രുവത്തില്‍ ഇറങ്ങിയിട്ടില്ല.

മണിക്കൂറില്‍ ആറായിരത്തിലേറെ കിലോമീറ്റര്‍ വേഗതയില്‍ സഞ്ചരിച്ച പേടകത്തിന്റെ വേഗത സെക്കന്‍ഡില്‍ രണ്ട് മീറ്ററായി കുറച്ച ശേഷമായിരുന്നു സോഫ്റ്റ് ലാന്‍ഡിംഗ്. 4.2 കിലോമീറ്റര്‍ നീളവും 2.5 കിലോമീറ്റര്‍ വീതിയുമുള്ള സ്ഥലത്ത് എവിടെ വേണമെങ്കിലും ഇറങ്ങാമായിരുന്നു. ലാന്‍ഡിംഗിന് രണ്ട് മണിക്കൂര്‍ മുമ്പ് ബംഗളുരുവിലെ ഐ എസ് ആര്‍ ഒ ടെലിമെട്രി ആന്‍ഡ് ട്രാക്കിംഗ് കമാന്‍ഡ് നെറ്റ്‌വര്‍ക്കിലെ ശാസ്ത്രജ്ഞര്‍ 19മിനുട്ട് നീളുന്ന സങ്കീര്‍ണമായ ലാന്‍ഡിംഗ് പ്രക്രിയയ്ക്കുള്ള കമാന്‍ഡുകള്‍ പേടകത്തിലേക്ക് അയച്ചു. അതിന് ശേഷം പേടകത്തിലെ ആര്‍ട്ടിഫിഷ്യല്‍ ഇന്റലിജന്‍സ് സോഫ്റ്റ്‌വെയര്‍ നിയന്ത്രണം ഏറ്റെടുത്തു. ഇറങ്ങാന്‍ തടസമായ ഗര്‍ത്തങ്ങളും പാറക്കെട്ടുകളുമൊക്കെ സ്വയം കണ്ടെത്താനും ഒഴിവാക്കാനും സുരക്ഷിതമായ സ്ഥലത്ത് കൃത്യമായി ലാന്‍ഡ് ചെയ്യാനും ഈ സോഫ്റ്റ്‌വെയര്‍ സഹായിച്ചു.