പാക് ഗസല്‍ ഗായകന്‍ ഗുലാം അലിയുടെ പരിപാടി കൊല്‍ക്കത്തയില്‍ സംഘടിപ്പിക്കാനുള്ള ശ്രമങ്ങള്‍ക്കു തിരിച്ചടി. കോല്‍ക്കത്ത ഈഡന്‍ ഗാര്‍ഡന്‍ സ്റ്റേഡിയം പരിപാടിക്കായി വിട്ടുനല്‍കില്ലെന്ന് ബംഗാള്‍ ക്രിക്കറ്റ് അസോസിയേഷന്‍ പ്രസിഡന്റും ഇന്ത്യന്‍ ക്രിക്കറ്റ് ടീം മുന്‍ നായകനുമായിരുന്ന സൗരവ് ഗാംഗുലി വ്യക്തമാക്കി. ഈ വര്‍ഷം നടക്കുന്ന ട്വന്റി-20 ലോകകപ്പിന് മുന്നോടിയായി 15ന് ഐസിസി ഈഡനില്‍ പരിശോധന നടത്താന്‍ എത്തുന്നത് പരിഗണിച്ചാണ് ഗാംഗുലി പരിപാടിക്കു തടയിട്ടത്. 12ന് ഗുലാം അലിയുടെ സംഗീതപരിപാടി സംഘടിപ്പിക്കുമെന്നായിരുന്നു നേരത്തെ പ്രഖ്യാപിച്ചിരുന്നത്.
ശിവസേനയുടെ എതിര്‍പ്പിനെ തുടര്‍ന്ന് മുംബൈയിലെയും ഡല്‍ഹിയിലെയും ഗുലാം അലിയുടെ സംഗീത പരിപാടികള്‍ക്ക് വിലക്കേര്‍പ്പെടുത്തിയിരുന്നു. കച്ചേരി നടത്താന്‍ ശ്രമിച്ചാല്‍ തടയുമെന്ന് ശിവസേന മുന്നറിയിപ്പ് നല്‍കിയിരുന്നു. അതിര്‍ത്തി കടന്നുള്ള അക്രമങ്ങള്‍ അവസാനിപ്പിക്കാതെ പാകിസ്താനില്‍ നിന്നുള്ള ഒരു കലാകാരനെയും സ്വീകരിക്കില്ലെന്നും നേരത്തെ ശിവസേന വ്യക്തമാക്കിയിട്ടുണ്ട്.
ഇന്ത്യയില്‍ നടക്കുന്ന ട്വന്റി-20 ലോകകപ്പിന്റെ ഫൈനല്‍ ഈഡനില്‍ നടത്താനാണ് പദ്ധതി. ഐസിസി പരിശോധനയ്ക്കു മുമ്പായി എന്തെങ്കിലും പരിപാടി സംഘടിപ്പിക്കുന്നത് ഈഡന്റെ ഫൈനല്‍ സാധ്യതകള്‍ക്കു മങ്ങലേല്‍പ്പിക്കുമെന്ന് ബംഗാള്‍ ക്രിക്കറ്റ് അസോസിയേഷന്‍ ഭയപ്പെടുന്നു. ഇതേത്തുടര്‍ന്നാണ് പരിപാടിക്ക് അനുമതി നിഷേധിച്ചത്. ഇതേക്കുറിച്ച് പശ്ചിമ ബംഗാള്‍ ന്യൂനപക്ഷ വികസന കോര്‍പറേഷനു കത്തയച്ചതായും ഗാംഗുലി അറിയിച്ചു.
പുരുഷ-വനിതാ വിഭാഗങ്ങളിലെ ഫൈനല്‍ ഉള്‍പ്പെടെ ട്വന്റി-20 ലോകകപ്പിലെ ആറു മത്സരങ്ങള്‍ ഈഡന്‍ ഗാര്‍ഡനില്‍ നടത്താനാണ് പദ്ധതിയിട്ടിരിക്കുന്നത്. ഏപ്രില്‍ മൂന്നിനാണ് ഫൈനല്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha