അന്തരീക്ഷ മലിനീകരണം കുറയ്ക്കുന്നതിനായി നടപ്പിലാക്കിയ ഒറ്റ ഇരട്ട അക്ക നമ്പര്‍ വാഹന നിയന്ത്രണം വിജയമെന്ന് ഡല്‍ഹി സര്‍ക്കാര്‍. വാഹന നിയന്ത്രണം വഴിയായി അന്തരീക്ഷ മലിനീകരണം മുപ്പത് ശതമാനം കുറയ്ക്കാന്‍ സാധിച്ചതായി ഗതാഗത മന്ത്രി ഗോപാല്‍ റായ് പറഞ്ഞു. വ്യാഴാഴ്ച്ച ഉച്ചസമയത്ത് നടത്തിയ അന്തരീക്ഷ മലിനീകരണ തോത് പരിശോധനയ്ക്കുശേഷമാണ് അദേഹം ഇക്കാര്യം അറിയിച്ചത്. ഉച്ചയ്ക്ക് രണ്ട് മണിയോടെ ഡല്‍ഹിയുടെ വിവിധ ഭാഗങ്ങളില്‍ നടത്തിയ അന്തരീക്ഷ മലിനീകരണ തോത് പരിശോധനയില്‍ മലിനീകരണം 25 മുതല്‍ 30 ശതമാനം വരെ കുറഞ്ഞിട്ടുണ്ടെന്നാണ് റിപ്പോര്‍ട്ടുകള്‍.
ഒറ്റ ഇരട്ട അക്ക നമ്പര്‍ വാഹന നിയന്ത്രണം ഒരാഴ്ച്ച പിന്നിടുമ്പോഴാണ് വിവിധ പരിശോധനകളുടെ പിന്‍ബലത്തില്‍ നിയന്ത്രണം വിജയമാണെന്ന് സര്‍ക്കാര്‍ പറയുന്നത്. 2015 ഡിസംബറില്‍ ക്യൂബിക് മീറ്ററില്‍ 465 മൈക്രോ ഗ്രാം ഉണ്ടായിരുന്ന ഉണ്ടായിരുന്ന മലിനീകരണം തോത് ഇപ്പോള്‍ 300 മൈക്രോ ഗ്രാമായി കുറയ്ക്കാന്‍ സാധിച്ചു. ഡല്‍ഹിയുടെ വിവിധ ഭാഗങ്ങളിലായി സ്ഥാപിച്ച നിരീക്ഷണ യൂണിറ്റുകളിലെ ഒരാഴ്ച്ചത്തെ മലിനീകരണ തോത് നിരീക്ഷണത്തിന്റെ പിന്‍ബലത്തിലാണ് റിപ്പോര്‍ട്ട്. ഓരോ ഇരുപത് മിനിറ്റിലും മലിനീകരണ തോത് നിരീക്ഷിച്ചിരുന്നു.
നിയന്ത്രണം ചോദ്യം ചെയ്തുന്ന ഹര്‍ജികള്‍ ഡല്‍ഹി ഹൈക്കോടതി ഇന്ന് വീണ്ടും പരിഗണിക്കാനിരിക്കേയാണ് സര്‍ക്കാര്‍ റിപ്പോര്‍ട്ട് പുറത്തുവിടുന്നത്. നിയന്ത്രണംകൊണ്ട് എത്രമാത്രം മലിനീകരണം കുറഞ്ഞുവെന്ന് വ്യക്തമാക്കണമെന്ന് കോടതി സര്‍ക്കാരിനോട് നിര്‍ദേശിച്ചിരുന്നു. പരീക്ഷണ നിയന്ത്രണം ഇന്ന് വരെ പോരെയെന്നും കോടതി ആരാഞ്ഞിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക