പത്താന്‍കോട്ട് വ്യോമസേന താവളം പ്രധാനമന്ത്രി നരേന്ദ്ര മോഡി ശനിയാഴ്ച സന്ദര്‍ശിച്ചേക്കും. പ്രധാനമന്ത്രിയുടെ ഓഫിസുമായി അടുത്ത വൃത്തങ്ങളാണ് ഇക്കാര്യം അറിയിച്ചത്. അതിനിടെ, ഗുരുദാസ്പൂര്‍ എസ്പി സല്‍വീന്ദര്‍ സിങ്ങിനോട് തിങ്കാളാഴ്ച വീണ്ടും ചോദ്യം ചെയ്യാന്‍ ഹാജരാകണമെന്ന് കാണിച്ച് എന്‍ഐഎ സമന്‍സ് അയച്ചു. പത്താന്‍കോട്ട് വ്യോമസേന താവളത്തിലെ ഭീകരാക്രമണവുമായി ബന്ധപ്പെട്ട ഭീകരര്‍ തട്ടിക്കൊണ്ടു പോയ എസ്പിയുടെ മൊഴികളില്‍ വൈരുദ്ധ്യം ഉണ്ടായതിനെ തുടര്‍ന്നാണ് അദ്ദേഹത്തെ വീണ്ടും ചോദ്യം ചെയ്യുന്നത്. അദ്ദേഹത്തെ നുണപരിശോധനയ്ക്ക് വിധേയനാക്കിയേക്കുമെന്നും റിപ്പോര്‍ട്ടുകള്‍ ഉണ്ടായിരുന്നു.

അതേസമയം, കേസ് അന്വേഷിക്കുന്ന എന്‍ഐഎ സംഘത്തിന്റെ തെളിവെടുപ്പ് പുരോഗമിക്കുകയാണ്. ഇന്ന് അതിര്‍ത്തി ഗ്രാമത്തിലെ പാടങ്ങളില്‍ നിന്നും പത്താന്‍കോട്ട് വ്യോമസേന താവളത്തില്‍ നിന്നും ഏതാനും കാല്‍പാടുകള്‍ ശേഖരിക്കുകയും അവ ഫൊറന്‍സിക്ക് പരിശോധനയ്ക്ക് അയക്കുകയും ചെയ്തു.

ഭീകരാക്രമണം നടത്തിയവര്‍ വന്നുവെന്ന് കരുതുന്ന ഇന്ത്യ-പാക്കിസ്ഥാന്‍ അതിര്‍ത്തിയിലെ ചില പ്രദേശങ്ങളും ആക്രമണം നടത്തിയ വ്യോമസേന താവളത്തിലെയും ഏതാനും കാല്‍പാടുകളാണ് തമ്മില്‍ ചേരുന്നുണ്ടോയെന്ന് പരിശോധിക്കാന്‍ ഫൊറന്‍സിക് ലാബിലേക്ക് അയച്ചത്. ഭീകരര്‍ ഏതുവഴിയാണ് നുഴഞ്ഞു കയറിയത് എന്ന കാര്യം വ്യക്തമാകുന്നതിനാണ് ഈ നടപടിയെന്നാണ് സൂചന. അന്വേഷണവുമായി ബന്ധപ്പെട്ട കാര്യങ്ങള്‍ വിശദീകരിക്കുന്നതിനായി എന്‍ഐഎ ഡയറക്ടര്‍ ജനറല്‍ കേന്ദ്ര ആഭ്യന്തരമന്ത്രി രാജ്‌നാഥ് സിങ്ങിനെ ടെലിഫോണില്‍ ബന്ധപ്പെട്ടു.

ഭീകരര്‍ തട്ടിക്കൊണ്ടു പോയി കൊലപ്പെടുത്തിയ ടാക്‌സി ഡ്രൈവര്‍ ഇഖര്‍ സിങ്ങിന്റെ ടെലിഫോണ്‍ വിവരങ്ങളും എന്‍ഐഎ സംഘം പരിശോധിക്കുന്നുണ്ട്. എവിടേക്കാണ് ഫോണ്‍ ചെയ്തത്. ഏതെല്ലാം സ്ഥലത്തെ ടവര്‍ ലൊക്കേഷനാണ് ഉള്ളത്. അദ്ദേഹത്തിന്റെ മുന്‍കാല പ്രവര്‍ത്തനങ്ങള്‍ എന്നിവ പരിശോധിക്കുന്നതിനാണിത്. പത്താന്‍കോട്ട് ഭീകരാക്രമണവുമായി ബന്ധപ്പെട്ട് മൂന്നു കേസുകളാണ് എന്‍ഐഎ രജിസ്റ്റര്‍ ചെയ്തത്. 20 അംഗ എന്‍ഐഎ സംഘമാണ് കേസ് അന്വേഷിക്കുന്നത്. പുതുവര്‍ഷത്തിന് പിന്നാലെയുണ്ടായ ആക്രമണത്തില്‍ ഏഴ് സൈനികരും ആറ് ഭീകരരുമാണ് മരിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha