ഇന്ത്യയുടെ നടപടികളെ കളിയാക്കിയും പത്താന്‍കോട്ട് വ്യോമസേനാ താവളത്തിലെ ഭീകരാക്രമണത്തിന്റെ മുഴുവന്‍ ഉത്തരവാദിത്തം ഏറ്റെടുക്കുകയും വീരമൃത്യുവടഞ്ഞ ജവാന്മാരെ അപമാനിച്ചും ജയ്‌ഷെ മുഹമ്മദിന്റെ വിഡിയോ സന്ദേശം. www.alqalamionline.com എന്ന വെബ്‌സൈറ്റിലാണ് വിഡിയോ പോസ്റ്റ് ചെയ്തിരിക്കുന്നത്. പത്താന്‍കോട്ട് വ്യോമസേനാ താവളത്തില്‍ ആക്രമണം നടത്തിയതെങ്ങനെയെന്നും സന്ദേശത്തില്‍ പറയുന്നു. 

ജിഹാദികളെ തുരത്താന്‍ ഇന്ത്യന്‍ സൈന്യത്തിനു സമയമെടുത്തു. സൈനിക നടപടി നീണ്ടതു ദൗത്യത്തിന്റെ വിജയമാണെന്നും വിഡിയോയില്‍ അവകാശപ്പെട്ടു. ഇന്ത്യയുടെ ആവശ്യം അംഗീകരിക്കരുതെന്ന് പാക്ക് സര്‍ക്കാരിനോട് ജയ്‌ഷെ മുഹമ്മദ് ആവശ്യപ്പെട്ടിട്ടുണ്ട്. ഇന്ത്യയുടെ ആരോപണങ്ങള്‍ക്കു മുന്നില്‍ പാക്ക് നേതാക്കള്‍ എന്തുകൊണ്ടാണു തലകുനിക്കുന്നത്. എന്തിനാണ് അവര്‍ നമ്മളെ നാണം കെടുത്തുന്നത്? തങ്ങളുടെ ആറു മുജാഹിദ്ദീനുകളെ കണ്ടെത്താന്‍ ഇന്ത്യന്‍ സൈനികര്‍ക്കു സാധിക്കാതിരുന്നതിനെയും അവര്‍ പരിഹസിച്ചു. ലഫ്. കേണല്‍ നിരഞ്ജന്‍ കുമാറിന്റെയും ഷൂട്ടര്‍ സുബേദാര്‍ ഫത്തേ സിങ്ങിനെയും താഴ്ത്തിക്കെട്ടുന്ന തരത്തിലുള്ള സംഭാഷണങ്ങളും വിഡിയോയിലുണ്ട്. ഭീകരരുടെ എണ്ണം ഓരോ തവണയും മാറ്റിപ്പറഞ്ഞതിനെയും ജയ്ഷ് വിഡിയോയില്‍ പരിഹസിക്കുന്നു. ആദ്യം അവര്‍ പറഞ്ഞു ആറു ഭീകരരുണ്ടെന്ന്, പിന്നെ അത് അഞ്ചാക്കി, തുടര്‍ന്നു വീണ്ടും നാലിലേക്കു മാറ്റി. ഭീരുക്കളെ പോലെയായിരുന്നു ഇന്ത്യയുടെ പെരുമാറ്റം. കണ്ണീരണിഞ്ഞു വലിയൊരു രാജ്യം വിരലുകള്‍ ചൂണ്ടി കുറ്റം ആരോപിക്കുകയാണെന്നും വിഡിയോയില്‍ പറയുന്നു.
ഇന്ത്യന്‍ ഹെലിക്കോപ്റ്ററുകള്‍ക്കും ടാങ്കറുകള്‍ക്കും നേരെ വെടിയുതിര്‍ത്തതായും അവര്‍ അവകാശപ്പെടുന്നു. എന്നാല്‍ ഇതു സമ്മതിക്കുന്നതിന് ഇന്ത്യ തയാറായിട്ടില്ലെന്നും വ്യോമസേനയുടെ സമ്പത്തെല്ലാം സംരക്ഷിച്ചുവെന്നുമാണ് സൈന്യം പറയുന്നതെന്നും അവര്‍ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha