ബംഗാള് ഗവര്ണര് അമിത്ഷായുമായി കൂടിക്കാഴ്ച്ച നടത്തി
ബംഗാളിന്റെ തന്ത്രപ്രധാനമായ ബംഗ്ലാദേശ്, ഭൂട്ടാന്, നേപ്പാള് അതിര്ത്തി ഗ്രാമങ്ങള് സന്ദര്ശിച്ച ഗവര്ണര് ഡോ സി.വി ആനന്ദബോസ് കഴിഞ്ഞദിവസം ഡല്ഹിയില് കേന്ദ്ര ആഭ്യന്തര മന്ത്രി അമിത്ഷായുമായി കൂടിക്കാഴ്ച നടത്തി. ആദ്യ രണ്ടു വര്ഷങ്ങളില് അക്രമങ്ങള്ക്കും അഴിമതിക്കുമെതിരെ ശക്തമായ നിലപാടെടുത്ത ഗവര്ണര് ഇപ്പോള് അതിര്ത്തികളില് വര്ദ്ധിച്ചുവരുന്ന വിധ്വംസകപ്രവത്തനങ്ങള്ക്കും സര്വകലാശാലകളെ കലാപശാലകളാക്കുന്ന അരാജകവാദികള്ക്കുമെതിരെയുള്ള നടപടികളിലാണ് ശ്രദ്ധയൂന്നുന്നത്.
മയക്കുമരുന്ന്, ആയുധങ്ങള്, വ്യാജ കറന്സി, വന്യജീവി ഉല്പ്പന്നങ്ങള് എന്നിവയുടെ കള്ളക്കടത്തും മനുഷ്യക്കടത്തും തീവ്രവാദപ്രവര്ത്തനങ്ങളും തടയുന്നതിന് അതിര്ത്തിഗ്രാമങ്ങളില് സായുധസേന, സര്ക്കാര് സംവിധാനങ്ങള്, സാമൂഹിക സംഘടനകള് എന്നിവ നടത്തുന്ന പ്രവര്ത്തനങ്ങളും ജനക്ഷേമപദ്ധതികളും നിരീക്ഷിക്കുകയായിരുന്നു ഗവര്ണറുടെ പ്രധാന സന്ദര്ശനോദ്ദേശ്യം. ഒപ്പം കേന്ദ്രസര്ക്കാര് പദ്ധതികളെക്കുറിച്ചുള്ള അവബോധ പ്രവര്ത്തനങ്ങള് ശക്തിപ്പെടുത്തുകയും.
ജനുവരി ആദ്യവാരം നോര്ത്ത് 24 പര്ഗാനാസ് ജില്ലയില് സുന്ദര്ബന് മേഖലയിലെ ബാങ്ക്രയും രണ്ടാം വാരം പൂര്ബ ബര്ദ്ധമാനില് ഔസ്ഗ്രാമിലെ സഖഡംഗ എന്ന ഗോത്ര പ്രദേശവും ഡോ ആനന്ദബോസ് സന്ദര്ശിച്ചു. അഭ്യൂഹങ്ങളും ആശങ്കകളും നിലനില്ക്കുന്ന ഭാരത- നേപ്പാള്, ഭാരത-ഭൂട്ടാന് അതിര്ത്തിമേഖലകളിലായിരുന്നു മാര്ച്ച് ആദ്യവാരത്തിലെ പര്യടനം. ആ സന്ദര്ശനവും കൂടിക്കാഴ്ചകളും വിവരശേഖരണവും ദേശീയതലത്തില് ശ്രദ്ധപിടിച്ചുപറ്റിയിരുന്നു.
ബിഎസ്എഫിന്റെ ഫ്ലോട്ടിംഗ് ബോര്ഡര് ഔട്ട്പോസ്റ്റുകള്, ഭൂട്ടാന് അതിര്ത്തിയില് അലിയ്പുര്ദ്വാര് ജില്ലയിലെ ടോട്ടോപാരാ ആദിവാസി ഗ്രാമം, കിഴക്കന് നേപ്പാളിലേക്കുള്ള പ്രവേശന കവാടമായ പാണിറ്റാങ്കി ഔട്ട്പോസ്റ്റിന് കീഴിലെ പഴയ മേച്ചി പാലം, ചെക്ക്പോസ്റ്റ്, ഗോര്സിംഗ് ബസ്ടി അതിര്ത്തി ഔട്ട്പോസ്റ്റ്, സശസ്ത്ര സീമാ ബലിന്റെ (ടടആ) സിലിഗുരി ഫ്രണ്ടിയര് ബറ്റാലിയന്റെ പ്രവര്ത്തനമേഖല, ഝാഡ്ഗ്രാം ജില്ലയില് ഗോവിന്ദപൂരിലെ ഗോത്രവര്ഗപ്രദേശം എന്നിവ നിരീക്ഷിച്ച ഗവര്ണര് സേനാമേധാവികള്, ഗ്രാമവാസികള്, ജനപ്രതിനിധികള്, വിദ്യാര്ത്ഥികള്, വിവിധ വകുപ്പ് ഉദ്യോഗസ്ഥര് തുടങ്ങിയവരുമായി കൂടിക്കാഴ്ച നടത്തി നിര്ണായക വിവരങ്ങള് ശേഖരിച്ചു.
സിലിഗുരി ഇടനാഴിയില് സശസ്ത്ര സീമാ ബലിന്റെ നേതൃത്വത്തില് നടക്കുന്ന സുരക്ഷാ- ജാഗ്രതാ പ്രവര്ത്തനങ്ങളും ഗവര്ണര് വിലയിരുത്തി.തീവ്രവാദത്തിന്റെയും വിഘടനപ്രവര്ത്തനങ്ങളുടെയും പ്രഭവകേന്ദ്രമായിരുന്ന 'ചിക്കന് നെക്ക്' മേഖലയില് കുറഞ്ഞകാലയളവില് നൂറുകണക്കിനാളുകളെ അതിര്ത്തിസേന പിടികൂടുകയും അതിക്രമങ്ങള് തടയുകയും ചെയ്തിരുന്നു.
അതിര്ത്തി ഗ്രാമസമ്പര്ക്ക പരിപാടികളുടെ പുരോഗതിയും ഫലങ്ങളും നിരീക്ഷിക്കുന്നതിനായി രാജ്ഭവനില് ഒരു 'അമാര് ഗ്രാം ആക്റ്റിവിറ്റീസ് മോണിറ്ററിംഗ് സെല്' സ്ഥാപിച്ചിട്ടുണ്ട്.
https://www.facebook.com/Malayalivartha
