റഷ്യൻ പ്രസിഡന്റ് വ്ലാഡിമിർ പുടിന്റെ ഇന്ത്യ സന്ദർശനത്തോടനുബന്ധിച്ച് ഡൽഹിയിൽ അസാധാരണമായ സുരക്ഷാ ക്രമീകരണങ്ങൾ. ഇന്ത്യൻ ഏജൻസികളും റഷ്യൻ ഫെഡറൽ പ്രൊട്ടക്റ്റീവ് സർവീസ് (എഫ്എസ്ഒ) ഉദ്യോഗസ്ഥരും ചേർന്നാണ് ഈ സുരക്ഷാ സംവിധാനം വിപുലമായി ആസൂത്രണം ചെയ്തത്.റഷ്യൻ പ്രസിഡൻ്റിൻ്റെ സുരക്ഷ ഉറപ്പാക്കാനും ഭീഷണികൾ ഇല്ലാതാക്കാനും അഞ്ച് സുരക്ഷാ വലയങ്ങളാണ് ഒരുക്കിയിരിക്കുന്നത്. പുടിന് ചുറ്റുമുള്ള ഏറ്റവും അടുത്ത സുരക്ഷാ വലയത്തിൽ റഷ്യയുടെ പ്രത്യേക പരിശീലനം ലഭിച്ച സുരക്ഷാ ഉദ്യോഗസ്ഥരാണ് ഉള്ളത്. പുടിനൊപ്പം യാത്ര ചെയ്യുന്ന എഫ്എസ്ഒ ഏജൻ്റുമാരും ഇവരിൽ ഉൾപ്പെടുന്നു. പ്രസിഡന്റിന്റെ വാഹനത്തിനും അദ്ദേഹം താമസിക്കുന്ന ഹോട്ടലായ ഐടിസി മൗര്യയ്ക്ക് ചുറ്റും ഇവരുടെ സാന്നിധ്യം ഉണ്ടാകും. ഹോട്ടൽ ദിവസങ്ങൾക്ക് മുൻപേ സുരക്ഷിതമാക്കിയിരുന്നു.

മൂന്നാമത്തെ സുരക്ഷാ വലയം ഇന്ത്യയുടെ അതിവിദഗ്ദ്ധരായ പ്രത്യേക സേനാ വിഭാഗങ്ങളും ഭീകരവാദ വിരുദ്ധ യൂണിറ്റുകളുമാണ് കൈകാര്യം ചെയ്യുന്നത്. നാഷണൽ സെക്യൂരിറ്റി ഗാർഡ് (എൻഎസ്ജി), പ്രധാനമന്ത്രിയുടെ സുരക്ഷാ ചുമതലയുള്ള സ്പെഷ്യൽ പ്രൊട്ടക്ഷൻ ഗ്രൂപ്പ് (എസ്പിജി) എന്നിവയിലെ അംഗങ്ങളും ഉൾപ്പെടുന്നു. ഇവരുടെ സാന്നിധ്യം പ്രധാന വേദികളിലും സഞ്ചാര വഴികളിലും വേഗത്തിലുള്ള പ്രതികരണത്തിനും നിരീക്ഷണത്തിനും സഹായകമാകും. പ്രധാന സ്ഥലങ്ങൾക്ക് ചുറ്റുമുള്ള കെട്ടിടങ്ങളുടെ മുകളിൽ സ്നൈപ്പർമാരെ വിന്യസിച്ചിട്ടുണ്ട്.

യാത്ര ചെയ്യുന്ന വഴികളിലെ സുരക്ഷയാണ് നാലാമത്തെ വലയം ഉറപ്പാക്കുന്നത്. ഡൽഹി പോലീസിന്റെയും അർധസൈനിക വിഭാഗങ്ങളുടെയും ആയിരക്കണക്കിന് ഉദ്യോഗസ്ഥർ വിമാനത്താവളത്തിൽ നിന്ന് ഹോട്ടലിലേക്കും ഉച്ചകോടി നടക്കുന്ന സ്ഥലങ്ങളിലേക്കുമുള്ള വഴികൾ പൂർണമായി സുരക്ഷിതമാക്കും. പുടിൻ്റെ യാത്രാ വഴികളിൽ കടുത്ത നിയന്ത്രണങ്ങൾ ഏർപ്പെടുത്തിയിട്ടുണ്ട്. യാത്രാവേളകളിൽ ഈ വഴികൾ പൂർണമായും സുരക്ഷിതമാക്കും. ഡ്രോൺ വിരുദ്ധ സാങ്കേതികവിദ്യയും റഡാർ സംവിധാനങ്ങളും ഉപയോഗിച്ച് ഈ മേഖലകളിൽ "നോ-ഫ്ലൈ സോണുകൾ" ഏർപ്പെടുത്തിയിട്ടുണ്ട്. അട്ടിമറി പ്രവർത്തനങ്ങൾ തടയുന്നതിനുള്ള പരിശോധനകളും നടത്തുന്നുണ്ട്.

ഡൽഹി നഗരം മുഴുവൻ നിരീക്ഷിക്കുന്നതും വിവരങ്ങൾ ശേഖരിക്കുന്നതും അഞ്ചാമത്തെയും ഏറ്റവും പുറത്തുള്ളതുമായ സുരക്ഷാ വലയമാണ്. നഗരത്തിലെ പ്രധാന സ്ഥലങ്ങളിലും താമസസ്ഥലങ്ങൾക്ക് സമീപത്തും രഹസ്യാന്വേഷണ ഉദ്യോഗസ്ഥരെയും സാധാരണ വേഷത്തിലുള്ള പോലീസുകാരെയും വിന്യസിച്ചിട്ടുണ്ട്. ഇന്ത്യൻ, റഷ്യൻ ഏജൻസികളിൽ നിന്നുള്ള വിവരങ്ങൾ അനുസരിച്ച് പ്രതിഷേധങ്ങൾ, അനധികൃത സമ്മേളനങ്ങൾ, സംശയാസ്പദമായ പ്രവർത്തനങ്ങൾ എന്നിവയെല്ലാം മുൻകൂട്ടി കണ്ടെത്താനും ഇല്ലാതാക്കാനും ഇവർക്ക് കഴിയും.

ഡിജിറ്റൽ ആശയവിനിമയങ്ങൾ നിരീക്ഷിക്കാനും സന്ദർശനത്തെ തടസ്സപ്പെടുത്താനുള്ള ശ്രമങ്ങൾ തടയാനും സൈബർ സുരക്ഷാ വിദഗ്ദ്ധരും രംഗത്തുണ്ട്. ഈ വിപുലമായ സുരക്ഷാ ക്രമീകരണങ്ങൾ പുടിന്റെ സന്ദർശനത്തിന്റെ രാഷ്ട്രീയവും സുരക്ഷാപരവുമായ പ്രാധാന്യം വ്യക്തമാക്കുന്നു. പ്രതിരോധ, തന്ത്രപരമായ പ്രധാന കരാറുകൾക്ക് ഈ സന്ദർശനം വഴിവെക്കുമെന്നാണ് പ്രതീക്ഷിക്കുന്നത്.