പ്രായപൂര്‍ത്തിയാകാത്ത മാനസിക വെല്ലുവിളി നേരിടുന്ന പെണ്‍കുട്ടിയെ പീഡിപ്പിച്ചെന്ന കേസില്‍ എട്ട് വര്‍ഷമായി ജയിലില്‍ കഴിയുകയായിരുന്നയാളെ മോചിപ്പിച്ച് കോടതി. മുംബൈയിലാണ് സംഭവം നടന്നത്. കുട്ടിയുടെ മൊഴി മറ്റ് തെളിവുകളുമായി ഒത്തുപോകുന്നില്ലെന്ന് കണ്ടാണ് വിചാരണ കോടതി 56കാരനായ പ്രതിയെ വിട്ടയയ്ക്കാന്‍ വിധിച്ചത്.

പ്രതി കുറ്റം ചെയ്തുവെന്ന് സംശായാതീതമായി തെളിയിക്കാന്‍ പ്രോസിക്യൂഷന് സാധിച്ചില്ലെന്നും കോടതി വ്യക്തമാക്കി. 2017 ഓഗസ്റ്റ് 23നാണ് കേസിനാസ്പദമായ സംഭവം നടന്നത്. പെണ്‍കുട്ടിയുടെ അയല്‍വാസിയാണ് പ്രതി. ഇയാള്‍ വീട്ടില്‍ അതിക്രമിച്ചുകയറി പെണ്‍കുട്ടിയെ ലൈംഗികാതിക്രമത്തിന് ഇരയാക്കുകയായിരുന്നുവെന്നും വീട്ടുകാരെ ഭീഷണിപ്പെടുത്തിയെന്നും പരാതിയില്‍ പറയുന്നു.

സംഭവം നടക്കുമ്പോള്‍ കുട്ടിക്ക് 17 വയസായിരുന്നു. അമ്മയുടെ പരാതിയിലാണ് കേസെടുത്തത്. എന്താണ് നടന്നതെന്ന് കുട്ടിക്ക് പറയാന്‍ കഴിയുന്നില്ലെന്നും മെഡിക്കല്‍ രേഖകള്‍ ഉള്‍പ്പെടെയുള്ള വിവരങ്ങള്‍ കുട്ടിയുടെ മൊഴിക്ക് വിരുദ്ധമാണെന്നും കോടതി പറഞ്ഞു. തുടര്‍ന്ന് പ്രതിയെ എത്രയും വേഗം വിട്ടയയ്ക്കാന്‍ ഉത്തരവിടുകയായിരുന്നു.