പോലീസ് റെയ്ഡിനിടെ രക്ഷപ്പെടാന് ശ്രമിച്ച 21കാരിക്ക് നാലാം നിലയില് നിന്ന് വീണ് ഗുരുതര പരിക്ക്
പാര്ട്ടിയില് പങ്കെടുക്കുകയായിരുന്ന യുവതി പോലീസ് റെയ്ഡിനിടെ രക്ഷപ്പെടാന് ശ്രമിക്കുന്നതിനിടെ നാലാം നിലയില് നിന്ന് വീണ് ഗുരുതരമായി പരിക്കേറ്റു. ബംഗളൂരുവിലെ ബ്രൂക്ക്ഫീല്ഡിലുള്ള ഒരു ലോഡ്ജില് സുഹൃത്തുക്കളോടൊപ്പമാണ് യുവതി പാര്ട്ടിയില് പങ്കടുത്തത്. ഗുരുതരാവസ്ഥയിലായ 21കാരിയെ ഉടന് തന്നെ ആശുപത്രിയില് പ്രവേശിപ്പിച്ചു. സംഭവത്തില് യുവതിയുടെ പിതാവിന്റെ പരാതി പ്രകാരം പോലീസ് കേസെടുത്ത് അന്വേഷണം ആരംഭിച്ചു.
കഴിഞ്ഞ ദിവസമാണ് യുവതിയും ഏഴ് സുഹൃത്തുക്കളും ചേര്ന്ന് ബ്രൂക്ക്ഫീല്ഡിലെ സി എസ്റ്റ ലോഡ്ജില് മുറികള് എടുത്തത്. മൂന്ന് മുറികളിലായി ഇവര് ഒരു പാര്ട്ടി സംഘടിപ്പിക്കുകയായിരുന്നു. എന്നാല്, പാര്ട്ടിയുടെ ബഹളം പുലര്ച്ചെയും തുടര്ന്നതോടെ സമീപവാസികള് പോലീസിനെ വിളിച്ചു പരാതി അറിയിച്ചു. ഇതേത്തുടര്ന്നാണ് പോലീസ് സംഘം ലോഡ്ജിലെത്തിയത്. മുറിയിലെത്തിയ പോലീസ് സംഘം യുവാക്കളോട് സംസാരിക്കുകയും ശാസിക്കുകയും ചെയ്തു.
പോലീസിനെ കണ്ടതോടെ പരിഭ്രാന്തയായ യുവതി മുറിയില് നിന്ന് രക്ഷപ്പെടാന് ശ്രമിച്ചു. ബാല്ക്കണിയില് നിന്ന് കെട്ടിടത്തോട് ചേര്ന്ന് സ്ഥാപിച്ചിരുന്ന മാലിന്യം പുറന്തള്ളുന്ന പൈപ്പില് പിടിച്ച് താഴെയിറങ്ങാനായിരുന്നു ശ്രമം. എന്നാല്, ഇതിനിടെ പിടിവിട്ട് യുവതി നാലാം നിലയില് നിന്ന് താഴേക്ക് വീഴുകയായിരുന്നു. ഉടന്തന്നെ ഇവരെ ആശുപത്രിയിലേക്ക് മാറ്റിയെങ്കിലും പരിക്ക് ഗുരുതരമാണ്. യുവതിയുടെ പിതാവിന്റെ പരാതിക്ക് പുറമെ, നിയമലംഘനങ്ങളുടെ പേരില് ലോഡ്ജ് ഉടമയ്ക്കെതിരെയും പോലീസ് കേസെടുത്തിട്ടുണ്ട്.
https://www.facebook.com/Malayalivartha
