കടം വാങ്ങിയ പണം തിരികെ നല്‍കാത്തതിനെച്ചൊല്ലിയുള്ള തര്‍ക്കം അവസാനിച്ചത് 19കാരനെ കുത്തി കൊലപ്പെടുത്താനുള്ള ശ്രമത്തില്‍. ഡല്‍ഹിയിലെ രോഹിണിയിലാണ് സംഭവം. സുഹൃത്തുക്കളായ രണ്ടുപേര്‍ ചേര്‍ന്നാണ് കുത്തിക്കൊല്ലാന്‍ ശ്രമിച്ചത്. സംഭവവുമായി ബന്ധപ്പെട്ട് രത്തന്‍, ശ്യാംവീര്‍ എന്നിവരെ പൊലീസ് അറസ്റ്റ് ചെയ്തു. പത്തൊന്‍പതുകാരനായ കുല്‍ദീപ് പ്രതികളിലൊരാളായ രത്തനില്‍ നിന്ന് 2,000 രൂപ കടം വാങ്ങിയിരുന്നു. ആക്രമണത്തിനിടെ കുല്‍ദീപിനെ രക്ഷിക്കാന്‍ ശ്രമിച്ച ആദിത്യ എന്ന യുവാവിനും പരിക്കേറ്റിട്ടുണ്ട്.

സംഭവത്തെക്കുറിച്ച് പൊലീസ് പറയുന്നത് ഇങ്ങനെ:

പത്തൊന്‍പതുകാരനായ കുല്‍ദീപ് പ്രതികളിലൊരാളായ രത്തനില്‍ നിന്ന് 2,000 രൂപ കടം വാങ്ങിയിരുന്നു. ഈ തുക തിരികെ നല്‍കുന്നതിനെ ചൊല്ലി ഇരുവരും തമ്മില്‍ കഴിഞ്ഞ കുറച്ചുദിവസങ്ങളായി തര്‍ക്കം നിലനിന്നിരുന്നു. സംഭവ ദിവസം തര്‍ക്കം രൂക്ഷമായതോടെയാണ് രത്തനും സുഹൃത്ത് ശ്യാംവീറും ചേര്‍ന്ന് കുല്‍ദീപിനെ ആക്രമിച്ചത്. കയ്യിലുണ്ടായിരുന്ന കത്തി ഉപയോഗിച്ച് പ്രതികള്‍ കുല്‍ദീപിന്റെ കഴുത്തിന് കുത്തുകയായിരുന്നു.

ആക്രമണത്തിനിടെ കുല്‍ദീപിനെ രക്ഷിക്കാന്‍ ശ്രമിച്ച ആദിത്യ എന്ന യുവാവിനും പരിക്കേറ്റിട്ടുണ്ട്. വിവരമറിഞ്ഞ് സ്ഥലത്തെത്തിയ പൊലീസാണ് രക്തത്തില്‍ കുളിച്ചുകിടന്ന കുല്‍ദീപിനെ ഉടന്‍ തന്നെ ആശുപത്രിയില്‍ എത്തിച്ചത്. ഗുരുതരമായി പരിക്കേറ്റ കുല്‍ദീപ് തീവ്രപരിചരണ വിഭാഗത്തില്‍ ചികിത്സയിലാണ്. പ്രതികള്‍ക്കെതിരെ വധശ്രമത്തിന് കേസെടുത്തതായും കൂടുതല്‍ അന്വേഷണം നടന്നുവരികയാണെന്നും ഡല്‍ഹി പൊലീസ് അറിയിച്ചു.