കോടിക്കണക്കിന് ഇന്ത്യന്‍ ജനതകളുടെ പ്രാര്‍ത്ഥന ഫലംകൊണ്ടില്ല. അഭ്യുഹങ്ങള്‍ക്കെല്ലാം വിടചൊല്ലിക്കൊണ്ട് തമിഴ് ജനതയുടെ അമ്മ,ജയലളിത സ്വജീവന്‍ വെടിഞ്ഞു. അന്ത്യം തമിഴ് ചാനലുകള്‍ സ്ഥിരീകരിച്ചു. ശ്വാസകോശത്തിലെ അണുബാധമൂലം ആരോഗ്യനില വളരെ സങ്കീര്‍ണ്ണമായിരുന്നു. ഹൃദയത്തിന്റെയും ശ്വാസ കോശത്തിന്റെയും പ്രവര്‍ത്തനം ശരീരത്തിന്റെ പുറത്ത് നിന്ന് യന്ത്രസഹായത്തോടെയാണ് ഇതുവരെ പ്രവര്‍ത്തിപ്പിച്ചുകൊണ്ടിരുന്നത്. ജയലളിത അന്തരിച്ചതോടെ തമിഴ്‌നാട്ടില്‍ കനത്ത ജാഗ്രതയാണ്. ചെന്നൈ നഗരത്തിലും അപ്പോളോ ആശുപത്രിയുടെ പരിസരത്തും ആയിരക്കണക്കിന് പൊലീസുകാര്‍ നിലയുറപ്പിച്ചു.

തമിഴ്‌നാട് ഡിജിപി യുടെ നേതൃത്വത്തില്‍ ഉന്നത പൊലീസ് ഉദ്യോഗസ്ഥര്‍ സുരക്ഷാ ദൗത്യം ഏകോപിപ്പിക്കുകയാണ്. അടിയന്തിര സാഹചര്യം ഉണ്ടാവുകയാണെങ്കില്‍ കേന്ദ്രസേനയെ ഇറക്കും. ജയലളിതയ്ക്ക് ഹൃദായാഘാതം ഉണ്ടായി എന്ന വാര്‍ത്ത പരന്നതോടെ ഇന്നലെ രാത്രിതന്നെ സംസ്ഥാനത്തെ വിവിധ ഭാഗങ്ങളില്‍ എഐഡിഎം കെ പ്രവര്‍ത്തകര്‍ അപ്പോളോ ആശുപത്രിയിലേക്ക് ഒഴുകി.  

ജയലളിതയുടെ വസതിയായ പോയസ് ഗാര്‍ഡനിലും സെക്രട്ടറിയേറ്റിലും ഡിഎംകെ നേതാവ് എം.കരുണാനിധിയുടെ വസതിയിലും കൂടുതല്‍ പൊലീസുകാരെ നിയോഗിച്ചു. കൂടാതെ കരുണാനിധി അസുഖബാധിതനായി ചികിത്സയില്‍ കഴിയുന്ന ആഴ്വാര്‍പേട്ട് കാവേരി ആശുപത്രിയിലും പൊലീസിനെ വിന്യസിച്ചു.  

അപ്രതീക്ഷിത ഹൃദയസ്തംഭനം കണക്കു കൂട്ടലുകള്‍ തെറ്റിച്ചുവെന്ന് ലണ്ടനില്‍ നിന്നുള്ള ഡോക്ടര്‍ റിച്ചാര്‍ഡ് ബെയ്ല്‍ പറഞ്ഞു.