സിപിഎം ബിജെപി സംഘര്ഷം: കഞ്ചിക്കോട്ട് ഒരാള്ക്ക് വെട്ടേറ്റു, വാഹനങ്ങള്ക്ക് തീയിട്ടു
കഞ്ചിക്കോട്ട് വീണ്ടും സിപിഎം ബിജെപി സംഘര്ഷം. കഴിഞ്ഞ ദിവസം മുക്രോണിയിലുണ്ടായ സിപിഎം ബിജെപി സംഘര്ഷത്തില് മൂന്നു പേര്ക്കു പരുക്കേറ്റതിനു പിന്നാലെയാണ് പ്രദേശത്ത് വീണ്ടും ആക്രമം. മൂന്നു പ്രവര്ത്തകരുടെ വീട് ആക്രമിച്ചെന്നും വാഹനങ്ങള് തീയിട്ടു നശിപ്പിച്ചെന്നും ആര്എസ്എസ്ബിജെപി പ്രവര്ത്തകര് പരാതിപ്പെട്ടു. ബിജെപി പ്രവര്ത്തനായ ഹില്വ്യൂനഗര് സ്വദേശി നന്ദനെ (25) വൈകിട്ട് അഞ്ചരയോടെ ഒരു സംഘം വീടു കയറി ആക്രമിച്ചു. തലയ്ക്കും കൈയ്ക്കും ഗുരുതരമായി വെട്ടേറ്റ നന്ദനെ ജില്ലാ ആശുപത്രിയില് പ്രവേശിപ്പിച്ചു. പുലര്ച്ചെ ബൈക്കിലെത്തിയ ഒരു സംഘം സൂര്യനഗര് കോപ്പന്പുരയില് സതീഷിന്റെ വീട് ആക്രമിച്ചു.
മുറ്റത്ത് നിര്ത്തിയിട്ട കാറും അഞ്ചു ബൈക്കുകളും തീവച്ചു നശിപ്പിച്ചു. ശബ്ദം കേട്ട് പരിസരവാസികള് ഓടിക്കൂടിയെങ്കിലും സംഘം സ്ഥലംവിട്ടു. ഇതിനു പിന്നാലെ മുക്രോണിയില് രാജന്റെ വീടും ആക്രമിക്കപ്പെട്ടു. കിണറ്റിലെ മോട്ടോറും ഒരു ബൈക്കും നശിപ്പിച്ചു. സ്റ്റേഷന് ഓഫിസര് സി.എ. സുരേന്ദ്രന്, ലീഡിങ് ഫയര്മാന് എ. ഗിരി എന്നിവരുടെ നേതൃത്വത്തിലെത്തിയ അഗ്നിശമനസേനയും നാട്ടുകാരും ചേര്ന്നാണു തീയണച്ചത്. സിഐ എ. വിപിന്ദാസ്, വാളയാര് എസ്ഐ ശാന്തകുമാരന് എന്നിവര് സ്ഥലത്തെത്തി.
സംഭവത്തില് ഇരുവിഭാഗങ്ങളിലെയും പ്രവര്ത്തകര്ക്കെതിരെ കേസെടുത്തെന്നും അന്വേഷണം ആരംഭിച്ചെന്നും സിഐ അറിയിച്ചു. കഴിഞ്ഞ ദിവസമുണ്ടായ ആക്രമണത്തില് പരുക്കേറ്റ സിപിഎം പ്രവര്ത്തകനായ അയ്യന്കുളം സ്വദേശി ബിനു, ബിജെപി പ്രവര്ത്തകനായ രാജേഷ് എന്നിവര് തൃശൂര് മെഡിക്കല് കോളജില് ചികിത്സയിലാണ്. ഇവര് ആരോഗ്യസ്ഥിതി വീണ്ടെടുത്തതായി ആശുപത്രി അധികൃതര് അറിയിച്ചു.
സിപിഎം പ്രവര്ത്തകനെ വീടുകയറി ആക്രമിച്ചവരെ ഉടന് അറസ്റ്റ് ചെയ്യണമെന്നാവശ്യപ്പെട്ട് സിപിഎം പ്രതിഷേധയോഗം നടത്തി. ജില്ലാ സെക്രട്ടറി സി.കെ. രാജേന്ദ്രന് ഉദ്ഘാടനം ചെയ്തു. കെ.വി. വിജയദാസ് എംഎല്എ, ഏരിയാ സെക്രട്ടറി സുഭാഷ് ചന്ദ്രബോസ്, നേതാക്കളായ എ. പ്രഭാകരന്, റഷീദ് കണിച്ചേരി, വിജയന്, എസ്.ബി. രാജു, തുടങ്ങിവര് പ്രസംഗിച്ചു. കഞ്ചിക്കോട്ട് ആശുപത്രി പടിക്കല് പ്രതിഷേധ ധര്ണയും നടത്തി.
മേഖലയില് സമാധാനം പുനഃസ്ഥാപിക്കുവാന് അധികൃതര് ഇടപെടണമെന്നു ബിജെപി ആവശ്യപ്പെട്ടു. ആക്രമണം നേരിട്ട പ്രവര്ത്തകരുടെ വീടുകള് സംസ്ഥാന സെക്രട്ടറി സി. കൃഷ്ണകുമാറിന്റെ നേതൃത്വത്തില് സന്ദര്ശിച്ചു. ബിജെപി ജില്ലാ പ്രസിഡന്റ് ഇ. കൃഷ്ണദാസ്, ബിജെപി മണ്ഡലം പ്രസിഡന്റ് ഷണ്മുഖന്, ആര്എസ്എസ് ജില്ലാ കാര്യവാഹ് രാജേന്ദ്രന്, നേതാക്കളായ സി.ബാലചന്ദ്രന്, സുരേഷ്, സി. രവീന്ദ്രന്, ഗിരീഷ് എന്നിവരും ഒപ്പമുണ്ടായിരുന്നു.
https://www.facebook.com/Malayalivartha