തമിഴ്‌നാട് മുഖ്യമന്ത്രിയും എ .ഐ .എ .ഡി.എം. കെ അധ്യക്ഷയുമായി ജെ.ജയലളിത (68) അന്തരിച്ചു. തിങ്കളാഴ്ച്ച രാത്രി 11.30ഓടെയാണ് ജയലളിത ഹൃദയ സ്തംഭനം മൂലം മരണത്തിന് കീഴടങ്ങിയത് . അപ്പോളോ ആസ്പത്രി അധികൃതര്‍ രാത്രി 12.10 ന് പുറത്തു വിട്ട വാര്‍ത്താക്കുറിപ്പിലാണ് ഇക്കാര്യം സ്ഥിരീകരിച്ചത് .

ഏതൊരു സിനിമാക്കഥയേക്കാളും നാടകീയമായൊരു ജീവിതം... അഴിമതിയാരോപണങ്ങളും ജയില്‍വാസവും വരെ. ഒന്നിനു മുന്നിലും തലകുനിക്കാത്ത കണ്ണുനനക്കാത്ത ഒരേ ഒരു ജയലളിത.

ജനങ്ങളെയായിരുന്നു ജയയ്ക്ക് എന്നും വിശ്വാസം. എം.ജി. ആറിന്റെ അന്ത്യകര്‍മങ്ങള്‍ നടക്കുന്നതിനിടെ പോയസ് ഗാര്‍ഡനില്‍ ജയലളിതയ്ക്കുള്ള പിന്തുണ അറിയിക്കാന്‍ ആയിരങ്ങളാണെത്തിയത്. വാസന്തി എഴുതുന്നു ''ആരെയും കാണാനുള്ള മാനസികാവസ്ഥയിലായിരുന്നില്ല ജയലളിത. എന്നാല്‍ പിന്തുണയുമായെത്തിയ അണികളെ കാണാന്‍ അവര്‍ മട്ടുപ്പാവിലെത്തി. അണികളില്‍നിന്ന് ആവേശം പൊട്ടിയൊഴുകി. 'ഭാവിമുഖ്യമന്ത്രി വാഴ്ക'. അവര്‍ വിളിച്ചുപറഞ്ഞു. അന്നാദ്യമായി ജയയില്‍നിന്ന് കണ്ണുനീര്‍ത്തുള്ളികള്‍ ഇറ്റുവീണു. അവര്‍ ജനങ്ങളോട് അപേക്ഷിച്ചു. ''ദയവായി എന്നെ അങ്ങനെ വിശേഷിപ്പിക്കരുത്. രാഷ്ട്രീയം ഉപേക്ഷിക്കാനാണ് ഞാന്‍ ആഗ്രഹിച്ചത്. പക്ഷേ രാഷ്ട്രീയം ഒരിക്കലും അവസാനിപ്പിക്കില്ലെന്ന് എം.ജി.ആര്‍ സത്യം ചെയ്യിച്ചു.'' അവര്‍ അവകാശപ്പെട്ടു.

പിന്നീട് അവരെങ്ങനെയാണ് തമിഴ്‌നാട്ടിലെ സാധാരണക്കാരുടെ അമ്മയായി മാറുന്നത്. ''ഇവിടെ പാവപ്പെട്ടവര്‍ക്ക് എന്തെങ്കിലും കൊടുത്താല്‍ അത് മറക്കില്ല. ജയലളിത ബിലോ ആവറേജ് കാര്‍ഡ് വെച്ചിരിക്കുന്നവര്‍ക്ക് വര്‍ഷം തോറും സമ്മാനം കൊടുക്കും. കഴിഞ്ഞവര്‍ഷം കൊടുത്തത് ഒരു ഫാന്‍, ഒരു മിക്‌സി, ഒരു െ്രെഗന്റര്‍. അതൊക്കെ ആള്‍ക്കാരെ സ്വാധീനിക്കും. അതുകൊണ്ട് സാധാരണക്കാര്‍ അമ്മ എന്നുപറഞ്ഞാല്‍ മരിക്കും.'' മഹാബലിപുരത്തുകണ്ട ഒരാള്‍ സംശയം തീര്‍ത്തു.

റായ്‌പേട്ടിലെ എ.ഐ.എ.ഡി.എം.കെ ഓഫീസിലേക്ക് ഒന്നെത്തിനോക്കി. ജയലളിതയുടെ കൂറ്റന്‍ ചിത്രങ്ങള്‍ പതിച്ച കവാടത്തിനരികില്‍ ആളുകള്‍ ശുഭപ്രതീക്ഷയോടെ കാത്തിരിക്കുന്നു. ഗേറ്റിലുള്ള സെക്യൂരിറ്റി മസ്താന്‍ മനസ്സ് പങ്കുവെച്ചു. ''നല്ല നേതാവാണ് അമ്മ. അതുകൊണ്ടാണ് ആളുകള്‍ക്കിത്ര ബഹുമാനം'' ആന്ധ്ര മുഖ്യമന്ത്രി ചന്ദ്രബാബു നായിഡുവരെ അമ്മയ്ക്കായി ലഡുകൊണ്ടുപോയി പൂജിച്ചത് അയാള്‍ നന്ദിയോടെ ഓര്‍ത്തു. ഓഫീസിന് എതിര്‍വശത്ത് റോഡരികിലെ പെട്ടിക്കട നിറയെ ജയലളിതയുടെ ചിത്രങ്ങള്‍ നിറച്ച് കാത്തിരിക്കുന്നു രാജാത്തി.15 വര്‍ഷമായി അവര്‍ ഈ കടയിലിരുന്ന് അമ്മയുടെ വരവും പോക്കും കാണുന്നുണ്ട്. 'എനിക്കൊരു ജീവിതം തന്നത് അമ്മയാണ്.' രാജാത്തി ഓര്‍മിച്ചു. തെരുവോരത്തിരുന്ന ദുരൈസാമി ചിരിച്ചു. മടിയിലുള്ള കുഞ്ഞുമകള്‍ ലക്ഷ്മി അമ്മയുടെ ചിത്രമെടുത്ത് ചുംബിക്കുന്നു. ആ തെരുവ് നിറയെ ജയയുടെ ഓര്‍മകളാണ്. പിറ്റേന്നും കണ്ടു, ഉണ്ണാതെ ഉറങ്ങാതെ അമ്മയ്ക്കായി കാത്തിരിക്കുന്ന തമിഴ്മക്കളെ. ആരാധനയുടെ തീവ്രവും വൈകാരികവുമായ എന്തെല്ലാം കാഴ്ചകള്‍.