തമിഴകറാണിയായ ജയലളിത
അഗ്നിശുദ്ധി വരുത്തിയ പുരട്ചിതലൈവി ആണ് അവസാനമായി തമിഴകത്തിന്റെ ഭരണമേറ്റെടുത്തിരുന്നത്. അനധികൃത സ്വത്തുസമ്പാദനക്കേസില് ശിക്ഷിക്കപ്പെട്ട ശേഷം കര്ണാടകഹൈക്കോടതിയില്നിന്നു കുറ്റവിമുക്തയാക്കപ്പെട്ട ജയലളിത വീണ്ടും തമിഴ്നാടിന്റെ മുഖ്യമന്ത്രിയായി സത്യപ്രതിജ്ഞ ചെയ്തു.
നിയമസഭാകക്ഷിനേതാവായി ജയലളിതയെ തെരഞ്ഞെടുത്തതിനു തൊട്ടുപിന്നാലെ പാര്ട്ടി ട്രഷറര് ഒ. പനീര്ശെല്വം തമിഴ്നാട് മുഖ്യമന്ത്രിസ്ഥാനം രാജിവച്ചു. പനീര്ശെല്വത്തിന്റെയും മന്ത്രിസഭാംഗങ്ങളുടെയും രാജി സ്വീകരിച്ച ഗവര്ണര് കെ റോസയ്യ ജയലളിതയെ സര്ക്കാര് രൂപവത്കരിക്കാന് ക്ഷണിച്ചതായി രാജ്ഭവന് പ്രസ്താവനയില് അറിയിച്ചു. പുതിയ മന്ത്രിമാരുടെ പട്ടിക നല്കാന് ഗവര്ണര് ജയലളിതയോട് അഭ്യര്ഥിച്ചു. എം.എല്.എമാരുടെ യോഗത്തില് ഒ പനീര്ശെല്വമാണ് നിയമസഭാകക്ഷി നേതാവിനെ തിരഞ്ഞെടുക്കുന്നത് സംബന്ധിച്ച പ്രമേയം അവതരിപ്പിച്ചത്. പ്രമേയം എതിരില്ലാതെ പാസായി. എ.ഡി.എം.കെയിലെ 150 എം.എല്.എമാരില് 144 പേരും നടന് വിജയകാന്തിന്റെ ഡി.എം.ഡി.കെയിലെ അഞ്ചു വിമത എം.എല്.എമാരും യോഗത്തില് പങ്കെടുത്തു. നൂറുകണക്കിനുപാര്ട്ടി പ്രവര്ത്തകര് പാര്ട്ടി ആസ്ഥാനത്തിന് മുന്നിലെത്തിയിരുന്നു.
അനധികൃത സ്വത്ത് സമ്പാദനക്കേസില് ബംഗളൂരുവിലെ പ്രത്യേക കോടതി കുറ്റക്കാരിയായി കണ്ടെത്തിയതിനെത്തുടര്ന്നാണ് ജയലളിതയ്ക്ക് മുഖ്യമന്ത്രിസ്ഥാനം ഒഴിയേണ്ടിവന്നത്. കേസില് കോടതി അവര്ക്ക് നാലുവര്ഷം തടവുശിക്ഷ വിധിച്ചിരുന്നു. ജയലളിത സമര്പ്പിച്ച അപ്പീല് പരിഗണിച്ച കര്ണാടക ഹൈക്കോടതി പിന്നീട് അവരെ കുറ്റവിമുക്തയാക്കി.
https://www.facebook.com/Malayalivartha