ഇരുചക്ര വാഹന അപകടങ്ങള്‍ക്ക് കുപ്രസിദ്ധി നേടിയിരിക്കുന്ന നാടാണ് ഇന്ത്യ. കഴിഞ്ഞവര്‍ഷം ബൈക്ക് അപകടങ്ങളില്‍ 36,800 പേര്‍ മരിക്കുകയും 93,400 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. ഇന്ത്യയില്‍ ബൈക്ക് അപകടങ്ങളാണ് ഏറിയതെന്നും പഠനം വ്യക്തമാക്കുന്നു.

മാത്രമല്ല കാര്‍ അപകടകങ്ങളേക്കാള്‍ 26 ശതമാനം മരണം സംഭവിക്കാനുള്ള സാധ്യതയും ബൈക്ക് അപകടങ്ങള്‍ക്കാണെന്നാണ് ഐക്യരാഷ്ട്ര സഭയുടെ ഹെല്‍മെറ്റ് സ്റ്റഡി വ്യക്തമാക്കുന്നത്. എന്നാല്‍ സുരക്ഷ ഉറപ്പാക്കുന്ന ഹെല്‍മെറ്റുകള്‍ ധരിച്ചാല്‍ മരണസാധ്യത ഗണ്യമായി കുറയ്ക്കാന്‍ സാധിക്കും.

മരണനിരക്ക് 42 ശതമാനത്തോളം കുറയ്ക്കാനും 69 ശതമാനത്തോളം പരിക്കുകള്‍ ഒഴിവാക്കാനും ഹെല്‍മെറ്റ് ധരിക്കുന്നതിലൂടെ സാധിക്കുമെന്ന് പഠനം തെളിയിച്ചുക്കഴിഞ്ഞു.

2008 മുതല്‍ 2020 വരെയുള്ള കാലഘട്ടങ്ങളില്‍ ലോകത്തെമ്പാടും 34 ലക്ഷത്തോളം മരണങ്ങള്‍ സംഭവിച്ചേക്കാമെന്നാണ് കണക്കുകൂട്ടലുകള്‍.

ഈ സാഹചര്യത്തില്‍ ശരിയായിട്ടുള്ള ഹെല്‍മെറ്റ് ധരിക്കുകയാണെങ്കില്‍ 14 ലക്ഷത്തോളം മരണം ഒഴിവാക്കാനാകും എന്ന മുന്നറിയിപ്പാണ് പഠനം നല്‍കുന്നത്.

ഇന്ത്യയിലെ ഭൂരിഭാഗം മധ്യവര്‍ഗക്കാരും പ്രധാനമായും ബൈക്കുകളേയാണ് ആശ്രയിക്കുന്നത്. അതിനാല്‍ ഇതിനെങ്ങനെ കൂടുതല്‍ സുരക്ഷിതമായ യാത്രാമാര്‍ഗമാക്കി മാറ്റാന്‍ സാധിക്കുമെന്നാണ് പഠനം ലക്ഷ്യമിടുന്നത്.

ഉന്നത ഗുണനിലവാരമുള്ളതും അതെസമയം സുരക്ഷാ മാനദണ്ഢങ്ങള്‍ പാലിക്കുന്ന ഹെല്‍മെറ്റ് ഉപയോഗിക്കുകയാണെങ്കില്‍ 90 ശതമാനത്തോളം അപകടങ്ങളിലും മരണം ഒഴിവാക്കാന്‍ സാധിക്കും.