കനത്ത മഴയെത്തുടര്ന്ന് ആന്ഡമാന് ദ്വീപില് 800 വിനോദസഞ്ചാരികള് കുടുങ്ങി: രക്ഷപ്പെടുത്താനുള്ള ശ്രമം തുടരുന്നു
കനത്ത മഴയെത്തുടര്ന്നുള്ള കടല്ക്ഷോഭത്തില് 800 വിനോദസഞ്ചാരികള് ആന്ഡമാന് നിക്കോബാറില് കുടുങ്ങി. വിനോദസഞ്ചാരികളെ അവിടെ നിന്നും മാറ്റാനായി ഇന്ത്യന് നാവികസേനയുടെ സഹായം തേടിയിട്ടുണ്ട്. നാവികസേനയുടെ മൂന്ന് കപ്പലുകള് ആന്ഡമാനിലേക്ക് തിരിച്ചു.
ആന്ഡമാനിലെ ഹാവെലോക് ദ്വീപിലാണ് സഞ്ചാരികള് കുടുങ്ങിയിരിക്കുന്നത്. നാവികസേനയുടെ നേതൃത്വത്തില് ഇവരെ പോര്ട്ട്ബ്ലെയറിലേക്ക് എത്തിക്കുന്നതിനുള്ള ശ്രമം നടക്കുകയാണ്.
ജില്ലാ ഭരണകൂടം വിവരമറിയിച്ചതിനെ തുടര്ന്ന് നാവികസേനയുടെ ഐഎന്എസ് ബിത്ര, ഐഎന്എസ് ബംഗാരം, ഐഎന്എസ് കുംഭിര്, എല്സിയു 38 കപ്പലുകള് ഹാവെലോക്കിലേക്ക് തിരിച്ചു.
നാഡ കൊടുങ്കാറ്റിന്റെ അനന്തരഫലമായാണ് ദ്വീപില് കനത്ത മഴയും കാറ്റുമുണ്ടായത്. കാലാവസ്ഥ പ്രതികൂലമായതിനാല് ആന്ഡമാനില് നിന്നുള്ള വിമാനകപ്പല് ഗതാഗതം തടസ്സപ്പെട്ടിരിക്കുകയാണ്. നിരവധി ഇടങ്ങളില് മൊബൈല്ഇന്റര്നെറ്റ് കണക്ഷന് ലഭ്യമല്ല.
ദ്വീപില് നിന്നും രക്ഷിക്കണമെന്ന് ആവശ്യപ്പെട്ട് ചില ടൂറിസ്റ്റുകള് പ്രധാനമന്ത്രി നരേന്ദ്ര മോഡിയ്ക്ക് ട്വീറ്റ് ചെയ്തിട്ടുണ്ട്. കൊടുങ്കാറ്റ് കാരണം കഴിഞ്ഞ രണ്ട് ദിവസമായി ദ്വീപില് കുടുങ്ങി കിടക്കുകയാണ് ഞാന്. പോര്ട്ട് ബ്ലെയറില് എത്താന് ഞങ്ങളെ സഹായിക്കണമെന്നാണ് ട്വീറ്റുകളുടെ ഉള്ളടക്കം.
അടുത്ത രണ്ടു ദിവസങ്ങള് ശക്തമായ മഴയ്ക്കു സാധ്യതയുള്ളതായി കാലാവസ്ഥ നിരീക്ഷണകേന്ദ്രം മുന്നറിയിപ്പു നല്കിയിട്ടുണ്ട്. ബംഗാള് ഉള്ക്കടലില് രൂപപ്പെടാനിടയുള്ള ന്യൂനമര്ദത്തിന്റെ ഫലമായി ചുഴലിക്കാറ്റ് ഉണ്ടാകുന്നതിനുള്ള സാധ്യതയും കാലാവസ്ഥ വിഭാഗം തള്ളിക്കളയുന്നില്ല. വിശാഖപട്ടണം. ഗോപാല്പുര്, കാര് നിക്കോബാര് തുടങ്ങിയ സ്ഥലങ്ങളില് ചുഴലിക്കാറ്റ് ആഞ്ഞടിക്കുമെന്നാണ് കരുതുന്നത്.
https://www.facebook.com/Malayalivartha
