നോട്ട് മാറാന്‍ ക്യൂവില്‍ നില്‍ക്കുന്നതിനിടെ ബാങ്കില്‍ പ്രസവിച്ച യുവതി തന്റെ കുഞ്ഞിനു പേരിട്ടു കാഷ്യര്‍ എന്ന് അര്‍ത്ഥം വരുന്ന ഖസാഞ്ചിനാഥ് എന്ന പേരാണ് നോട്ട് നിരോധനക്കാലത്ത് ബാങ്കില്‍ പ്രസവിച്ച കുഞ്ഞിന് നല്‍കിയിരിക്കുന്നത്. ഹിന്ദിയില്‍ ഖസാഞ്ചി എന്നാല്‍ നിധി, ട്രഷറി, ധനസൂക്ഷിപ്പു കേന്ദ്രം എന്നെല്ലാം അര്‍ത്ഥമുണ്ട്. ആ അര്‍ത്ഥത്തില്‍ ഖസാഞ്ചിനാഥ് എന്നാല്‍ ഒറ്റവാക്കില്‍ കാഷ്യര്‍ എന്നു വിളിക്കാം. ട്രഷറിയുടെ നാഥന്‍ എന്ന്. സര്‍വേഷ എന്ന യുവതിയാണ് നോട്ട് മാറാന്‍ ക്യൂവില്‍ നില്‍ക്കുന്നതിനിടെ പ്രസവിച്ച കുഞ്ഞിനു കാഷ്യര്‍ എന്നു പേരിട്ടിരിക്കുന്നത്.

നോട്ട് അസാധുവാക്കലിന്റെ വിഷമതകള്‍ അതിജീവിച്ച് ജനിച്ചതിനാലാണ് കുഞ്ഞിന് ഖസാഞ്ചിനാഥ് എന്ന് പേരിട്ടതെന്ന് സര്‍വേഷയുടെ സഹോദരന്‍ അനില്‍ നാഥ് പറഞ്ഞു. ഈ മാസം രണ്ടിനായിരുന്നു സര്‍വേഷ ഉത്തര്‍പ്രദേശിലെ ധേഹത് ജില്ലയിലെ പഞ്ചാബ് നാഷണല്‍ ബാങ്കില്‍ വച്ച് ആണ്‍കുഞ്ഞിന് ജന്മം നല്‍കിയത്. ഭര്‍ത്താവ് അപകടതത്തില്‍ മരിച്ചതിനെ തുടര്‍ന്ന് സര്‍ക്കാര്‍ സര്‍വേഷയ്ക്ക് നഷ്ടപരിഹാരത്തുക അനുവദിച്ചിരുന്നു. ഇതില്‍ നിന്ന് വീട്ടിലെ ആവശ്യത്തിനുള്ള പണം പിന്‍വലിക്കുന്നതിനാണ് ഗര്‍ഭിണിയായിട്ടു പോലും അതെല്ലാം അവഗണിച്ച് സര്‍വേഷ ബാങ്കിലെത്തിയത്. എന്നാല്‍, ആദ്യ ശ്രമത്തില്‍ പണം പിന്‍വലിക്കാന്‍ കഴിഞ്ഞില്ല. അങ്ങനെ രണ്ടാം തവണയും ബാങ്കില്‍ എത്തിയപ്പോഴായിരുന്നു സംഭവം.

രാവിലെ മുതല്‍ വരിയില്‍ നിന്നിരുന്ന സര്‍വേഷയ്ക്ക് ഉച്ചയോടെ പ്രസവവേദന അനുഭവപ്പെട്ടു. ബാങ്ക് അധികൃതര്‍ ആശുപത്രിയില്‍ വിളിച്ച് ആംബുലന്‍സ് അയയ്ക്കാന്‍ ആവശ്യപ്പെട്ടു. എന്നാല്‍ ആംബുലന്‍സ് വരുന്നതിനു മുന്‍പേ വൈകുന്നേരം നാലു മണിയോടെ യുവതി പ്രസവിച്ചു. ബാങ്ക് അധികൃതര്‍ ബാങ്കിനകത്ത് ലേബര്‍ റൂം ഒരുക്കുകയും യുവതിയെ ശുശ്രൂഷിക്കാന്‍ സ്ത്രീകളെ ഏര്‍പ്പാടാക്കുകയും ചെയ്തിരുന്നു. തുടര്‍ന്നാണ് യുവതി ബാങ്കില്‍ പ്രസവിച്ചത്. പിന്നീട് പൊലീസ് ഇടപെട്ട് യുവതിയെ ആശുപത്രിയിലെത്തിക്കുകയും ചെയ്തു.