ക്രെഡിറ്റ്, ഡെബിറ്റ് കാര്ഡുകള് ഉപയോഗിച്ച് 2000 രൂപ വരെയുള്ള സാമ്പത്തിക ഇടപാടുകള്ക്ക് സേവന നികുതി ഒഴിവാക്കി
ക്രെഡിറ്റ്, ഡെബിറ്റ് കാര്ഡുകള് ഉപയോഗിച്ച് 2000 രൂപവരെയുള്ള സാമ്പത്തിക ഇടപാടുകള്ക്ക് കേന്ദ്രസര്ക്കാര് സേവന നികുതി ഒഴിവാക്കി. പണരഹിത ഇടപാടുകള് പ്രോത്സാഹിപ്പിക്കുക ലക്ഷ്യമിട്ടാണ് ഈ തീരുമാനം. നിലവില് കാര്ഡ് ഇടപാടുകള്ക്ക് 15 ശതമാനമാണ് നികുതി. 500, 1000 രൂപ നോട്ടുകള് പിന്വലിച്ച് ഒരു മാസം പിന്നിടുമ്പോഴാണ് സര്ക്കാരിന്റെ പുതിയ തീരുമാനം.
കേന്ദ്രസര്ക്കാരിന്റെ എല്ലാ മന്ത്രാലയങ്ങളും ഇലക്ട്രോണിക് പണമിടപാടിനായി ഊര്ജിതമായി പ്രചാരണം നടത്തുന്നുണ്ട്. യുവജനങ്ങളെ ഉപയോഗിച്ച് ഈ മാസം 12 മുതല് ഒരു മാസത്തേക്കു ഡിജിറ്റല് സമ്പദ്വ്യവസ്ഥയെക്കുറിച്ചു പ്രചാരണം നടത്തണമെന്നാണ് മാനവവിഭവശേഷി മന്ത്രാലയം സര്വകലാശാലകളോടും കോളജുകളോടും നിര്ദേശിച്ചിരിക്കുന്നത്. ഡിജിറ്റല് സമ്പദ്വ്യവസ്ഥ സാധ്യമാക്കാന് യത്നിക്കുമെന്ന പ്രതിജ്ഞയാണ് കോര്പറേറ്റ് കാര്യ മന്ത്രാലയ വെബ്സൈറ്റിന്റെ ആമുഖ പേജില് നല്കിയിട്ടുള്ളത്. പ്രതിജ്ഞ അംഗീകരിക്കുന്നവര്ക്കു മാത്രമേ വെബ്സൈറ്റിന്റെ ഉള്പേജുകളിലേക്കു പ്രവേശനമുള്ളു.
കഴിഞ്ഞ മാസം എട്ടിനു പ്രധാനമന്ത്രി പ്രഖ്യാപിച്ച നടപടി ഒരു മാസം തികയ്ക്കുമ്പോള്, 11.85 ലക്ഷം കോടി രൂപ തിരിച്ചെത്തിയെന്നാണു റിസര്വ് ബാങ്ക് ഗവര്ണര് ഉര്ജിത് പട്ടേല് വ്യക്തമാക്കിയത്. അസാധുവായ നോട്ടുകള് പിന്വലിക്കാന് ഈ മാസം 30 വരെ സമയം ബാക്കിയുണ്ട്.
https://www.facebook.com/Malayalivartha
