മനസ്സില്‍ നന്മ നിറഞ്ഞ അമ്മ അതായിരുന്നു ജയലളിത. വെറും 15 നിമിഷം കൊണ്ടാണ് ഭിക്ഷക്കാരിയായ ഒരു പെണ്‍കുട്ടിയുടെ തലേവര ജയലളിത മാറ്റിവരച്ചത്. അമ്മയുടെ വിയോഗത്തില്‍ വിലപിക്കുമ്പോഴും അമ്മയുടെ കാരുണ്യം ഒന്നുകൊണ്ടു മാത്രമാണ് ഭിക്ഷക്കാരിയായ ഒരു പെണ്‍കുട്ടിയില്‍ നിന്നും അഭിഭാഷകയായി ഉയരാന്‍ അവസരം ലഭിച്ചതെന്ന് നാഗാര്‍ഥന എന്ന യുവതി വെളിപ്പെടുത്തുന്നു. തന്റെ ജീവിതത്തില്‍ വെളിച്ചം പരത്തിയ അമ്മയെ നേരില്‍ക്കണ്ട് നന്ദി പറയാന്‍ അവസരം ലഭിച്ചില്ലെന്നും. അതിനായി നടത്തിയ ശ്രമങ്ങളൊക്കെ വിഫലമായെന്നും സങ്കടത്തോടെ അവള്‍ ഓര്‍ക്കുന്നു.
ഇനിയൊരിക്കലും എനിക്ക് അമ്മയെ കാണാനാവില്ല. ആ കാലുകളില്‍ വീണ് നനന്ദി പറയാനാവില്ല വിതുമ്പലോടെ നാഗാര്‍ഥന പറയുന്നു. ബാഗ്ലൂരിലെ തെരുവുകളില്‍ ഭിക്ഷയാചിക്കുന്ന ഒരു കുടുംബത്തിലെ അംഗമായിരുന്നു നാഗാര്‍ഥന. പഠിക്കാന്‍ മിടുക്കിയായ ഒരു പെണ്‍കുട്ടി തെരുവില്‍ ഭിക്ഷയെടുത്തു ജീവിക്കുകയും ഒപ്പം മികച്ച രീതിയില്‍ വിദ്യാഭ്യാസം നേടുകയും ചെയ്യുന്നു എന്നു കേട്ടറിഞ്ഞപ്പോഴാണ് അവളെ കാണാന്‍ ജയലളിതയ്ക്ക് ആഗ്രഹം തോന്നിയത്.
2001ല്‍ ജയലളിത മുഖ്യമന്ത്രിയായിരുന്ന കാലയളവില്‍ നാഗാര്‍ഥനയെ തമിഴ്‌നാട്ടിലേക്ക് വിളിച്ചുവരുത്തുകയും ഒരുലക്ഷം രൂപയുടെ ചെക്ക് നല്‍കുകയും ചെയ്തു. ഈ തുക ബാങ്കില്‍ ഫിക്‌സഡ് ഡിപ്പോസിറ്റ് ഇടാനും. അതില്‍ നിന്നു ലഭിക്കുന്ന പലിശകൊണ്ട് വിദ്യാഭ്യാസം നേടണം എന്നുമായിരുന്നു ജയയുടെ നിര്‍ദേശം. പഠനാവശ്യത്തിന് ഭാവിയില്‍ കൂടുതല്‍ സാമ്പത്തിക സഹായം വേണമെങ്കില്‍ തന്നോട് ആവശ്യപ്പെടണമെന്നും ജയലളിത നാഗാര്‍ഥയോട് പറഞ്ഞിരുന്നു.
അമ്മയുടെ നിര്‍ദേശം പാലിച്ച ആ പെണ്‍കുട്ടി ആ പണത്തിന്റെ പലിശയുപയോഗിച്ച് പീപ്പിള്‍സ്പാര്‍ക്ക് കോളേജില്‍ ചേരുകയും ശേഷം മൈസൂര്‍മഹാരാജ കോളേജില്‍ നിന്നും എല്‍എല്‍ബി നേടുകയും ശേഷം ഒരു എന്‍ജിഒയില്‍ ജോലിയില്‍ പ്രവേശിക്കുകയും ചെയ്തു.
ഇപ്പോള്‍ ബെംഗലൂരുവിലെ സിവില്‍ കോടതിയില്‍ അഭിഭാഷകയാണ് യുവതി. അഭിഭാഷകയായ ശേഷം നിരവധി തവണ അമ്മയെ കാണാനും നന്ദി അര്‍പ്പിക്കാനും ശ്രമിച്ചെങ്കിലും അവസരം ലഭിച്ചില്ലെന്നാണ് ഈ യുവതി പറയുന്നത്.അന്നു അമ്മ നല്‍കിയ തുക ഇന്നും ബാങ്കില്‍ നിന്നും പിന്‍വലിച്ചിട്ടില്ലെന്നും. തന്റെ മകളും ആ തുകയില്‍ നിന്നു കിട്ടുന്ന പലിശയുപയോഗിച്ചാണ് പഠിക്കുന്നതെന്നും യുവതി വിശദീകരിക്കുന്നു.
വിദ്യാഭ്യാസത്തിന്റെ വില അമ്മയ്ക്കു നന്നായി അറിയാമെന്നും പത്താംക്ലാസില്‍ റാങ്ക് ജേതാവായിരുന്നിട്ടും സാമ്പത്തിക പ്രതിസന്ധിമൂലം പഠനം പാതിവഴിയിലുപേക്ഷിച്ച് സിനിമയില്‍ അഭിനയിക്കേണ്ടി വന്നതിന്റെ ദുഖമാകാം അമ്മയെക്കൊണ്ട് ഇങ്ങനെ നന്മകള്‍ ചെയ്യിക്കുന്നത് എന്നാണ് നാഗാര്‍ഥ പറയുന്നത്.