ജയലളിതയുടെ മണ്ഡലമായ ആര്കെ നഗറില് തോഴി ശശികല മത്സരിച്ചേക്കുമെന്നു അഭ്യൂഹങ്ങള്, പാര്ട്ടിക്കുളളിലും ആര്കെ നഗറിലെ വോട്ടര്മാര്ക്കുമിടയില് രണ്ട് അഭിപ്രായം
ജയലളിതയുടെ മണ്ഡലമായ ആര്കെ നഗറില് ഇനി ആരാകും മല്സരിക്കുക എന്ന് ഉറ്റുനോക്കുകയാണ് തമിഴകം. തോഴി ശശികല മത്സരിച്ചേക്കും എന്ന അഭ്യൂഹം പുറത്തുവരുമ്പോള് പാര്ട്ടിക്കുളളിലും ആര്കെ നഗറിലെ വോട്ടര്മാര്ക്കുമിടയില് രണ്ട് അഭിപ്രായം ഉയരുന്നുണ്ട്.
തലൈവിക്ക് പ്രിയപ്പെട്ടവളാണ് ശശികലയെന്നറിയാം. അതുകൊണ്ടുമാത്രം അവരെ ജനം ഇഷ്ടപ്പെടണമെന്ന് നിര്ബന്ധമില്ല. ആര്കെ നഗറിര് വണ്ണാരപ്പെട്ടേയിലെ പൂക്കാരി അമുദയുടെ അഭിപ്രായമാണിത്. അമ്മയുടെ സന്ദേശവുമായി ആരിറങ്ങിയാലും അവരുടെ ഒപ്പം നില്കുമെന്ന് പേരഴകി പറയുന്നു.
ശശികല മത്സരിച്ചേക്കുമെന്ന അഭ്യൂഹങ്ങള് ഉയരുമ്പോള് ആര്കെ നഗറിലെ വോട്ടര്മാരുടെ ഇടയില് രണ്ട് അഭിപ്രായമുണ്ട്. മണ്ഡലത്തില് മൂന്ന് വര്ഷത്തിനിടെ മൂന്നാമത്തെ തെരഞ്ഞെടുപ്പാണിത്. അനധികൃത സ്വത്ത് സമ്പാദനക്കേസില് ജയലളിതയെ കര്ണാടക ഹൈക്കോടതി കുറ്റവിമുക്തയാക്കിയതോടെ 2015 അവര്ക്ക് മത്സരിക്കാനായി പി വെട്രിവേല് എംഎല്എ സ്ഥാനം രാജിവെച്ചു.
ഒന്നര ലക്ഷം വോട്ടിന്റെ ഭൂരിപക്ഷത്തിലാണ് അന്ന് ജയലളിത വിജയിച്ചത്. 2016ല് ഭുരിപക്ഷം നാല്പതിനായിരത്തിനടുത്തായി ചുരുങ്ങി. അടുത്തവര്ഷം ആദ്യം ഉപതെരഞ്ഞെടുപ്പ് നടക്കുമ്പോള് സഹതാപ വോട്ടുകള് എഐഡിഎംകെയ്ക്ക് അനുകൂലമായിരിക്കും. അതേസമയം 1967ല് മണ്ഡല രൂപീകരണത്തിന് ശേഷം അഞ്ചുതവണ ഇവിടെ ഡിഎംകെ വിജയിച്ചിട്ടുണ്ട്.
https://www.facebook.com/Malayalivartha
