2014ലെ വിജയം ആവര്ത്തിക്കാന് മോഡിക്കായി 'ഭാഗ്യ' കസേര പുറത്തെടുത്ത് യുപി ബിജെപി; റാലി കഴിഞ്ഞാല് വീണ്ടും പൂട്ടിട്ട് പൂട്ടും
ഇത്തവണ ഭാഗ്യക്കസേര ഭാഗ്യം കൊണ്ടുവരുമോ. ഉത്തര്പ്രദേശിലെ കാണ്പൂരില് ഡിസംബര് 19ന് നടക്കാനിരിക്കുന്ന ബിജെപിയുടെ തെരഞ്ഞെടുപ്പ് റാലിയില് പ്രസംഗിക്കാന് എത്തുന്ന പ്രധാനമന്ത്രി നരേന്ദ്ര മോഡിക്ക് ഇരിക്കാന് 'ഭാഗ്യ' കസേര പുറത്തെടുത്ത് സംസ്ഥാന ബിജെപി നേതൃത്വം. 2014ലെ ലോക്സഭാ തെരഞ്ഞെടുപ്പ് പ്രചരണത്തിന് തുടക്കം കുറിച്ചുള്ള ആദ്യ റാലിയില് മോഡി ഇരുന്ന കസേരയാണ് ഇത്. 2013 ഒക്ടോബര് 19ല് നടന്ന ആ റാലിയ്ക്കും വേദിയായത് കാണ്പൂര് തന്നെ. ബിജെപിയുടെ പ്രധാനമന്ത്രി സ്ഥാനാര്ത്ഥി എന്ന നിലയില് ഉത്തര്പ്രദേശിലെ മോഡിയുടെ ആദ്യ തെരഞ്ഞെടുപ്പ് റാലി ആയിരുന്നു അത്. ആ തെരഞ്ഞെടുപ്പില് ബിജെപി 80ല് 71 സീറ്റും തൂത്തുവാരി. അന്നത്തെ വിജയം 2017ലെ നിയമസഭാ തെരഞ്ഞെടുപ്പില് ആവര്ത്തിക്കാന് കസേര സഹായിക്കുമെന്നാണ് പാര്ട്ടി നേതാക്കളുടെ വിശ്വാസം.
മോഡി ഇരുന്ന കസേര മൂന്ന് വര്ഷമായി കാണ്പൂരിലെ പാര്ട്ടി ജില്ലാ ഓഫീസിലെ ഗ്ലാസ് ചേമ്പറിനുള്ളില് പൂട്ടിവെച്ചിരിക്കുകയായിരുന്നു. റാലിക്കിടെ ദാഹമകറ്റാന് മോഡി ഉപയോഗിച്ച ഗ്ലാസ് ടബ്ലര്, മധുരപലഹാരം നല്കിയ പേപ്പര് ബോക്സ് എന്നിവയും ചേമ്പറിനുള്ളില് സൂക്ഷിച്ചുവെച്ചിട്ടുണ്ട്. ദീര്ഘകാലം കസേരെ സൂക്ഷിച്ചുവെക്കാന് തകര്ക്കാന് കഴിയാത്ത ഗ്ലാസ് ചേമ്പര് ഡില്ഹിയില് നിന്നാണ് വരുത്തിയിരുന്നത്. മൂന്ന് അടിയാണ് ചേമ്പറിന്റെ ഉയരം.
ഡിസംബര് 19ന് കാണ്പൂരില് മോഡിയുടെ റാലി പ്രഖ്യാപിച്ച ഉടന് കസേര മിനുക്കാനുള്ള പ്രവര്ത്തനങ്ങള് പാര്ട്ടി പ്രവര്ത്തകര് ആരംഭിച്ചു. ഭാഗ്യ കസേര പുറത്തെടുക്കുന്നതിനെ കുറിച്ച് ബിജെപി കാണ്പൂര് ജില്ലാ പ്രസിഡണ്ട് സുരേന്ദ്ര മൈതാനിയുടെ പ്രതികരണം ഇങ്ങനെ
പ്രധാനമന്ത്രി എന്ന നിലയില് ഇതാദ്യമായാണ് മോഡിജി കാണ്പൂരില് വരുന്നത്. കസേര പാര്ട്ടിക്ക് ഭാഗ്യം കൊണ്ടുവരുമെന്ന് പ്രവര്ത്തകര് കരുതുന്നു. വിജയ് സഖ്നന്ദ് റാലിയില്(2013 ഒക്ടോബര് 19ലെ റാലി) മോഡി ഈ കസേരയില് ഇരുന്നപ്പോള് ലോക്സഭാ തെരഞ്ഞെടുപ്പില് പാര്ട്ടി ഗംഭീര വിജയം നേടി. പരിവര്ത്തന് യാത്രാ റാലിയില് മോഡി വീണ്ടും കസേരയില് ഇരുന്നാല് 2017 തെരഞ്ഞെടുപ്പില് പാര്ട്ടിയ്ക്ക് അനുകൂലമായ തരംഗമുണ്ടാകും. ഭൂരിപക്ഷം സീറ്റുകളില് പാര്ട്ടി വിജയിക്കുകയും ചെയ്യും. കസേര സ്റ്റേജില് വെക്കാന് എസ്പിജിയില് നിന്നോ മറ്റേതെങ്കിലും അധികൃതരില് നിന്നോ അനുമതി തേടേണ്ടതില്ല. പ്രാദേശിക പാര്ട്ടി പ്രവര്ത്തകരാണ് സ്റ്റേജ് ഒരുക്കുന്നത്. റാലി കഴിഞ്ഞാല് പാര്ട്ടി ഓഫീസിലെ ഗ്ലാസ് ചേമ്പറില് കസേര വീണ്ടും പൂട്ടിവെക്കും.
റാലിയില് കുറഞ്ഞത് അഞ്ച് ലക്ഷം പാര്ട്ടി പ്രവര്ത്തകരെ പങ്കെടുപ്പിക്കാനാണ് പാര്ട്ടിയുടെ ശ്രമം. നിര്ലാ നഗറിലെ റെയില്വേ ഗ്രൗണ്ടിലാണ് റാലി സംഘടിപ്പിച്ചിരിക്കുന്നത്. കാണ്പൂരിലെ 14 നിയസഭാ മണ്ഡലങ്ങളില് നിന്നും അടുത്ത ജില്ലകളില് നിന്നുമുള്ള പാര്ട്ടി പ്രവര്ത്തകര് റാലിയില് സംബന്ധിക്കും.
റാലിയുടെ ഒരുക്കങ്ങള്ക്ക് മുന്നോടിയായി ബിജെപി നേതാക്കള് ഗ്രൗണ്ടില് പ്രാര്ത്ഥന നടത്തിയിരുന്നു. മെഡിക്കല് കോളേജുകളിലും ഐഐടി കാണ്പൂര്, എഞ്ചീനിയറിങ്/ബിരുദ കോളേജുകളിലും കോച്ചിങ്ങ് സെന്ററുകളിലും എത്തി യുവാക്കളെ റാലിയിലേക്ക് ക്ഷണിക്കുകയാണ് പാര്ട്ടി പ്രവര്ത്തകര്.
https://www.facebook.com/Malayalivartha
