ജമ്മു കശ്മീര് പോരാട്ടത്തില് രണ്ട് ലഷ്കര് ഭീകരര് കൊല്ലപ്പെട്ടു
ജമ്മു കശ്മീരിലെ അറവാനി വില്ലേജില് സൈന്യവും ലഷ്കര് ഭീകരരും തമ്മില് പോരാട്ടത്തില് രണ്ട് പേര് കൊല്ലപ്പെട്ടു. മൂന്ന് ദിവസം നീണ്ടു നിന്ന പോരാട്ടത്തിനൊടുവിലാണ് രണ്ട് ലഷ്കറെ തൊയ്ബ ഭീകരരെ സൈന്യം വധിച്ചത്.
സൈന്യവും ജമ്മു കശ്മീര് പൊലീസിലെ പ്രത്യേക വിഭാഗവും ചേര്ന്നാണ് അനന്തനാഗ് ജില്ലയിലെ ബിജബെഹറാ നഗരത്തിനടുത്ത് ആക്രമണം നടത്തിയത്. സൈന്യത്തിന്റെ ആക്രമണത്തില് ഒരു സിവിലിയനും കൊല്ലപ്പെട്ടിട്ടുണ്ടെന്ന് വിവരങ്ങളുണ്ട്. നിരവധിപ്പേര്ക്ക് പരിക്കേറ്റു. സുരക്ഷ സംവിധാനങ്ങള് മറികടക്കാനുള്ള ശ്രമത്തിനിടയിലാണ് ഗ്രാമീണര്ക്ക് പരിക്കേറ്റതെന്നാണ് വിവരം.
ബുധനാഴ്ചയാണ് ആക്രമണത്തിന് തുടക്കം കുറിച്ചതെന്ന് ജമ്മു കശ്മീര് പൊലീസ് വക്താവ് പറഞ്ഞു. മുഷ്താക് അഹമദ് ഗാനി എന്നയാളുടെ വീട്ടില് ഭീകരര് ഒളിച്ചിരിക്കുന്നണ്ടെന്ന വിവരത്തെ തുടര്ന്നായിരുന്നു ആക്രമണം. ആക്രമണത്തിന് ശേഷം രണ്ട് ഭീകരരുടെയും മൃതദേഹങ്ങള് കണ്ടെടുത്തു. ഇവരില് നിന്ന് മൂന്ന് എ.കെ 47 തോക്കുകളും പിടിച്ചെടുത്തിട്ടുണ്ട്. പരിശോധനക്കായി ഭീകരരുടെ ഡി.എന്.എ സാമ്പിളുകള് അയക്കുമെന്നും അദ്ദേഹം പറഞ്ഞു. ലഷ്കര് ഭീകരരായ മജീദ് സര്ജര്, റുഹീല് അമീന് ദാര് എന്നിവരാണ് കൊല്ലപ്പെട്ടതെന്ന് സംശയിക്കുന്നതായി സി.ആര്.പി.എഫ് സ്പെഷ്യല് ഡയറക്ടര് ജനറല് ശ്രീവാസ്തവ പറഞ്ഞു.
https://www.facebook.com/Malayalivartha
