അധോലോക ഭീകരന്‍ ദാവൂദ് ഇബ്രഹാമിന്റെ മുംബയിലെ അഞ്ചരക്കോടിയോളം വിലമതിക്കുന്ന വസ്തുവകകള്‍ സര്‍ക്കാര്‍ ലേലം ചെയ്യാന്‍ ഒരുങ്ങുന്നു. നവംബര്‍ 14ന് ലേല തീയതി നിശ്ചയിച്ചു കൊണ്ടുള്ള പത്രക്കുറിപ്പ് കേന്ദ്ര ധനമന്ത്രാലയം പുറത്തിറക്കി.

ഭിണ്ടി ബസാറിലെ ദമര്‍വാല കെട്ടിടമാണ് ഇതില്‍ പ്രമുഖം. ഇവിടെയാണ് തന്റെ ആദ്യകാലങ്ങളില്‍ ദാവൂദ് താവളമാക്കിയിരുന്നത്. ദാവുദിന്റെ അമ്മ ആമിനാ ബിയാണ് 1980ല്‍ അബ്ദുള്‍ ഹുസൈന്‍ ദമര്‍വാല എന്നയാളുടെ കൈയില്‍ നിന്ന് ഈ കെട്ടിടം വാങ്ങിയത്. അടുത്തിടെ പൊലീസ് അറസ്റ്റ് ചെയ്ത ഇക്ബാല്‍ കാസ്‌കര്‍ (ദാവൂദിന്റെ സഹോദരന്‍) ആയിരുന്നു ഇത് കൈവശം വച്ചിരുന്നത്.

ഇതു കൂടാതെ, മുഹമ്മദ് അലി റോഡിലെ ശബ്‌നം ഗസ്റ്റ് ഹൗസ്, മസഗണിലെ പേള്‍ഹാര്‍ബറിലുള്ള ഫ്‌ളാറ്റ്, സയിഫീ ജൂബിലി തെരുവിലെ കെട്ടിടം, ഔറംഗബാദിലുള്ള 600 ചതുരശ്ര മീറ്ററിലെ പുരയിടം എന്നിവയാണ് ലേലത്തിനൊരുങ്ങുന്നത്.
നേരത്തെ നടന്ന ലേലത്തില്‍ മുന്‍ മാദ്ധ്യമപ്രവര്‍ത്തകനായ ബാലകൃഷ്ണന്റെ നേതൃത്ത്വത്തിലുള്ള ദേശ് സേവാ സമിതി 4.28 കോടി രൂപയ്ക്ക് ലേലം പിടിച്ചിരുന്നു. എന്നാല്‍ പ്രാഥമികമായി 30 ലക്ഷം അടച്ചതല്ലാതെ ബാക്കി തുക ഒടുക്കാന്‍ സമിതിക്ക് കഴിഞ്ഞിരുന്നില്ല. തുടര്‍ന്നാണ് ഇത്തവണ വീണ്ടും സര്‍ക്കാര്‍ ലേലത്തിനൊരുങ്ങുന്നത്.