വിവാദ ഇസ്‌ലാമിക പ്രചാരകന്‍ ഡോ.സാക്കിര്‍ നായികിന് എതിരെ കുറ്റപത്രം ഉടന്‍ സമര്‍പ്പിക്കും
ഭീകരവാദ ഗൂഡാലോചന, യുവാക്കളെ ജിഹാദിന് പ്രേരിപ്പിക്കല്‍, നിര്‍ബന്ധ മതമാറ്റം, ഭീകര പ്രവര്‍ത്തനങ്ങള്‍ക്ക് ഫണ്ടിങ് തുടങ്ങിയ കുറ്റങ്ങളാരോപിച്ച് വിവാദ ഇസ്‌ലാമിക പ്രചാരകന്‍ ഡോ. സാക്കിര്‍ നായികിന് എതിരെ ദേശീയ അന്വേഷണ ഏജന്‍സിയുടെ (എന്‍.െഎ.എ) കുറ്റപത്രം. യു.എ.പി.എ നിയമത്തിലെ 10,13, 18 വകുപ്പുകള്‍ ചുമത്താന്‍ കേന്ദ്രം അനുമതി നല്‍കിയതോടെ പ്രത്യേക കോടതിയില്‍ കുറ്റപത്രം സമര്‍പ്പിക്കാന്‍ ഒരുങ്ങുകയാണ് എന്‍.െഎ.എ.
ദിവസങ്ങള്‍ക്കകം കുറ്റപത്രം നല്‍കുമെന്ന് എന്‍.െഎ.എ വൃത്തങ്ങള്‍ പറഞ്ഞു. സാക്കിര്‍ നായിക്കിന് എതിരെ ആരോപിക്കപ്പെട്ട കുറ്റങ്ങളില്‍ വ്യക്തമായ തെളിവുകള്‍ കണ്ടെത്തിയതായി അവകാശപ്പെട്ടു. 2016 നവമ്പറിലാണ് സാക്കിര്‍ നായികിന് എതിരെ എന്‍.െഎ.എ കേസെടുത്തത്. ധാക്ക ഭീകരാക്രമണം നടത്തിയ യുവാവിനെ സ്വാധീനച്ചത് സാക്കിര്‍ നായികാണെന്ന് ബംഗളാദേശ് അവകാശപ്പെട്ടതിന് പിന്നാലെയായിരുന്നു ഇത്. ആ സമയത്ത് വിദേശത്തായിരുന്ന സാക്കിര്‍ നായിക് പിന്നീട് ഇന്ത്യയിലേക്ക് വന്നില്ല. അദ്ദേഹത്തിന്റെ ഇസ്‌ലാമിക് റിസര്‍ച്ച് ഫൗണ്ടേഷനും പീസ് ടിവിയും കേന്ദ്രം നിരോധിച്ചു. സാക്കിര്‍ നായിക്കും ബന്ധുക്കളും ഡയറക്ടര്‍മാരായ നാലോളം കമ്പനികളുടെ സാമ്പത്തിക ഇടപാടിലെ ക്രമക്കേടിന് എതിരെ എന്‍ഫോഴ്‌സ്മന്റെ് ഡയറക്ടറേറ്റും കേസെടുത്തു.
മൂന്ന് തവണ സമന്‍ണ്‍സ് അയച്ചിട്ടും ചോദ്യം ചെയ്യലിന് ഹാജറാകാത്തതിനെ തുടര്‍ന്ന് സാക്കിര്‍ നായികിന്റെ പാസ്‌പോര്‍ട്ട് റദ്ദാക്കുകയും ഇന്റര്‍പോള്‍ നോട്ടീസ് പുറപ്പെടുവിക്കുകയും ചെയ്തു. ആരോപണങ്ങളില്‍ വാസ്തവമില്ലെന്ന് അവകാശപ്പെട്ട സാക്കിര്‍ നായിക് ചോദ്യം ചെയ്യലിന് നേരിട്ട് ഹാജറാകാന്‍ പറ്റിയ സാഹചര്യമല്ല ഇന്ത്യയിലുള്ളതെന്ന് രേഖാമൂലം അറിയിച്ചിരുന്നു.
https://www.facebook.com/Malayalivartha
