നന്മ നിറഞ്ഞവര്‍ക്കിടയില്‍ ജീവിക്കുമ്പോള്‍ ഈ ലോകം എത്ര സുന്ദരം! അമേരിക്കയിലേക്ക് തനിയെ യാത്ര ചെയ്യുകയായിരുന്ന വയോധികയുമായുള്ള ഫോണ്‍ബന്ധം വിമാനത്താവളത്തില്‍ വച്ച് നഷ്ടപ്പെട്ട ഉടനെ മകള്‍ ദുബായ് പൊലീസുമായി ബന്ധപ്പെട്ടു, പിന്നെ...
ജൊഹനാസ്‌ബെര്‍ഗില്‍ താമസിക്കുന്ന ഒരു സ്ത്രീ, തന്റെ അമ്മയുമായുള്ള ടെലിഫോണ്‍ബന്ധം വിമാനത്താവളത്തില്‍ വച്ച് നഷ്ടപ്പെട്ടുവെന്നു പറഞ്ഞ് ദുബായ് പൊലീസിനെ വിളിച്ച് സഹായം അഭ്യര്‍ഥിച്ചു. യുഎസിലേക്കുള്ള വിമാനത്തിലായിരുന്നു ഈ സ്ത്രീ യാത്ര ചെയ്യേണ്ടിയിരുന്നതെന്ന് എയര്‍പോര്‍ട്ട് സെക്യൂരിറ്റിയുടെ ഡയറക്ടറേറ്റ് ജനറല്‍ ഡയറക്ടര്‍ ബ്രി. മുഹമ്മദ് ബിന്‍ ദയാലിന്‍ അല്‍ മസൂറി പിന്നീട് പറഞ്ഞു. വിമാനത്താവളത്തില്‍ കുടുങ്ങിപ്പോയ സ്ത്രീയ്ക്ക് ഇംഗ്ലീഷ് സംസാരിക്കാന്‍ അറിയില്ലെന്നും ഉയര്‍ന്ന രക്ത സമ്മര്‍ദം ഉണ്ടെന്നും ഫോണ്‍ ചെയ്ത മകള്‍ അറിയിച്ചിരുന്നു. കൂടാതെ ഇവരുടെ കൈവശം അധികം പണവും ഉണ്ടായിരുന്നില്ലെന്നും മകള്‍ പറഞ്ഞതായി ബ്രി. മുഹമ്മദ് ബിന്‍ ദയാലിന്‍ അല്‍ മസൂറി വ്യക്തമാക്കി.
ജോഹനാസ്‌ബെര്‍ഗില്‍ നിന്നുള്ള എമിറേറ്റ്‌സ് വിമാനത്തിലാണ് സ്ത്രീ ദുബായില്‍ എത്തിയത്. ഇവിടെ നിന്നും യുഎസിലേക്കുള്ള കണക്ഷന്‍ വിമാനത്തിലാണ് ഇവര്‍ യാത്ര ചെയ്യേണ്ടിയിരുന്നത്. വിവരം ലഭിച്ചയുടന്‍ സുരക്ഷാ ഉദ്യോഗസ്ഥര്‍ വയോധികയ്ക്കായി തിരച്ചില്‍ ആരംഭിച്ചു. ഇവര്‍ ബോര്‍ഡിംഗ് ഗേറ്റില്‍ എത്തിയിട്ടില്ലെന്ന് ആദ്യ പരിശോധനയില്‍ തന്നെ വ്യക്തമായി. തുടര്‍ന്ന് സ്ത്രീയുടെ പാസ്‌പോര്‍ട്ടിലെ ഫോട്ടോ എല്ലാ സുരക്ഷാ ഉദ്യോഗസ്ഥര്‍ക്കും കൈമാറി.
രണ്ടു മണിക്കൂറിനു ശേഷം സ്ത്രീയെ ടെര്‍മിനല്‍ മൂന്നിലെ ഒരു റസ്റ്ററന്റില്‍ കണ്ടെത്തി. തളര്‍ന്ന അവസ്ഥയിലായിരുന്നു ഇവര്‍. ഉടന്‍ തന്നെ വെള്ളവും ഭക്ഷണവും ആവശ്യമായ വൈദ്യസഹായവും നല്‍കിയെന്ന് അധികൃതര്‍ അറിയിച്ചു. പോവാന്‍ ടിക്കറ്റ് എടുത്തിരുന്ന വിമാനം പോയതോടെ സ്ത്രീയുടെ തുടര്‍ യാത്ര അനിശ്ചിതത്വത്തിലായി.
എന്നാല്‍, ഡയറക്ടര്‍ ജനറല്‍ ഓഫ് എയര്‍പോര്‍ട്ട് സെക്യൂരിറ്റി, ദുബായ് എയര്‍പോര്‍ട്ട്, ദുബായ് സിവില്‍ ഏവിയേഷന്‍ അതോറിറ്റി; എമിറേറ്റ്‌സ് എന്നിവര്‍ ചേര്‍ന്ന് സ്ത്രീയ്ക്ക് തുടര്‍യാത്രയ്ക്കുള്ള ടിക്കറ്റ് സൗജന്യമായി നല്‍കി. വിമാനത്താവളത്തില്‍ നിന്നും പോകുന്നത് വരെ ഇവരുടെ ആരോഗ്യസ്ഥിതി കൃത്യമായി പരിശോധിച്ചിരുന്നുവെന്നും അധികൃതര്‍ വ്യക്തമാക്കി. സ്ത്രീയുടെ മകളുമായി സംസാരിക്കാന്‍ വിമാനത്താവള അധികൃതര്‍ സൗകര്യം ചെയ്തു നല്‍കി. തുടര്‍ന്ന്, മറ്റൊരു വിമാനത്തില്‍ യാത്ര ചെയ്യാന്‍ സൗകര്യം ഏര്‍പ്പാടാക്കിയ കാര്യം മകളാണ് ഇവരെ അറിയിച്ചത്.
യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന്റെ കാഴ്ചപ്പാട് യാഥാര്‍ഥ്യമാക്കാനാണ് തങ്ങള്‍ ശ്രമിച്ചതെന്ന് ബ്രി. മുഹമ്മദ് ബിന്‍ ദയാലിന്‍ അല്‍ മസൂറി പറഞ്ഞു. ആളുകള്‍ക്ക് സന്തോഷം നല്‍കൂ എന്നാണ് അദ്ദേഹം പറഞ്ഞത്. അതിനാല്‍ തന്നെ ജനങ്ങള്‍ക്ക് പരമാവധി സൗകര്യങ്ങളും സന്തോഷവും നല്‍കും. എല്ലാ ഉപഭോക്താവിനും തൃപ്തി നല്‍കുന്ന രീതിയില്‍ പ്രവര്‍ത്തിക്കാന്‍ ശ്രമിക്കുമെന്നും അദ്ദേഹം പറഞ്ഞു.
വിമാന അധികൃതര്‍ നല്‍കിയ ദയയ്ക്കും ആതിഥ്യമര്യാദയ്ക്കും അമ്മയും മകളും നന്ദി അറിയിച്ചു. വയോധികയ്ക്ക് ആവശ്യമായ സൗകര്യങ്ങള്‍ നല്‍കുകയും അവരെ പ്രിയപ്പെട്ടവരുടെ അടുത്തേക്ക് സുരക്ഷിതമായി എത്തിക്കുകയും ചെയ്ത സംഘത്തെ എയര്‍പോര്‍ട്ട് സെക്യൂരിറ്റി ജനറല്‍ ഡയറക്ടറേറ്റ്, ഡെപ്യൂട്ടി ഡയറക്ടര്‍ കേണല്‍ ഹമൗദ അഴ് അമേരി അഭിനന്ദിച്ചു.
https://www.facebook.com/Malayalivartha
