ഏകാധ്യാപക വിദ്യാലയത്തിന്റെ എല്ലാമെല്ലാമായ ഉഷ ടീച്ചര് ! കുട്ടികളുടെ അടുക്കല് എത്തുന്നതിന് എല്ലാ ദിവസവും കാട്ടിലൂടെ ഏഴുകിലോമീറ്റര് നടക്കുന്ന ഉഷാകുമാരി, പ്രളയകെടുതിയില്പ്പോലും വിദ്യാര്ഥികളെ മറന്നില്ല!
അമ്പൂരി പഞ്ചായത്തിലെ കുന്നത്തുമല എന്ന ആദിവാസി കോളനിയിലെ ഏകാധ്യാപിക വിദ്യാലയത്തിലെ ഉഷാകുമാരി എന്ന ടീച്ചറെ കുറിച്ച് പറയാന് ആവശ്യപ്പെട്ടാല് അവര് ഇങ്ങനെ പറയും; ഇത് ടീച്ചറമ്മയല്ല, നാങ്കള തൈവമാണ് ..തൈവം. ഇത് ഒരു ആദിവാസിയുടെ മാത്രം വാക്കുകളല്ല. നുറുകണക്കിന് വിദ്യാര്ഥികളുടെ വിചാരങ്ങളാണ് . അക്ഷരങ്ങളിലൂടെ കാണിക്കാരുടെ കണ്ണു തുറപ്പിച്ച ടീച്ചറമ്മയെ അവര് ദൈവത്തിന്റെ രൂപമായി കാണുന്നു.
വള്ളം കയറണം, ഏഴ് കിലോമീറ്റര് കാടും താണ്ടണം. പിന്നെ കാത്തിരിക്കുന്ന കുട്ടികളെ പഠിപ്പിക്കുക മാത്രം ചെയ്താല് പോരാ, അവര്ക്ക് ആഹാരവും പാകം ചെയ്ത് നല്കണം. അതു കഴിഞ്ഞ് മടക്കം. ഏകാധ്യാപക വിദ്യാലയത്തിന്റെ എല്ലാമെല്ലാമായ ഉഷ ടീച്ചര് പ്രളയകെടുതിക്കിടയില്പ്പോലും ഈ പതിവ് തെറ്റിച്ചില്ല. വിദ്യാലയത്തിലേക്കുള്ള ടീച്ചറുടെ യാത്രകള് തീര്ത്തും കഠിനമായിരുന്നു.
ഏകധ്യാപക വിദ്യാലയത്തിലെ നിയമന ഉത്തരവ് കിട്ടുമ്പോള് ഉഷയ്ക്ക് അഭിമാനമായിരുന്നു. എന്നാല് പിന്നീട് കിട്ടിയ അനുഭവങ്ങള് ഇവരെ ശരിക്കും അനുഭവമുള്ള ടീച്ചറാക്കി. രാവിലെ 7-ന് വീട്ടില് നിന്നും ഇറങ്ങി കാരിക്കുഴി നെയ്യാര് കടവിലെത്തണം. അവിടെ നിന്നും വള്ളം കയറി വനത്തില് കയറണം. പിന്നെ യാത്രയാണ്.
വനത്തിലൂടെ ഏതാണ്ട് 7 കിലോമീറ്റര് നടക്കണം. നെയ്യാര് കാട്ടിലെ വന്യജീവികളുടെ സങ്കേതത്തിലൂടെയാണ് പോകേണ്ടത്. മഴയെന്നോ വെയിലെന്നോ ഇല്ലാതെ കാട്ടു മൃഗങ്ങളുടെ കണ്ണില്്പെടാതെ സ്കൂളിലെത്തിയാല് പിന്നെ കുട്ടികള്ക്ക് കഴിക്കാനുള്ള ആഹാരവും ഉണ്ടാക്കുന്ന ചുമതല ഉഷയ്ക്കാണ്. അതു കഴിഞ്ഞാല് വീണ്ടും പഠിപ്പിക്കും.
വൈകിട്ട് മൂന്ന് മണിയ്ക്ക് മടക്കം. കാട്ടിലൂടെ നടന്ന് വള്ളം കയറി വീട്ടിലെത്തുമ്പോള് രാത്രി 6 മണി കഴിയും. ഒരു ദിവസത്തെ ഉഷയുടെ ജീവിതം ഇങ്ങനെയാണ്. കുട്ടികളുടെ സ്റ്റൈപന്റ് വാങ്ങാന് പോകുക, അവര്ക്കുള്ള സൗജന്യ അരി വാങ്ങാന് പോകുക തുടങ്ങി എല്ലാം ഉഷാകുമാരിയുടെ ചുമലിലാണ്.
പലപ്പോഴും സ്കൂളില് തന്നെ താമസിച്ച് പഠിപ്പിക്കേണ്ട അവസ്ഥ വരെ വന്നിട്ടുണ്ട്. അവിടെയും കാട്ടുമൃഗങ്ങളെ ഭയന്നു വേണം കഴിയാന്. ഈ പ്രതികൂല സാഹചര്യത്തിലും അധ്യാപനം ഉപേക്ഷിക്കാന് ഉഷ തയ്യാറായിട്ടില്ല. അത് തുടരുന്നു. ഉന്നതങ്ങളില് എത്തിയ ഒട്ടേറെ കുട്ടികളുണ്ട്. അവരെല്ലാം ടീച്ചറമ്മയെ കാണാന് എത്തും, ഒരു ചര്യ പോലെ!
ഇന്ന് അഞ്ച് കുട്ടികളാണ് പഠിക്കാന് എത്തുന്നത്. പുറം നാട്ടിലെത്തി പഠിക്കാന് കഴിയാത്തവര്ക്ക് വേണ്ടി ചിട്ടപ്പെടുത്തിയ സ്കൂളില് അതൊരു ചര്യയായി ഉഷ എത്തുന്നു. ജീവന് പണയം വച്ചുള്ള യാത്രയാണ് ഉഷ അനുഭവിക്കുന്നത്. കടുത്ത സാമ്പത്തിക വിഷമത്തിലും അത് വക വയ്ക്കാതെ കാട് താണ്ടി പഠിപ്പിക്കാന് പൊയ്ക്കൊണ്ടേയിരിക്കുന്നു ഈ അധ്യാപിക.
https://www.facebook.com/Malayalivartha