ഇന്ന് മമ്മൂട്ടിയുടെ പിറന്നാളാണ്. അടുത്ത പിറന്നാളിന് ഭാഗ്യവും സമയവും തുണച്ചാൽ മമ്മൂട്ടി പാർലെമെന്റംഗമാകും. രാജ്യസഭയിലല്ല ലോകസഭയിൽ. മമ്മൂട്ടിക്ക് പാർലെമെൻറ് സീറ്റ് നൽകാൻ പണ്ടേ സി പി എം തീരുമാനിച്ചതാണ്. പിണറായിയും കോടിയേരിയുമായി അടുത്ത ബന്ധം പുലർത്തുന്ന മമ്മൂട്ടിക്ക് ഒരു സീറ്റ് നൽകാൻ പാർട്ടിക്ക് ഒരു ബുദ്ധിമുട്ടുമില്ല.

എളമരം കരീമിന് നൽകിയ രാജ്യസഭാ സീറ്റ് മമ്മൂട്ടിക്ക് നൽകുമെന്ന് പറഞ്ഞു കേട്ടതാണ്. എന്നാൽ അത് പാർട്ടിക്ക് തന്നെ നൽകിയാൽ മതിയെന്ന് തീരുമാനിക്കുകയായിരുന്നു. അപ്പോഴും പാർലെമെന്റ് സീറ്റ് മമ്മൂട്ടിക്ക് താത്പര്യമുണ്ടെങ്കിൽ നൽകാം എന്ന ചിന്തയിലായിരുന്നു പാർട്ടി. പക്ഷേ എത് സീറ്റ് മമ്മൂട്ടിക്ക് നൽകും എന്നതിലാണ് തർക്കം. എറണാകുളം സീറ്റ് നൽകാനാണ് ഒരു ഘട്ടത്തിൽ സി പി എം ആലോചിച്ചത്. വൈക്കം തലയോലപറമ്പിലെ ചെമ്പ് സ്വദേശിയാണ് മമ്മൂട്ടി. എറണാകുളം സീറ്റ് സി പി എമ്മിന് കരസ്ഥമാക്കാൻ അതിയായ താത്പര്യമുണ്ട്. പ്രൊഫ. കെ വി തോമസിനെ വോട്ടർമാർ ഇനി ജയിപ്പിക്കാനുള്ള സാധ്യത കുറവാണ്. തോമസ് മാഷ് വീണ്ടും മത്സരിക്കുമോ എന്ന കാര്യത്തിലും സംശയമുണ്ട്.

തിരുവനന്തപുരം പോലെയാണ് എറണാകുളവും. ചിന്തിക്കുന്ന വോട്ടർമാരാണ് ഇവിടെയുള്ളത്. എറണാകുളത്ത് ഒരു നല്ല സ്ഥാനാർത്ഥിയെ രംഗത്തിറക്കാൻ സി പി എമ്മിന് അടുത്ത കാലത്ത് കഴിഞ്ഞിട്ടില്ല. സെബാസ്റ്റ്യൻ പോളിന് താത്പര്യവുമില്ല. ഒരു ഭരണഘടനാ സ്ഥാപനത്തിൽ അദ്ദേഹത്തിന് കസേര നൽകാനാണ് സി പി എം തീരുമാനം.

പാർട്ടി, ചാനൽ നടത്താനിറങ്ങിയപ്പോൾ രണ്ടും കൈയും നീട്ടി ചെയർമാൻ സ്ഥാനം ഏറ്റെടുക്കാൻ മമ്മുട്ടി തയ്യാറായി. തന്റെ തിരക്കുകൾ മാറ്റിവച്ച് മമ്മൂട്ടി ചാനലിന്റെ പ്രവർത്തനങ്ങളിൽ സജീവമാണ്. നിരവധി തവണ മമ്മുട്ടിലെ നിയമസഭാംഗമാക്കാനും പാർലെമെന്റംഗമാക്കാനും സി പി എം ആലോചിച്ചിരുന്നു. എന്നാൽ മമ്മൂട്ടിയുടെ തിരക്കുകളും നല്ല സീറ്റ് ഒത്തുവരാത്തതും കാരണമായി.

മമ്മൂട്ടി ഇന്ന് പറവൂരിൽ ഫാൻസ് അസോസിയേഷൻ നിർമ്മിച്ച് നൽകിയ വീട് സന്ദർശിക്കും.തന്റെ പിറന്നാൾ സമ്മാനമായാണ് വീട് നൽകുന്നത്. മോഹൻലാലിന് പിന്നാലെ മമ്മൂട്ടിയും സാമൂഹിക സേവന മേഖലയിൽ സജീവമാകുന്നതിന്റെ തെളിവാണിത്. അത് രാഷ്ട്രീയ പ്രവർത്തനത്തിന്റെ ഭാഗമാണെന്നു വേണം കരുതാൻ. ഇന്നസെന്റിനും മുകേഷിനും സീറ്റ് നൽകിയ പാർട്ടിക്ക് പ്രിയപ്പെട്ട മമ്മൂട്ടിക്ക് ഒരു സീറ്റ് നൽകാൻ ഒരു ബുദ്ധിമുട്ടുമില്ല. നന്നായി വായിക്കുന്നയാളാണ് മമ്മൂട്ടി. മികച്ച ചിന്തകളും മമ്മൂട്ടിക്ക് സ്വന്തം. കാര്യങ്ങൾ നന്നായി നടപ്പിലാക്കുന്നതിനെ കുറിച്ചും അദ്ദേഹത്തിന് വ്യക്തമായറിയാം. ഒരു ഭരണാധികാരിയാകാനുള്ള തലയെടുപ്പും അദ്ദേഹത്തിനുണ്ട്.