മകനെ വിവാഹം ചെയ്യാന്‍ ആഗ്രഹിക്കുന്ന പുരുഷന്മാരുടെ വിവാഹാലോചന ക്ഷണിച്ചുകൊണ്ടുള്ള പരസ്യത്തിന് മികച്ച പ്രതികരണം ഉണ്ടായിട്ടും അതിലൂടെ വന്നവയൊന്നും അവന് ഇഷ്ടമായില്ല; മകന് ഇഷ്ടപ്പെട്ട പുരുഷനെ കണ്ടെത്തട്ടെയെന്ന് പദ്മാ അയ്യര്‍
സ്വവര്‍ഗാനുരാഗിയായ മകന് പങ്കാളിയെ തേടി പരസ്യം നല്‍കിയതിലൂടെ വാര്‍ത്തയില്‍ ഇടം പിടിച്ച പദ്മാ അയ്യര്‍ വീണ്ടും രംഗത്ത്. പരസ്യത്തിലൂടെ എത്തിയ ആലോചനകളൊന്നും മകന് ഇഷ്ടമാകാത്തതിനെ തുടര്‍ന്ന് വിവാഹത്തിന് മകന് പൂര്‍ണ്ണ സ്വാതന്ത്ര്യം നല്‍കുകയാണെന്ന് വെളിപ്പെടുത്തുകയായിരുന്നു അവര്‍.
സ്വവര്‍ഗ്ഗപ്രണയം കുറ്റകരമാക്കി കൊണ്ടുള്ള 377-ാം വകുപ്പിനെതിരേയുള്ള ഇന്നലത്തെ സുപ്രീംകോടതി വിധിയോടെ വിജയിച്ചത് അവരുടെ പോരാട്ടം കൂടിയാണ്. സ്വവര്‍ഗ്ഗ ലൈംഗികത കുറ്റകരമാകുന്നതിനെതിരേയുള്ള പരാതിയില്‍ ഒപ്പിട്ടവരില്‍ ഒരാള്‍ പദ്മ അയ്യരുടെ സ്വവര്‍ഗാനുരാഗിയായ മകന് ഹരീഷ് അയ്യരായിരുന്നു.
സാമൂഹ്യപ്രവര്‍ത്തകയായ പദ്മ അയ്യര്‍ ഹരീഷ് അയ്യര്‍ക്കു വേണ്ടി ജീവിതപങ്കാളിയെ തേടി പരസ്യം നല്‍കിയതിലൂടെയാണ് കൂടുതല്‍ അറിയപ്പെട്ടത്. അന്ന് നല്‍കിയ പരസ്യത്തിന് പ്രതികരണങ്ങള്‍ ഉണ്ടാകാതെ ഇരുന്നില്ല. മകന്റെ വരനാകാന്‍ നിരവധി ആളുകള്‍ ഇ-മെയിലിലൂടെയും മറ്റും താല്‍പര്യം അറിയിച്ച് രംഗത്തെത്തി. എന്നാല്‍ അങ്ങനെയെത്തിയ ആലോചനകളിലൊന്നും മകന് തൃപ്തനായില്ലെന്ന് മാത്രം. എന്നാല്‍ താമസിയാതെ തന്നെ ഒരു ആണ്‍സുഹൃത്തിനെ മകന് കണ്ടെത്തുമെന്നു തന്നെയാണ് പദ്മയുടെ പ്രതീക്ഷ. ഇക്കാര്യത്തില്‍ തീരുമാനം പൂര്‍ണ്ണമായും മകനു വിട്ടുകൊടുത്തു കാത്തിരിക്കുകയാണ്.
സ്വവര്‍ഗാനുരാഗികളുടെ അവകാശസംരക്ഷണത്തിനായി സജീവമായി രംഗത്തിറങ്ങിയ ഈ അമ്മയും മകനും സ്വവര്‍ഗലൈംഗികത ക്രിമിനല്‍ കുറ്റമല്ലെന്ന സുപ്രീംകോടതിവിധി സന്തോഷിപ്പിക്കുന്ന അനേകരില്‍ പെടുന്നവരാണ്. നിയമം എതിരായതിനാല്‍ ആണ്‍സുഹൃത്തിനൊപ്പമോ പെണ്‍സുഹൃത്തിനൊപ്പമോ ജീവിക്കാന്‍ കഴിയാത്ത അനേകരുണ്ട്. മെസഞ്ചറിലൂടെയും വാട്‌സാപ്പിലൂടെയും മറ്റും സംസാരിക്കവെ ഭൂരിഭാഗം കുട്ടികളും സ്വവര്‍ഗാനുരാഗത്തെക്കുറിച്ച് തുറന്നു പറയാന്‍ തങ്ങള്‍ക്ക് ഭയമാണെന്ന് വ്യക്തമാക്കുന്നു. എന്നാല്‍, ഇനി ആ ഭയത്തിന് പ്രസക്തിയില്ലെന്നും ആ കുട്ടികളെക്കുറിച്ച് ഓര്‍ക്കുമ്പോള്‍ സന്തോഷം തോന്നുന്നെന്നും അവര്‍ പറഞ്ഞു.
സ്വവര്‍ഗ്ഗ ലൈംഗികത കുറ്റകരമാകുന്നതിനെതിരേയുള്ള പരാതിയില്‍ ഒപ്പിട്ടവരില്‍ ഒരാള്‍ ഹരീഷായിരുന്നു. സ്വവര്‍ഗ്ഗ പ്രണയികളായ കുട്ടികളെ കൂടി മാതാപിതാക്കള്‍ അംഗീകരിക്കുന്ന രീതിയിലേക്ക് കാര്യങ്ങള്‍ മാറണമെന്നും പദ്മാ അയ്യര്‍ക്ക് അഭിപ്രായമുണ്ട്.
https://www.facebook.com/Malayalivartha
