ഇന്ത്യന് മഹാസമുദ്രത്തിലെത്തി, അഭിലാഷ് ടോമിയുടെ പ്രയാണം
ഗോള്ഡന് ഗ്ലോബ് പ്രയാണത്തില് പങ്കെടുക്കുന്ന കമാന്ഡര് അഭിലാഷ് ടോമിയുടെ പായ്വഞ്ചി 'തുരിയ', അറ്റ്ലാന്റിക് സമുദ്രവും ഇന്ത്യന് മഹാസമുദ്രവും സംഗമിക്കുന്ന ദക്ഷിണാഫ്രിക്കയിലെ പ്രതീക്ഷയുടെ മുനമ്പ് (കേപ് ഓഫ് ഗുഡ് ഹോപ് ) പിന്നിട്ടു.
ഇപ്പോള് അഞ്ചാം സ്ഥാനത്താണ്, ജൂലൈ ഒന്നിനു ഫ്രാന്സിലെ ലെ സാബ്ലെ ദൊലോന് തുറമുഖത്തുനിന്ന് ആരംഭിച്ച പ്രയാണത്തില് അഭിലാഷ്. ഒറ്റയ്ക്ക്, ഒരിടത്തും നിര്ത്താതെ കടലിലൂടെ ലോകം ചുറ്റി തുടങ്ങിയിടത്തു തിരിച്ചെത്തുകയാണു ലക്ഷ്യം. മല്സരത്തില് പങ്കെടുക്കുന്ന 18 പായ്വഞ്ചികളില്, ഫ്രാന്സില്നിന്നുള്ള വെറ്ററന് നാവികന് ജീന് ലുക് വാന് ഡെന് ഹീഡാണ് ഒന്നാമത്. 50 വര്ഷം മുന്പത്തെ കടല് പര്യവേക്ഷണ സമ്പ്രദായങ്ങള് മാത്രം ഉപയോഗിച്ചു സംഘടിപ്പിക്കുന്ന പ്രയാണത്തില്, ഏഴുപേര് ഇടയ്ക്കു പിന്മാറിയതോടെ അഭിലാഷ് ഉള്പ്പെടെ 11 പേരാണു മല്സരരംഗത്തു ബാക്കി.
അതിനിടെ, ഗോള്ഡന് ഗ്ലോബ് റേസിലെ വേഗറെക്കോര്ഡ് അഭിലാഷ് സ്വന്തമാക്കി. ബുധനാഴ്ച 24 മണിക്കൂറിനിടെ 194 മൈല് ദൂരമാണു വഞ്ചി പിന്നിട്ടത്. ഇത്രയും വേഗം കൈവരിക്കുന്ന ആദ്യ നാവികനാണ് അഭിലാഷ്. പ്രയാണം ആരംഭിച്ച് 68-ാം ദിവസമായിരുന്ന ഇന്നലെ വരെ ആകെ 8897 നോട്ടിക്കല് മൈല് (ഒരു നോട്ടിക്കല് മൈല് 1.852 കിലോമീറ്റര്) ദൂരമാണു 'തുരിയ' പിന്നിട്ടത്. 30,000 നോട്ടിക്കല് മൈല് ദൂരം പ്രതീക്ഷിക്കുന്ന പ്രയാണം 311 ദിവസം കൊണ്ടു പൂര്ത്തിയാക്കാനാണു മുപ്പത്തിയൊന്പതുകാരനായ അഭിലാഷ് ലക്ഷ്യമിടുന്നത്.
കനത്ത ഒഴുക്കിനും അപകടകരമായ തിരമാലകള്ക്കും കുപ്രസിദ്ധമായ കേപ് ഓഫ് ഗുഡ് ഹോപ് പിന്നിട്ട അഭിലാഷ്, പായ്വഞ്ചിക്ക് ഇടയ്ക്കുണ്ടായ ചെറിയ തകരാര് പരിഹരിച്ചുവരുന്നതായി സംഘാടകരെ റേഡിയോ മുഖാന്തരം അറിയിച്ചിട്ടുണ്ട്. ഭക്ഷണമായി കരുതിയിരുന്ന പോപ് കോണ് തീരുകയാണെന്നും വഞ്ചിയില് പരിമിതമായി സൂക്ഷിച്ചിട്ടുള്ള മറ്റു ഭക്ഷണവസ്തുക്കള് ഉപയോഗിച്ചുതുടങ്ങാതെ മാര്ഗമില്ലെന്നുമാണ് സന്ദേശം.
പ്രയാണത്തില് പങ്കെടുക്കുന്നവര് പുറംലോകവുമായി നേരിട്ട് ആശയവിനിമയം പാടില്ലെന്നാണു മല്സരത്തിന്റെ നിയമം. റേഡിയോ മുഖാന്തരം സംഘാടകര് ബന്ധപ്പെടുമ്പോള് മാത്രമാണു വിവരങ്ങള് കൈമാറാന് കഴിയുക. ഒറ്റയ്ക്കൊരു പായ്വഞ്ചിയില് കടലിലൂടെ ഒരിടത്തും നിര്ത്താതെ ലോകം ചുറ്റിവന്ന ആദ്യ ഇന്ത്യക്കാരനെന്ന റെക്കോര്ഡിന് ഉടമയാണു കൊച്ചി കണ്ടനാടു സ്വദേശിയായ അഭിലാഷ് ടോമി.
കേരളത്തില്നിന്നുള്ള തടിയും വിദേശനിര്മിത പായകളും ഉപയോഗിച്ചു ഗോവയിലെ അക്വാറിസ് ഷിപ്യാഡിലാണു തുരിയ 'പായ്വഞ്ചി' നിര്മിച്ചത്. ഉപനിഷത്തില്നിന്നാണു 'തുരിയ' എന്ന പേരു കണ്ടെത്തിയത്. ജാഗ്രത്, സ്വപ്നം, സുഷുപ്തി എന്നിവ കഴിഞ്ഞുള്ള നാലാമത്തെ അവസ്ഥയാണു തുരീയം. മുനിമാരുടെ ബോധതലം ഞാനെന്ന ഭാവം ഉപേക്ഷിക്കപ്പെട്ടു സമ്പൂര്ണ സമത കൈവരുന്ന അവസ്ഥയെന്നാണു 'തുരിയ' അര്ഥമാക്കുന്നത്.
https://www.facebook.com/Malayalivartha