എല്‍വിസ് പ്രെസ്ലിയുടെ വിമാനങ്ങള്‍ വില്‍പ്പനയ്ക്ക്
അമേരിക്കന്‍ ലേല കമ്പനിയായ ജൂലിയാന ഓക്ഷന്‍സ് റോക്ക് സംഗീതത്തിന്റെ രാജാവ് എന്നറിയപ്പെടുന്ന അമേരിക്കന്‍ ഗായകന്‍ എല്‍വിസ് പ്രെസ്ലിയുടെ വിമാനങ്ങള്‍ ലേലത്തില്‍ വെച്ചിരിക്കുന്നു. ദ ലിസ മേരി, ഹണ്ട് ഡോഗ് 2 എന്നിങ്ങനെ പേരുകളുള്ള വിമാനങ്ങളാണ് ലേലത്തില്‍ വെച്ചിരിക്കുന്നത്.
1960 ലെ കണ്‍വെയര്‍ 880 നാണ് പ്രെസ്ലിയുടെ ഏകമകളായ ലിസ മേരിയുടെ പേരിട്ടിരിക്കുന്നത്. നാല് എഞ്ചിനുള്ള ഈ വിമാനത്തില്‍ പ്രൈവറ്റ് ബഡ്‌റൂം, സ്റ്റീരിയോ സിസ്റ്റം, സ്വര്‍ണ്ണം പൂശിയ ബാത്ത്‌റൂം എന്നിവയുണ്ട്. ലിസ മേരി, പ്രെസ്ലിയുടെ മൃതശരീരവുമായി 1977 ലാണ് അവസാനമായി പറന്നത്.
എല്‍വിസ് പ്രെസ്ലിയുടെ മരണ ശേഷം കെ ജി കുക്കര്‍ കരസ്ഥമാക്കിയ ഈ വിമാനം മെംഫിസിലുള്ള എല്‍വിസ് പ്രെസ്‌ലി മ്യൂസിയത്തില്‍ പ്രദര്‍ശനത്തിനു വെച്ചിരിക്കുകയായിരുന്നു. പ്രെസ്‌ലി മുമ്പ് ഉപയോഗിച്ചിരുന്ന 1963 മോഡല്‍ റോള്‍സ് റോയ്‌സ് ഫാന്റം വി ടൂറിങ് എന്ന ലക്ഷ്വറി കാറും ഒരു കമ്പനി ലേലത്തില്‍ വെച്ചിരുന്നു.
14 തവണ ഗ്രാമി പുരസ്‌കാരത്തിന് നാമനിര്‍ദ്ദേശം ചെയ്യപ്പെടുകയും മൂന്നു തവണ ഗ്രാമി ലഭിക്കുകയും ചെയ്തിട്ടുള്ള പ്രെസ്‌ലി അമേരിക്കന്‍ റോക്ക് സംഗീതത്തെ ഏറെ സ്വാധീനിച്ചിട്ടുള്ള സംഗീതജ്ഞനും നടനുമാണ് . ഗാനങ്ങളുടെ വില്‍പനയുടെ കാര്യത്തിലും ടെലിവിഷന്‍ പരിപാടികളുടെ റേറ്റിങ്ങുകളുടെ കാര്യത്തിലുമെല്ലാം ജീവിതത്തിലുടനീളം റെക്കോര്‍ഡുകള്‍ സൃഷ്ടിച്ച പ്രെസ്ലിയുടെ പാട്ടുകളുടെ നൂറു കോടി കോപ്പികള്‍ ലോകത്താകെമാനം വിറ്റുപോയിട്ടുണ്ട്. മുപ്പത്തിയാറാം വയസ്സില്‍ തന്നെ ആജീവനാന്ത സംഭാവനകള്‍ക്കുള്ള ഗ്രാമി പുരസ്‌കാരം നേടിയ എല്‍വിസ് ആരോണ്‍ പ്രെസ്‌ലിയെ ഇരുപതാം നൂറ്റാണ്ടിലെ സാംസ്‌കാരിക വ്യക്തിത്വങ്ങളില്‍ പ്രധാനിയായി കണക്കാക്കുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
https://www.facebook.com/Malayalivartha
