ചാലക്കുടിക്കടുത്ത് കൊന്നക്കുഴിയില്‍ മരത്തില്‍ നിന്നും തൂങ്ങിക്കിടക്കുന്ന നിലയില്‍ ഒരു പുലിയുടെ ജഡം കാണപ്പെട്ടു. കരിപ്പായി റൈജുവിന്റെ റബര്‍തോട്ടത്തിലുള്ള മഹാഗണിമരത്തിന്റെ മുകളിലാണ് ജഡം കണ്ടത്.

ഇന്നലെ ഉച്ചയോടെ റബര്‍ പാല്‍ ശേഖരിക്കാന്‍ ചെന്ന വീട്ടുടമസ്ഥയാണ് വിവരം ആദ്യം അറിഞ്ഞത്. പുലിയുടെ ശരീരത്തിലുള്ള കമ്പി മരത്തില്‍ ഉടക്കി തൂങ്ങിക്കിടക്കുന്നതാണു കണ്ടത്. പുലി എവിടെയോ കെണിയില്‍ വീണതായിരിക്കാമെന്നും കെണി തകര്‍ത്തു രക്ഷപ്പെട്ടു മരത്തില്‍ കയറിയപ്പോഴും ശരീരത്തില്‍ കുടുങ്ങിക്കിടന്നിരുന്ന കെണിയുടെ കമ്പിവളയം മരക്കൊമ്പില്‍ ഉടക്കിയതായിരിക്കാനാണ് സാദ്ധ്യത എന്നു കരുതപ്പെടുന്നു. വനംവകുപ്പ് അധികൃതര്‍ സ്ഥലത്തെത്തി അന്വേഷണം നടത്തി.

മൂന്നു വയസോളം പ്രായമുള്ള ആണ്‍പുലിയുടേതാണു ജഡം. ചാലക്കുടി ഡിഎഫ്ഒ സ്ഥലത്ത് ഇല്ലാത്തതിനാല്‍ പുലിയുടെ ജഡം വൈകുന്നേരം ആറോടെയാണു താഴെയിറക്കിയത്. പോസ്റ്റ്‌മോര്‍ട്ടം നടത്തിയശേഷമേ സംസ്‌കരിക്കുകയുള്ളൂ. വിവരമറിഞ്ഞു പരിയാരം പഞ്ചായത്ത് പ്രസിഡന്റ് പ്രിയ വിനയനും പഞ്ചായത്ത് അംഗങ്ങളും സ്ഥലത്തെത്തിയിരുന്നു.

ഏറെനാളായി കൊന്നക്കുഴി മലയോര ഗ്രാമം പുലിഭീതിയിലാണ്. പല വീടുകളുടെ പരിസരത്തും പുലിയുടെ കാല്‍പ്പാദങ്ങളുടെ അടയാളങ്ങള്‍ കാണുക പതിവാണ്. നേരത്തെ പല സ്ഥലങ്ങളിലും വനംവകുപ്പ് പുലിയെ പിടിക്കാന്‍ കൂടുകള്‍ സ്ഥാപിച്ചിരുന്നുവെങ്കിലും ഫലം കണ്ടിരുന്നില്ല. ഇപ്പോള്‍ പുലിയുടെ ജഡം കണ്ടതോടെ കൊന്നക്കുഴിയില്‍ പുലിയുടെ സാന്നിധ്യമുണ്ടെന്ന് ഉറപ്പായി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha