വിവാഹം എത്ര പവിത്രമാണ്. വിവാഹം സ്വര്‍ഗത്തില്‍ നടക്കുന്നു ഭൂമിയില്‍ കണ്ടെത്തുന്നു എന്നു എന്ന് മാത്രം. ഒരാള്‍ ജനിക്കുമ്പോള്‍ തന്നെ അയാള്‍ക്ക് പറ്റിയൊരാളെയും ദൈവം നിശ്ചയിച്ചിട്ടുണ്ട്. ആ പറ്റിയ ഒരാളെ പ്രേമത്തിലൂടെയോ ഫേസ്ബുക്കിലൂടെയേ മിസ് കോളിലൂടെയോ കോളേജിലൂടെയോ വായ്‌നോട്ടത്തിലൂടെയോ ശല്യപ്പെടുത്തലിലൂടെയോ കുടുംബക്കാരിലൂടെയോ ബ്രോക്കറിലൂടെയോ കണ്ടെത്തുന്നുവെന്ന് മാത്രം. വിവാഹത്തിനും വീടു വയ്ക്കലിനും ഒരു സമയമുണ്ടെന്ന് കാരണവന്‍മാര്‍ പറയുന്നത് വെറുതേയല്ല. നമ്മള്‍ എത്ര കിടന്ന് ചാടിയാലും എത്ര കൊടി കെട്ടിയ പ്രണയമാണെങ്കിലും നടക്കില്ല. ആരെങ്കിലുമൊക്കെ വില്ലനായി ഉണ്ടാകും. ഒന്നുമില്ലെങ്കില്‍ ചൊവ്വാദോഷത്തിന്റേയോ സ്ത്രീധനത്തിന്റേയോ പേരിലും വരാം. എത്ര സുന്ദരനായാലും എത്ര സുന്ദരിയായാലും ആവശ്യത്തിന് പണവും പണ്ടവും എല്ലാം ഉണ്ടെങ്കിലും ഇപ്പം വിവാഹം കഴിക്കണമെന്ന് വിചാരിച്ചിട്ടും ഒന്നും നടക്കാത്ത എത്രയോ യുവതീ യുവാക്കളുണ്ട്. ഒന്നുമില്ലാതിരുന്നിട്ടും ഇപ്പോഴൊന്നും നടക്കില്ലെന്ന് വിചാരിച്ചും നടക്കുന്നില്ലേ. ഈ ജന്മത്തില്‍ കല്യാണമേ വേണ്ടെന്ന് പറഞ്ഞിരുന്നവര്‍ ഒരു സുപ്രഭാതത്തില്‍ കല്യാണം വിളിക്കുന്നത് കണ്ട് പലപ്പോഴും ഞെട്ടാറില്ലേ. അതാണ് ദൈവത്തിന്റെ കളി. തലയിലെഴുത്തുണ്ടെങ്കില്‍ ഒന്നും വേണ്ട കല്യാണം താനെ നടന്നോളും. എല്ലാത്തിനും അതിന്റേതായ സമയുമുണ്ടെന്ന് മോഹന്‍ലാല്‍ പറയുന്നത് വെറുതേയല്ല.

കല്യാണം എപ്പോഴും തങ്ങളുടെ പ്രതാപം കാണിക്കാറുള്ള വേദിയായി മാറുന്ന കാഴ്ചയാണ് പണ്ടും ഇന്നുമുള്ളത്. വട്ടിപ്പലിശയ്ക്ക് കടമെടുത്തും വീട് പണയം വച്ചും എങ്ങനേയും പൊന്നുമോളെ ഇറക്കിവിടാനാണ് എല്ലാ വീട്ടുകാരുടേയും മോഹം. എന്നാല്‍ കല്യാണത്തിന് കിട്ടുന്ന സന്തോഷമൊന്നും കടക്കാര്‍ വീട്ടുപടിക്കല്‍ തലചൊറിഞ്ഞ് നില്‍ക്കുമ്പോള്‍ കിട്ടില്ല. അവസാനം കെട്ടിച്ചുവിട്ട പെണ്ണ് തന്നെ തന്തയുടേയും തള്ളയുടേം മുഖത്ത് നോക്കി നാല് വര്‍ത്തമാനം പറയുമ്പോള്‍ എല്ലാം തൃപ്തിയാകും.

നമ്മള്‍ പറഞ്ഞ് വന്നത് കല്യാണക്കാര്യമാണ്. ഇങ്ങനെ മനോഹരമായി നടക്കുന്ന ആചാരത്തില്‍ പലപ്പോഴും രസകരമായ മുഹൂര്‍ത്തങ്ങളും ഉണ്ടാകാറുണ്ട്. അതിന് എല്ലാ ഒരുക്കങ്ങളും നടത്തുന്നതാകട്ടെ യുവ തലമുറയും. വരന്റേയും വധുവിന്റേയും സുഹൃത്തുക്കളോ സമപ്രായക്കാരോ ആയിരിക്കും ഇതിന് പിന്നില്‍. പടക്കം പൊട്ടിക്കലും ഫ്‌ളക്‌സ് വയ്ക്കലും ആദ്യ രാത്രിയിലെ സസ്‌പെന്‍സ് ഗിഫ്റ്റും എല്ലാം ഫഴങ്കഥയായി. വിവാഹവീടുകളില്‍ മാലയിടുമ്പോള്‍ ബഹളമുണ്ടാക്കുക, അശ്ലീല കമന്റുകള്‍ പറയുക, പടക്കംപൊട്ടിക്കുക എന്നിവ ഇപ്പോള്‍ കൂടിവരികയാണ്. ഇത് സംഘര്‍ഷത്തിലേക്കും മറ്റും നയിക്കാറുണ്ട്. ഇപ്പോള്‍ മലപ്പുറം കൊയിലാണ്ടിയിലാണ് രസകമായ സംഭവം നടന്നത്. അവസാനം അത് പൊല്ലാപ്പായി മാറുകയും ചെയ്തു. വിവാഹവീട്ടില്‍ സുഹൃത്തുക്കളുടെ റാഗിംഗ് അതിരുവിട്ടപ്പോള്‍ വധുവും വരനും ആശുപത്രിയിലായെന്ന വാര്‍ത്തയാണ് വരുന്നത്.

കൊയിലാണ്ടിയിലെ ഉള്‍പ്രദേശത്ത് നടന്ന വിവാഹത്തിനിടയില്‍ വരനെയും വധുവിനെയും കാന്താരിമുളക് അരച്ചുകലക്കിയ വെള്ളം നിര്‍ബന്ധിച്ച് കുടിപ്പിച്ചതാണ് വിനയായത്. വിവാഹശേഷം ഭക്ഷണം കഴിക്കുന്നതിന് മുന്നോടിയായിട്ടാണ് ഇരുവരെയും വരന്റെ സുഹൃത്തുകള്‍ നിര്‍ബന്ധിപ്പിച്ച് കാന്താരി കുത്തിപ്പിഴിഞ്ഞ വെള്ളം കുടിപ്പിച്ചത്. സംഭവം ഒരു തമാശയ്ക്ക് ചെയ്തതാണ്. കാരണവന്‍മാര്‍ ഉള്‍പ്പെടെ ആസ്വദിച്ചു ചിരിച്ചു. അവസാനം ശാരീരിക അസ്വസ്ഥത പ്രകടിപ്പിച്ചതോടെ കാരണവരുടെ മട്ട് മാറി. ഇരുവരെയും വിവാഹവേഷത്തില്‍ത്തന്നെ കൊയിലാണ്ടി താലൂക്കാശുപത്രിയില്‍ എത്തിച്ചു. ഇതോടെ കാന്താരി വെള്ളം കലക്കിയവരും കൊടുത്തവരും അങ്കലാപ്പിലായി.

സംഭവമറിഞ്ഞ് കൊയിലാണ്ടി പോലീസ് ആശുപത്രിയിലെത്തി ഇരുവരുടെയും മൊഴിയെടുത്തു. ഇതോടെ വെള്ളം കുടിപ്പിച്ചവര്‍ നെട്ടോട്ടമായി വെള്ളം കുടിച്ചു. ഇതിനിടെ അമ്മയെ തല്ലിയാലും രണ്ടുപക്ഷമെന്ന പേരില്‍ ബന്ധുക്കള്‍ പക്ഷം പിടിച്ചു. തര്‍ക്കമായി. അവസാനം വധുവിനും വരനും പരാതിയില്ലെന്ന് എഴുതിക്കൊടുത്തതോടെ എല്ലാം ശുഭം. വരനും വധുവും അത് തമാശയായി തന്നെ എടുത്തതോടെ നാട്ടുകാര്‍ക്കും പത്രക്കാര്‍ക്കും പറഞ്ഞ് ചിരിക്കാന്‍ ഒരു വിഷയമായി. കാന്താരി മുളക് പ്രയോഗം.