പോപ്പ് ഗായിക മഡോണയെപ്പോലെയാകാന് ആണൊരുത്തന് മുടക്കിയത് 47 ലക്ഷം രൂപ
ലോകമെമ്പാടും ആരാധകരുളള പോപ്പ് ഗായിക മഡോണയെ ഇഷ്ടപ്പെടാത്തവരായി ആരുമില്ല. മഡോണയുടെ പാട്ടിനെ ഇഷ്ടപ്പെടുന്നവരേക്കാള് കൂടുതല് ആരാധകര് അവരുടെ സൗന്ദര്യാസ്വാദകരാണെന്നു എന്നതാണ് സത്യം. മുന് ഹോളിവുഡ് നടി മര്ലിന് മണ്റോയുമായി രൂപസാദൃശ്യമുള്ള മഡോണയും ഒരു സെക്സ് സിംബലാണ് പലര്ക്കും. അവരെപ്പോലെ സുന്ദരിയും, പ്രശസ്തയും ധനികയുമാകാന് ആഗ്രഹിക്കുന്ന നിരവധി സ്ത്രീകളുണ്ട് എന്നതാണ് യാഥാര്ത്ഥ്യം.
അമേരിക്കയില് സ്റ്റേജ് ഷോ സംഘടിപ്പിച്ച് പേരു നേടിയ വ്യക്തിയാണ് ആഡം ഡാനിയേല് എന്ന ചെറുപ്പക്കാരന്. എന്നാല് ഇപ്പോള് ആഡത്തിന്റെ പ്രശസ്തി മറ്റൊരു കാര്യത്തിലാണ്. മഡോണയുടെ അപരന് എന്ന നിലയിലാണ് ഇപ്പോള് ആഡം അറിയപ്പെടുന്നത്. പതിനഞ്ചാം വയസ്സിലാണ് ആഡം ആദ്യമായി മഡോണയുടെ ഒരു ആല്ബം ഗാനം കാണുന്നത്. ആ കാലങ്ങളിലെല്ലാം പുരുഷ ശരീരത്തിനുള്ളില് ഒരു സ്ത്രീ മനസ്സുമായി ബുദ്ധിമുട്ടി ജീവിയ്ക്കുകയായിരുന്നത്രേ ആഡം ഡാനിയേല്. മഡോണയെ കണ്ടതിനുശേഷം താന് ആരെപ്പോലെയായിത്തീരണം എന്ന കാര്യത്തില് ആഡത്തിന് സംശയമുണ്ടായിരുന്നില്ലത്രേ.
അന്നു മുതല് മഡോണ ആഡത്തിനെ ബാധിച്ചുവെന്ന് പറഞ്ഞാല് മതിയല്ലോ. ആഡത്തിന്റെ വീട്ടില് മഡോണയുടെ പാട്ടുകള് നിലയ്ക്കാതെ മുഴങ്ങി കൊണ്ടിരുന്നു. പാട്ടിനിടയില് മഡോണ ചെയ്യുന്നതും പറയുന്നതുമെല്ലാം തന്നോടാണെന്ന് ആഡത്തിന് തോന്നിത്തുടങ്ങി. പിന്നെ കാഴ്ചയിലും മഡോണയെപ്പോലെയാകാന് ആഡം ശ്രമങ്ങള് നടത്തിത്തുടങ്ങിയപ്പോള് വീട്ടില് നിന്നും അമ്മയുടെ എതിര്പ്പ് നേരിടേണ്ടി വന്നു. സുഹൃത്തുക്കളും ബന്ധുക്കളുമൊക്കെ അകല്ച്ച പാലിക്കാന് തുടങ്ങിയെങ്കിലും അതൊന്നും ആഡത്തിന്റെ തീരുമാനത്തെ സ്വാധീനിച്ചില്ല. മുപ്പത്തിമൂന്നു വയസ്സെത്തുന്നതിനിടയില് അയാള് ഉണ്ടാക്കിയ കാശെല്ലാം എത്ര ശസ്ത്രക്രിയകള്ക്കാണ് ചെലവാക്കിയതെന്ന് ആഡത്തിന് തന്നെ നിശ്ചയമില്ല.
മഡോണയുടെ കവിളുകള് പോലുള്ള കവിളുകള് ആകുവാന് ഇംപ്ലാന്റുകള് വയ്ചു. താടിയെല്ലുകള് , താടി എന്നിവയെല്ലാം ശസ്ത്രക്രിയ ചെയ്തു മാറ്റി. പുരികങ്ങള്ക്കു മാറ്റം വരുത്താന് ബ്രോലിഫ്റ്റ്, ഫില്ലറുകള്. കാഴ്ചയില് മഡോണയെ പോലെയായി തീര്ന്നപ്പോള് പോക്കറ്റില് നിന്നും പോയത് 47 ലക്ഷത്തോളം രൂപ. പക്ഷെ ഒരു സങ്കടവുമില്ല ആഡത്തിന്. കാശു വരും , പോകും, ജീവിതം ഒന്നേയുള്ളൂ. അത് ആഗ്രഹിക്കുന്നതു പോലെ ജീവിച്ചു തീര്ക്കുന്നതിലാണ് സന്തോഷമെന്നും , ആ സന്തോഷം തനിക്കു ലഭിക്കുന്നുണ്ടെന്നും ആഡം പറയുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha