കനത്ത മഴയില്‍ പരസ്യബോര്‍ഡ് തകര്‍ന്നുവീണ് മരിച്ചവരുടെ എണ്ണം എട്ടായി. ഛെദ്ദ നഗര്‍ ജിം ഖാനയ്ക്ക് സമീപത്തെ പെട്രോള്‍ പമ്പിന് സമീപമാണ് അപകടമുണ്ടായത്. വൈകുന്നേരം 4.30ന് സംഭവം നടക്കുമ്പോള്‍ നൂറുകണക്കിന് പേര്‍ ചുവട്ടിലുണ്ടായിരുന്നു. 57 പേരെ രക്ഷപ്പെടുത്തി ഉടന്‍തന്നെ തൊട്ടടുത്തുള്ള രാജ്വാടി ആശുപത്രിയില്‍ ചികിത്സയ്ക്കായി പ്രവേശിപ്പിച്ചെന്ന് മഹാരാഷ്ട്ര മുഖ്യമന്ത്രി ഏക്നാഥ് ഷിന്‍ഡെ അറിയിച്ചു. 100അടി പൊക്കമുള്ള പരസ്യബോര്‍ഡ് ഹോര്‍ഡിംഗാണ് കനത്ത മഴയിലും കാറ്റിലും നിലംപതിച്ചത്. രക്ഷാപ്രവര്‍ത്തകര്‍ക്കൊപ്പം എന്‍ഡിആര്‍എഫ് സംഘവും ചേര്‍ന്നതായി ബ്രിഹന്‍ മുംബയ് മുനിസിപ്പല്‍ കോര്‍പ്പറേഷന്‍ കമ്മിഷണര്‍ ഭൂഷണ്‍ ഗഗ്രാറി പറഞ്ഞു. പരസ്യ ബോര്‍ഡ് സ്ഥാപിക്കാന്‍ അനുമതി നല്‍കിയിരുന്നില്ലെന്നും അദ്ദേഹം അറിയിച്ചു.

മുംബയോട് ചേര്‍ന്ന നഗരങ്ങളായ താനെ, അംബെര്‍നാഥ്, ബദ്‌ലാപൂര്‍, കല്യാണ്‍, ഉല്ലാസ് നഗര്‍ എന്നിവിടങ്ങളിലും കാറ്റും ഭേദപ്പെട്ട മഴയും ലഭിച്ചു. കാര്‍ പാര്‍ക്കിംഗ് സ്ഥലത്തെ ലിഫ്റ്റ് തകര്‍ന്നുവീണ് നിരവധി പേര്‍ക്ക് പരിക്കേറ്റു. വഡാലയിലാണ് സംഭവം. ഇവിടെ അഗ്‌നിരക്ഷാ സേന രക്ഷാപ്രവര്‍ത്തനത്തിന് എത്തിയിട്ടുണ്ട്. വിമാന, ട്രെയിന്‍ ഗതാഗതവും മുംബയില്‍ മഴയും മോശം കാലാവസ്ഥയും കാരണം തടസപ്പെട്ടു. കാഴ്ചാപരിധി മോശമായതിനെത്തുടര്‍ന്ന് മുംബയിലേക്ക് വന്ന നിരവധി വിമാനങ്ങള്‍ വഴിമാറ്റിവിട്ടു, 75 കിലോമീറ്റര്‍ വരെ വേഗത്തില്‍ മഴയെ തുടര്‍ന്ന് കാറ്റ് വീശിയതോടെയാണിത്. റെയില്‍വെ ഇലക്ട്രിക് ലൈനിന് മുകളിലേക്ക് മരങ്ങള്‍ കടപുഴകി വീണതോടെയാണ് താനെമുലന്ദ് റെയില്‍ സര്‍വീസ് മുടങ്ങിയത്. താനെയില്‍ വെള്ളം കയറുന്ന അവസ്ഥയുമുണ്ടായി. പരസ്യ ബാനറുകള്‍ ലൈനില്‍ വീണ് അപകടമുണ്ടായതിനെത്തുടര്‍ന്ന് മെട്രോ ഗതാഗതവും തടസപ്പെട്ടതായി മെട്രോ റെയില്‍ വക്താക്കള്‍ അറിയിച്ചു.