അമ്മയും എട്ട് സഹോദരങ്ങളുമടങ്ങുന്ന കുടുംബത്തെ സഹായിക്കാനായി ഒമ്പതാമത്തെ വയസ് മുതലാണ് കിം ഫാരി കടകളില്‍ നിന്നും സാധനങ്ങള്‍ മോഷ്ടിച്ചു തുടങ്ങിയത്. പതിനാറാം വയസിലാണ് മോഷണം ഒരു തൊഴിലായി സ്വീകരിച്ചത്. തന്റെ 44 വര്‍ഷം നീണ്ടു നിന്ന തസ്‌കര കരിയറിനിടയില്‍ 19 കോടി രൂപയിലധികം വിലവരുന്ന വസ്തുക്കള്‍ താന്‍ അടിച്ചുമാറ്റിയിട്ടുണ്ടെന്നാണ് ഇവര്‍ പറയുന്നത്. തന്റെ കഠിനാദ്ധ്വാനത്തില്‍ വളരെ സന്തോഷമുണ്ടെന്ന് വ്യക്തമാക്കിയ ഇവര്‍ പ്രതിവര്‍ഷം കടകളില്‍ മോഷണം നടത്തി 47 ലക്ഷത്തിലധികം രൂപയുടെ സാധനങ്ങള്‍ നേടാറുണ്ടെന്ന് പറഞ്ഞു.
വളരെ ആഡംബരപൂര്‍ണമായ ജീവിതമാണ് ഫാരി നയിക്കുന്നത്. ഡിസൈനര്‍ വസ്ത്രങ്ങള്‍ ധരിക്കുകയും മോഷ്ടിച്ച പണം ഉപയോഗിച്ച് പ്ലാസ്റ്റിക് സര്‍ജറി നടത്തുകയും വിവിധ വിദേശ രാജ്യങ്ങളില്‍ സന്ദര്‍ശനം നടത്തുകയും ചെയ്യുന്നത് ഇവരുടെ സ്ഥിരം പരിപാടിയായിരുന്നു. മോഷണത്തിന് ഏഴ് തവണയോളം ഇവരെ ജയിലില്‍ അടച്ചിട്ടുണ്ട്. അമ്പതിലധികം മോഷണക്കുറ്റങ്ങളാണ് ഇവരുടെ പേരിലുള്ളത്. സൂപ്പര്‍മാര്‍ക്കറ്റുകളില്‍ നിന്നും ആഴ്ച അടിസ്ഥാനത്തിലാണ് താന്‍ ഭക്ഷണ സാധനങ്ങളും കളിപ്പാട്ടങ്ങളും മറ്റും മോഷ്ടിക്കുന്നതെന്നാണ് ആറ് മക്കളുടെ അമ്മയായ ഇവര്‍ പറഞ്ഞത്. 12 വയസ് പൂര്‍ത്തിയായപ്പോള്‍ മൂത്ത മൂന്ന് കുട്ടികളേയും ഇവര്‍ മോഷണം നടത്താന്‍ പഠിപ്പിച്ചിട്ടുണ്ട്. ഭര്‍ത്താവുമായി പിരിഞ്ഞു നില്‍ക്കുന്ന ഇവര്‍ ഇപ്പോള്‍ പതിനാലുകാരിയായ മകളോടൊപ്പമാണ് താമസിക്കുന്നത്.
സാധാരണക്കാര്‍ക്ക് സ്വപ്നത്തില്‍ പോലും ചിന്തിക്കാനാകാത്ത സൗകര്യങ്ങളാണ് തനിക്കുള്ളതെന്നും അതിനാല്‍ തന്നെ ചെയ്യുന്ന തൊഴിലില്‍ അല്‍പ്പം പോലും കുറ്റബോധം തോന്നിയിട്ടില്ലെന്നും ഫാരി വ്യക്തമാക്കി. എന്നാല്‍ തന്റെ മകള്‍ക്ക് വേണ്ടി മോഷണം നിര്‍ത്താന്‍ തയ്യാറാണെന്ന് അവര്‍ മാദ്ധ്യമങ്ങള്‍ക്ക് നല്‍കിയ അഭിമുഖത്തില്‍ പറഞ്ഞു. താന്‍ ചെയ്യുന്ന പ്രവര്‍ത്തികള്‍ക്ക് തന്റെ മകള്‍ ശിക്ഷിക്കപ്പെടാനോ അവളെ തനിക്ക് നഷ്ടപ്പെടാനോ പാടില്ല. എന്നാല്‍ തനിക്ക് മറ്റൊരു ജോലിയും ലഭിക്കാത്തതിനാല്‍ മോഷണം നിര്‍ത്താനാകുന്നില്ലെന്നും മറ്റെന്തെങ്കിലും നല്ല ജോലി കിട്ടിയാല്‍ അതോടെ മോഷണം നിര്‍ത്തുമെന്നും ഇവര്‍ വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha