ഐടി കമ്പനിയില്‍ ഇന്റര്‍വ്യൂന് പോയ 23കാരി ജിസില്‍ മാത്യു ഒരു വേദനയായി അവശേഷിക്കുന്നു. കാണാതായിട്ട് ഒരാഴ്ച ആയെങ്കിലും ജിസിലിനെപ്പറ്റി ഒരു വിരവുമില്ല.
കഴിഞ്ഞ അഞ്ചാം തീയതി ജോലിക്കായി കാക്കനാട് പ്രത്യേക സാമ്പത്തിക മേഖലയിലെ ഹൈടെക് ഔട്ട്‌സോഴ്‌സിംഗ് സര്‍വീസസ് കമ്പനിയിലാണ് ജിസില്‍ ഇന്റര്‍വ്യൂവിനു പോയത്. എന്നാല്‍ ദുരൂഹ സാഹചര്യത്തില്‍ കാണാതാവുകയായിരുന്നു. 
ബികോം ബിരുദധാരിയായ ജിസില്‍ മാത്യു ഒന്നര മാസം മുമ്പാണു വിവാഹിതയായത്. ഇന്‍ഫോപാര്‍ക്കില്‍ സോഫ്ട്‌വെയര്‍ എന്‍ജിനിയറാണ് ഭര്‍ത്താവ് ആലക്കോട് സ്വദേശിയായ ജോബിന്‍. തിരുവല്ലയില്‍ ജനിച്ച ജിസില്‍ തമിഴ്‌നാട്ടിലെ ഗൂഡല്ലൂരിലാണു വളര്‍ന്നത്. ബംഗളൂരുവിലെ സ്വകാര്യബാങ്കില്‍ ജോലി ചെയ്യുകയായിരുന്ന ജിസില്‍ വിവാഹത്തിനു ശേഷം ഭര്‍ത്താവിനോടൊപ്പം കൊച്ചിയില്‍ വാഴക്കാലയിലെ ഫ്‌ളാറ്റിലേക്കു താമസം മാറ്റിയതോടെ ഇവിടെ ജോലി തേടുകയായിരുന്നു. ഇതിനിടെയാണ് കാണാതായത്. 
അതേസമയം ജിസിന്‍ ഇന്‍ഫോപാര്‍ക്കിലേയ്ക്ക് പ്രവേശിച്ചിട്ടില്ലെന്ന് ഇന്‍ഫോപാര്‍ക്ക് വൃത്തങ്ങള്‍ വ്യക്തമാക്കി. പോലീസ് അന്വേഷണത്തിലും ജിസില്‍ ഇന്‍ഫോപാര്‍ക്കില്‍ പ്രവേശിക്കുകയോ ഇന്റര്‍വ്യൂവില്‍ പങ്കെടുക്കുകയോ ചെയ്തതായി അറിവില്ല. ജിസിലിനെ കാണാതായെന്നു പറയുന്ന മാര്‍ച്ച് അഞ്ചിന് അത്തരമൊരു അഭിമുഖത്തില്‍ അവര്‍ പങ്കെടുത്തിട്ടില്ലെന്ന് ഇന്‍ര്‍വ്യൂവിന് ക്ഷണിച്ച ഹൈടെക് ഔട്ട്‌സോഴ്‌സിംഗ് സര്‍വീസസ് എന്ന കമ്പനിയും വ്യക്തമാക്കി.
ഹൈടെക് കമ്പനിയില്‍ ജോലിക്ക് അപേക്ഷിച്ചിരുന്ന ജിസിലിനെ രാവിലെ 9.15 ഓടെ ഇന്റര്‍വ്യൂ നടക്കുന്ന സെസിലെ കമ്പനിയുടെ മുമ്പില്‍ ഭര്‍ത്താവ് ജോബിന്‍ വാഹനത്തില്‍ കൊണ്ടു ചെന്നിറക്കിയെന്നാണ് പോലീസ് അന്വേഷണത്തില്‍ വ്യക്തമായത്. എന്നാല്‍ പ്രസ്തുത കമ്പനിയിയുടെ പ്രവേശന പാസ് ഇല്ലാത്തതിനാല്‍ ജിസിലിന് അകത്തേക്ക് സെക്യൂരിറ്റി ജീവനക്കാരന്‍ കടത്തി വിട്ടില്ല. മറ്റു ജോലികളുള്ളതിനാല്‍ ജോബിന്‍ പോകുകയും ചെയ്തു. പത്തു മണിക്കുള്ള ഇന്റര്‍വ്യൂവില്‍ പങ്കെടുക്കാന്‍ ജിസില്‍ അവിടെത്തന്നെ കാത്തു നില്‍ക്കുകയും ചെയ്തു.
എന്നാല്‍ ജിസില്‍ അകത്തു പ്രവേശിക്കാന്‍ പാസിന് അപേക്ഷിക്കുകയോ ഇന്റര്‍വ്യൂവിന് പങ്കെടുക്കുകയോ ചെയ്തിട്ടില്ലെന്ന് കമ്പനി വ്യക്തമാക്കുന്നു. വിസിറ്റേഴ്‌സ് ലിസ്റ്റിലും ജിസിലിന്റെ പേരില്ലെന്നാണ് വിവരം. 10.45ന് ജോബിന്‍ മൊബൈല്‍ ഫോണില്‍ ബന്ധപ്പെടാന്‍ ശ്രമിച്ചപ്പോള്‍ സ്വിച്ച് ഓഫ് ചെയ്തിരിക്കുകയായിരുന്നു. നിരവധി തവണ വിളിച്ചെങ്കിലും ഫോണ്‍ സ്വിച്ച് ഓഫായിരുന്നു.
ഇതിനിടെ, ജോബിന്‍ ജിസിലിന്റെ ബന്ധുക്കളെയും സുഹൃത്തുക്കളെയും മറ്റും വിളിച്ചു നോക്കിയെങ്കിലും അവരെയൊന്നും ജിസില്‍ അടുത്ത ദിവസങ്ങളില്‍ ബന്ധപ്പെട്ടിട്ടില്ലെന്നു വിവരം ലഭിച്ചു. തുടര്‍ന്നു ബന്ധുക്കള്‍ തൃക്കാക്കര സ്‌റ്റേഷനില്‍ പരാതി നല്‍കുകയായിരുന്നു. 
എന്നാല്‍ അന്വേഷണ സംഘത്തിന് ഇതുവരെ യാതൊരു പുരോഗതിയും കൈവരിക്കാന്‍ സാധിച്ചിട്ടില്ല. കാണാതായ ദിവസം ഉച്ചയ്ക്കു പാലക്കാട് ജില്ലയില്‍ വച്ചു ജിസില്‍ മൊബൈല്‍ ഫോണ്‍ ഉപയോഗിച്ചിരുന്നതായി മൊബൈല്‍ ടവര്‍ കേന്ദ്രീകരിച്ചു നടത്തിയ അന്വേഷണത്തില്‍ സൈബര്‍ സെല്ലിനു വിവരം ലഭിച്ചിട്ടുണ്ട്. പാലക്കാട് നിന്നും ചെന്നൈയിലേക്കോ ബംഗല്‍രുവിലേക്കോ ജിസില്‍ പോയിരിക്കാമെന്നും കരുതുന്നുണ്ട്. 
അതേസമയം കാണാതായ യുവതിയെ കണ്ടെത്താന്‍ സോഷ്യല്‍ മീഡിയയിലും അന്വേഷണം പുരോഗമിക്കുന്നുണ്ട്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha