ഇനിയാവര്ത്തിക്കരുത്... യതീഷ് ചന്ദ്രയ്ക്ക് ഡിജിപിയുടെ താക്കീത്; നടപടിയ്ക്കെതിരെ ജനരോഷം അലയടിക്കുന്നു
സമരക്കാരെ ധീരമായി നേരിട്ട എറണാകുളം റൂറല് എസ്.പി യതീഷ് ചന്ദ്രയ്ക്ക് ഡി.ജി.പിയുടെ താക്കീത്. ഹര്ത്താല് ദിനത്തില് ഉണ്ടായ ലാത്തിച്ചാര്ജില് എസ്.പി യതീഷ് ചന്ദ്ര നിലവിട്ട് പെരുമാറിയെന്ന പരാതികളെ തുടര്ന്നാണ് ഡി.ജി.പി കെ.എസ്. ബാലസുബ്രഹ്മണ്യം ഇടപെട്ടത്. യതീഷ് ചന്ദ്രയെ പോലീസ് ആസ്ഥാനത്ത് വിളിച്ചു വരുത്തുകയായിരുന്നു.
സംഘര്ഷമുണ്ടായാല് നിയന്ത്രിക്കുക എന്നതിനപ്പുറം പൊലീസുകാര് വികാരത്തിന് അടിമപ്പെടരുത്. സമരക്കാരെയും സാധാരണക്കാരെയും വേര്തിരിച്ച് കാണാന് ലാത്തിച്ചാര്ജ് പോലെയുള്ള നടപടികള്ക്ക് നേതൃത്വം നല്കുമ്പോള് സംയമനം പാലിക്കാന് എസ്.പിക്ക് കഴിയണമെന്നും ഡിജിപി ഓര്മ്മിപ്പിച്ചു.
ഈ യുവ ഓഫീസറെ ഡിജിപി താക്കീത് ചെയ്യാന് പാടില്ലായിരുന്നുവെന്നാണ് വലിയൊരു വിഭാഗം പോലീസ് ഉദ്യോഗസ്ഥരുടേയും അഭിപ്രായം. ഇത് സത്യസന്ധരായി പ്രവര്ത്തിക്കുന്ന ഉദ്യോഗസ്ഥരുടെ മനോവീര്യം തകര്ക്കുമെന്നാണ് ഇവരുടെ വിലയിരുത്തല്.
കേരളത്തില് യുവ ഐപിഎസ് ഓഫീസറുടെ ധീരത പരക്കെ അംഗീകരിച്ചതാണ്. ഇവര്ക്കായി ആരാധകര് ഫേസ്ബുക്ക് പേജുപോലും ഉണ്ടാക്കി. അതിനെല്ലാം വന് സ്വീകരണമാണ് ജനങ്ങള് നല്കിയത്.
യതീഷ് ചന്ദ്രയ്ക്കെതിരെ നടപടി വേണമെന്നുറച്ച് എല്ഡിഎഫ് നടത്തിയ സമരമാണ് ഈ നടപടിയിലെത്തിച്ചത്. പ്രതിപക്ഷ പ്രതിഷേധത്തിനിടെ എസ്പിക്കെതിരെ നടപടി എടുക്കാനുള്ള ഗൂഢാലോചനകള് അണിയറയില് നടന്നിരുന്നു. എന്നാല് ജനപിന്തുണ എതിരാണെന്ന് കണ്ട് മാത്രമാണ് യതീഷ് ചന്ദ്രക്കെതിരെ നടപടിയെടുക്കാത്തത്. അതേസമയം സിപിഎമ്മിനെ പിണക്കാതിരിക്കാന് കൂടിയാണ് ഈ താക്കീത്.
ഇക്കഴിഞ്ഞ ഹര്ത്താല് ദിനത്തില് അങ്കമാലിയില് നടന്ന സംഘര്ഷത്തില് യതീഷ് ചന്ദ്ര നേരിട്ടിറങ്ങിയാണ് അക്രമികളെ തുരത്തിയത്. മാത്രമല്ല സിപിഎമ്മിന്റെ ഏരിയ കമ്മറ്റി ഓഫീസ് വളയുകയും ഏരിയ സെക്രട്ടറിയെ കസ്റ്റഡിയില് എടുക്കുകയും ചെയ്തിരുന്നു. യതീഷ് ചന്ദ്രയെ ഇങ്ങനെ വിട്ടാല് സിപിഎമ്മിന് ഒരു സമാധാനവും കിട്ടില്ലെന്നാണ് സഖാക്കളുടെ പക്ഷം. ഇക്കാര്യത്തില് പ്രതിപക്ഷ നേതാവ് വിഎസ് അച്യുതാനന്ദന് പോലും എസ്പിക്കെതിരെ പ്രതികരിച്ചിരുന്നു. അടുത്ത ദിവസം നടന്ന ധര്ണയില് പങ്കെടുത്തത് പോളിറ്റ് ബ്യൂറോ അംഗം എംഎ ബേബിയാണ്.
സിപിഎമ്മിന്റെ ഈ ഉന്നത നേതാക്കളുടെ ഇടപെടലാണ് എസ്പിക്കെതിരെയുള്ള നടപടിയിലേക്ക് നീങ്ങിയത്. എന്നാല് ധീരനായ ഒരു പോലീസ് ഓഫീസര്ക്കെതിരെ നടപടി വന്നാല് അത് ജനരോഷമുണ്ടാക്കുമെന്ന് സര്ക്കാരും ഭയന്നിരുന്നു. ജനങ്ങളുടെ വഴി തടഞ്ഞവരേയാണ് യതീഷ് ചന്ദ്ര നേരിട്ടെത്തി ഓടിച്ചത്. അതില് രാഷ്ട്രീയമില്ലെന്ന് യതീഷ് ചന്ദ്ര തന്നെ വ്യക്തമാക്കിയിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha