കോവിഡ് കാലത്ത് ഡോക്ടര്‍മാരുടെ മാതൃകാവിവാഹം
കോഴിക്കോട് മെഡിക്കല്‍ കോളജ് സര്‍ജറി വിഭാഗത്തിലെ ഡോ. വൈശാഖ് മോഹനും കെഎംസിടി മെഡിക്കല്‍ കോളജ് ആശുപത്രിയിലെ പീഡിയാട്രിക്‌സ് വിഭാഗം പിജിയിലെ ഡോ. കാവ്യമേനോനും തമ്മില്‍ ഇന്നലെ നടന്ന വിവാഹം കൗതുകമുയര്‍ത്തി. ആയിരത്തോളം പേരാണ് ഓണ്‍ലൈനായി ആ വിവാഹത്തില്‍ പങ്കെടുത്തത്.
കോഴിക്കോട് മെഡിക്കല്‍ കോളജില്‍ വൈശാഖിന്റെ ജൂനിയറായിരുന്നു കാവ്യ. പഠനകാലത്ത് മൊട്ടിട്ട പ്രണയമാണ് 2019 ജൂലൈയില്‍ വിവാഹ നിശ്ചയത്തിലെത്തിയത്. പാലക്കാട് എടയാര്‍ സ്ട്രീറ്റ് മാങ്കാവ് സരസ്വതി നിവാസില്‍ ആര്‍. മോഹന്‍ദാസിന്റെയും പ്രേമലതയുടെയും മകനാണ് വൈശാഖ്. തൃപ്പൂണിത്തുറ സ്വദേശിയായ മനോജ് മേനോന്റെയും ജലജ മനോജിന്റെയും മകളാണ് കാവ്യ. കാവ്യയുടെ മാതാപിതാക്കള്‍ വിദേശത്താണ്.
ഏപ്രിലില്‍ വിവാഹം നടത്താന്‍ തീരുമാനിച്ചിരിക്കവേയാണ് അപ്രതീക്ഷിതമായി ലോക്ഡൗണ്‍ വിലങ്ങുതടിയായത്. ഇതിനകം ആയിരത്തോളം പേരെ വിവാഹത്തിനു ക്ഷണിക്കുകയും ചെയ്തിരുന്നു.
കോവിഡ് ഭീതി പരന്നപ്പോള്‍ത്തന്നെ രണ്ടു ഡോക്ടര്‍മാരും സാഹചര്യത്തിന്റെ ഗൗരവം തിരിച്ചറിഞ്ഞിരുന്നു. ഓണക്കാലത്തേക്ക് വിവാഹം നീട്ടിവയ്ക്കാമെന്ന് നിര്‍ദേശം വന്നുവെങ്കിലും മഴക്കാലത്തെക്കുറിച്ച് ഒരുറപ്പും ഇല്ലാത്തതിനാല്‍ കലക്ടറുടെ അനുമതിയോടെ ഇരുവരുടെയും ബന്ധുക്കള്‍ മാത്രം പങ്കെടുക്കുന്ന വിവാഹച്ചടങ്ങ് നടത്താന്‍ തീരുമാനിക്കുകയായിരുന്നു.
https://www.facebook.com/Malayalivartha
