ക്യാമറയും തോക്കും തമ്മിലുള്ള വ്യത്യാസം തിരിച്ചറിയാനുള്ള പ്രായമായിട്ടില്ല ഈ സിറിയന്‍ ബാലികക്ക്. അതുകൊണ്ടാണ് തന്റെ ചിത്രമെടുക്കാന്‍ ഫോട്ടോഗ്രാഫര്‍ ക്യാമറയെടുത്തപ്പോള്‍ ആയുധമാണെന്ന് കരുതി കുഞ്ഞിക്കൈകള്‍ ഉയര്‍ത്തി അവള്‍ വേഗം കീഴടങ്ങിയത്. ഗാസ സ്വദേശിയായ ഫോട്ടോജേര്‍ണലിസ്റ്റ് നാദിയ അബു ഷബാനാണ് ക്യാമറയ്ക്കു മുമ്പില്‍ കീഴടങ്ങിയ ബാലികയുടെ
ചിത്രം ട്വീറ്റ് ചെയ്തത്
2011 മാര്‍ച്ച് 15 മുതല്‍ സിറിയയില്‍ ആരംഭിച്ച ആഭ്യന്തരയുദ്ധം ഇപ്പോഴും തുടര്‍ന്നുകൊണ്ടിരിക്കുകയാണ്. യുദ്ധവും ആയുധങ്ങളും കണ്ടു വളരുന്ന കുട്ടികളുടെ മനസ്സില്‍ അതേല്‍പ്പിക്കുന്ന മുറിവിന്റെ ആഴം വ്യക്തമാക്കുകയാണ് സിറിയന്‍ ബാലികയുടെ ഈ ചിത്രം. യു.എന്‍ ശിശുക്ഷേമ വകുപ്പിന്റെ കണക്കുകള്‍ പ്രകാരം 14 മില്യണ്‍ കുഞ്ഞുങ്ങളാണ് സിറിയയില്‍ ആഭ്യന്തര യുദ്ധത്തിന്റെ കഷ്ടതകള്‍ പേറുന്നത്. യുദ്ധത്തിനിടയില്‍ ബാല്യത്തിന്റെ വര്‍ണങ്ങളെല്ലാം അവര്‍ക്ക് നഷ്ടമായിരിക്കുന്നു. കൗതുകം വിടരേണ്ട അവരുടെ കണ്ണുകളില്‍ നിറയുന്നത് ഭീതിയും ദൈന്യതയും മാത്രം. അതുകൊണ്ടാണ് ഫോട്ടോയെടുക്കാന്‍ ഫോട്ടോ ജെര്‍ണലിസ്റ്റ് ക്യാമറയെടുത്തപ്പോള്‍ അത് തോക്കാണെന്ന് ആ കുഞ്ഞ് കരുതിയതും തനിക്കാവുന്നത്രയും ഉയരത്തിലേക്ക് കൈകളുയര്‍ത്തി കീഴടങ്ങിയതും.
ഐക്യരാഷ്ട്രസഭയുടെ 2013 വരെയുള്ള കണക്കുകള്‍ പ്രകാരം ആഭ്യന്തരയുദ്ധത്തില്‍ ഏകദേശം 70,000 പേര്‍ കൊല്ലപ്പെട്ടിട്ടുണ്ട്. എന്നാല്‍ വിവിധ മനുഷ്യാവകാശ സംഘടനകള്‍ ഇതുവരെ 2,11,000 ആളുകള്‍ കൊല്ലപ്പെട്ടിട്ടുള്ളതായി പറയുന്നു. അവരില്‍ 18,242 പേര്‍ കുട്ടികളാണ്. മൂന്ന് മില്യണ്‍ ആളുകള്‍ അഭയാര്‍ത്ഥികളാക്കപ്പെട്ടതായും പറയുന്നു.
നാദിയ അബു ഷബാന്‍ മാര്‍ച്ച് 24നാണ് ചിത്രം ട്വീറ്റ് ചെയ്തത്. ആരുടേയും മനസ്സില്‍ നോവുണര്‍ത്തുന്ന ചിത്രം ഇതിനോടകം സോഷ്യല്‍മീഡിയയില്‍ പ്രചരിച്ചു കഴിഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha