മുളങ്കമ്പ് ശ്വാസകോശം തുളച്ചുകയറിയിട്ടും അപാര ചങ്കുറപ്പുമായി അപരീഷ്, പത്ത് ദിവസം കഴിഞ്ഞ് ശസ്ത്രക്രിയയിലൂടെ ജീവിത ത്തിലേക്ക്!
കോഴിക്കോട് വണ്ടൂരിലെ ബേക്കറിയില്‍ സെയില്‍സ്മാനായ മലപ്പുറം കാളികാവ് വീതലശ്ശേരി അപരീഷ് ജോലിയാവശ്യത്തിനായി നിലമ്പൂര്‍- എടക്കര റോഡില്‍ ബൈക്കില്‍ സഞ്ചരിക്കുമ്പോള്‍ റോഡരികില്‍ നിന്ന ഉണങ്ങിയ മുളയുടെ കൂട്ടം ഒടിഞ്ഞു വീണു. ഹെല്‍മറ്റ് ധരിച്ചിരുന്നതിനാല്‍ തലയ്ക്കു കുഴപ്പമുണ്ടായില്ലെങ്കിലും ഒരു മുളയുടെ കമ്പ് ശരീരത്തില്‍ തുളച്ചു കയറി. അപരീഷ് തന്നെ കമ്പ് വലിച്ചൂരി.
ശരീരത്തിനുള്ളില്‍ രക്തസ്രാവം ഉണ്ടായതിനാല്‍ ആദ്യം എത്തിച്ച ആശുപത്രിയില്‍ നടത്തിയ സ്‌കാനിങ്ങില്‍ ഒന്നും വ്യക്തമായില്ല. രണ്ടാമത് സ്‌കാന്‍ ചെയ്തു. അപ്പോഴാണ് ശ്വാസകോശവും തുളച്ച് കയറി ഹൃദയത്തിന്റെ പിന്‍ഭാഗത്ത് ഒരു മുളങ്കഷണം എത്തിനില്‍ക്കുന്നത് കണ്ടത്. ഉടന്‍ ഡോക്ടര്‍മാര്‍ ചെസ്റ്റ് ആശുപത്രിയിലേക്കു റഫര്‍ ചെയ്യുകയായിരുന്നു.
ശ്വാസകോശത്തില്‍ തുളച്ചുകയറിയ മുളയുടെ കഷ്ണങ്ങളുമായി 10 ദിവസം കഴിഞ്ഞതിനു ശേഷം കോഴിക്കോട് ചെസ്റ്റ് ആശുപത്രിയില്‍ ഡോ.നാസര്‍ യൂസുഫ് ശസ്ത്രക്രിയയിലൂടെ തുളച്ചുകയറിയ മുളയുടെ കഷ്ണങ്ങള്‍ നീക്കം ചെയ്തു. ഈ മാസം 17-ാം തീയതി ഉച്ചയ്ക്കായിരുന്നു ശസ്ത്രക്രിയ.
അപരീഷിന്റെ (34) ആത്മവിശ്വാസത്തിന്റെയും ധൈര്യത്തിന്റെയും കരുത്തിലാണ് സങ്കീര്‍ണമായ ശസ്ത്രക്രിയ വിജയകരമായി പൂര്‍ത്തിയാക്കാന്‍ കഴിഞ്ഞതെന്ന് ഡോ.നാസര്‍ യൂസുഫ് പറഞ്ഞു. രണ്ടു ദിവസം ഐസിയുവില്‍ കഴിഞ്ഞ ശേഷം അപരീഷിനെ ഇന്നലെ വാര്‍ഡിലേക്ക് മാറ്റി.
https://www.facebook.com/Malayalivartha
