ഒ.രാജഗോപാല്‍ ആര്‍ക്കൊപ്പം? കേന്ദ്രസര്‍ക്കാരിനെതിരായ പ്രമേയത്തെ അനുകൂലിക്കുകയോ എതിര്‍ക്കുകയോ ചെയ്തില്ല; സംസ്ഥാന ബി.ജെ.പി നേതൃത്വത്തിന് വീണ്ടും തലവേദന; അവിശ്വാസ പ്രമേയത്തിലും നിലപാട് ഇതുതന്നെ
കേരളത്തിലെ ഒരെ ഒരു ബി.ജെ.പി എം.എല്‍.എ ആണ് ഒ. രാജഗോപാല്‍. അതും ബി.ജെ.പിയുടെ വര്‍ഷങ്ങള്‍ നീണ്ട കാത്തിരിപ്പിന് ശേഷമാണ് കഴിഞ്ഞ നിയമസഭാ തെരഞ്ഞെടുപ്പില്‍ രാജഗോപാലിലൂടെ കേരളത്തില്‍ ബി.ജെ.പി അക്കൗണ്ട് തുറന്നത്. എന്നാല്‍ മുതിര്‍ന്ന ഈ നേതാവിന്റെ നിലപാടുകള്‍ പിന്നീട് ബി.ജെ.പിയുടെ സംസ്ഥാന നേതൃത്വത്തിനും എന്തിനേറെ പറയുന്ന ദേശീയ നേതൃത്വത്തിനു പോലും തലവേദനയാകുകയാണ്. മുമ്പ് പൗരത്വ നിയമ ഭേദഗതിക്കെതിരെ സംസ്ഥാന നിയമസഭ പ്രമേയം പാസാക്കിയപ്പോള്‍ സഭയിലെ ഏക ബിജെപി എംഎല്‍എയായ രാജഗോപാല്‍ എതിര്‍ത്ത് വോട്ടു ചെയ്യാത്തത് വിവാദമായിരുന്നു. ഒ. രാജഗോപാലിന്റെ നിലപാട് സംസ്ഥാന ബി.ജെ.പി നേതൃത്വത്തിന്റെ നിലപാടില്‍ നിന്നും വ്യത്യസ്തമായിരുന്നു. ശബരിമലയില്‍ സ്ത്രീകളെ പ്രവേശിക്കുന്ന വിഷയത്തില്‍ പോലും അനുകൂല നിലപാട് ഒരിക്കല്‍ ഒ.രാജഗോപാല്‍ സ്വീകരിച്ചിരുന്നു. ഇത് സി.പി.എമ്മും കോണ്‍ഗ്രസും ആയുധമാക്കുകയും ചെയ്തു. ഇതാ ഇപ്പോള്‍ തിരുവനന്തപുരം വിമാനത്താവളം സ്വകാര്യ വത്കരിക്കുന്ന പ്രമേയം ഒ. രാജഗോപാലിന്റെ നിലപാട് ബി.ജെ.പി നേതൃത്വത്തിന് തലവേദനയാകുകയാണ്.
തിരുവനന്തപുരം വിമാനത്താവളം അദാനിക്ക് കൈമാറാനുള്ള തീരുമാനത്തിനെതിരെ നിയമസഭാ ഐകകണ്‌ഠ്യേനയാണ് പ്രമേയം പാസാക്കിയത്. അദാനിയുമായി ബന്ധമുള്ള കമ്പനിക്ക് തന്നെ ടെണ്ടര്‍ നടപടികളുടെ കണ്‍സെള്‍ട്ടന്‍സിയായി നിയമിച്ചതില്‍ പ്രതിപക്ഷത്തിന് എതിര്‍ അഭിപ്രായമുണ്ടായിരുന്നുവെങ്കിലും വിമാനത്താവളം അദാനിക്കു നല്‍കുന്നതില്‍ സര്‍ക്കാരിനൊപ്പമാണ് പ്രതിപക്ഷം നിന്നത്. എന്നാല്‍ ബി.ജെ.പി സര്‍ക്കാരിനെതിരായ പ്രമേയത്തെ അനുകൂലിക്കാനോ എതിക്കാനോ ഒ. രാജഗോപാല്‍ തയ്യാറായില്ല. വിമാനത്താവളത്തിന്റെ സ്വകാര്യവല്‍ക്കരണത്തിന് അനുകൂലമാണ് ബിജെപി സംസ്ഥാന ഘടകം. അക്കാരണത്താല്‍ രാജഗോപാല്‍ സംസ്ഥാന സര്‍ക്കാരിന്റെ പ്രമേയത്തെ എതിര്‍ക്കേണ്ടതാണ്. രാജഗോപാല്‍ എതിര്‍ക്കാത്തതിനാല്‍, ഐകകണ്‌ഠ്യേന പാസായെന്ന നിലയിലാകും പ്രമേയം രാഷ്ട്രപതിയുടെ മുന്നിലെത്തുക.
എന്നാല്‍ രാജഗോപാല്‍ എതിര്‍സ്വരം ഉയര്‍ത്തിയെന്നാണ് ബി.ജെ.പി നേതൃത്വം വാദിക്കുന്നത്. ഇത് ഉന്നയിച്ച് സഭക്ക് പുറത്ത് അവര്‍ പ്രതിഷേധവും നടത്തി. എന്നിരുന്നാലും രാജഗോപാലിന്റെ നടപടിയെ വെള്ളപുശാന്‍ അവര്‍ക്ക് സാധിക്കുകയില്ല. ഇത്തരം സമര പരിപാടികളിലൂടെ പ്രമേയത്തെ രാജഗോപാല്‍ എതിര്‍ത്തുവെന്ന് വരുത്തനാണ് ബി.ജെ.പി ശ്രമിക്കുന്നത്. അല്ലെങ്കില്‍ സംസ്ഥാന നേതൃത്വത്തിനെതിരെയും ചോദ്യം ഉയരും. അതെ സമയം പ്രതിപക്ഷം എല്‍.ഡി.എഫ് സര്‍ക്കാരിനെതിരെ കൊണ്ടു വന്ന അവിശ്വാസ പ്രമേയത്തെ അനുകൂലിക്കുകയോ പ്രതികൂലിക്കുകയോ ചെയ്യുന്നില്ലെന്ന് ബിജെപി എംഎല്‍എ ഒ.രാജഗോപാല്‍ വ്യക്തമാക്കി. ഭരണപക്ഷവും പ്രതിപക്ഷവും ഒരുമിച്ചുനിന്ന് ജനങ്ങള്‍ക്കായുള്ള പ്രവര്‍ത്തനങ്ങള്‍ ശക്തിപ്പെടുത്തണം. യുവാക്കള്‍ക്ക് തൊഴിലില്ല. കേരളത്തില്‍ കൂടുതല്‍ വ്യവസായം വരണമെന്നും രാജഗോപാല്‍ പറഞ്ഞു. ഇത് എല്‍.ഡി.എഫിനെ പിന്തുണക്കുന്നതിന് തുല്യമാണെന്നാണ് വിമര്‍ശനം ഉയരുന്നത്. കേന്ദ്ര എജന്‍സികള്‍ മുഖ്യമന്ത്രിയുടെ ഓഫീസിന് കള്ളക്കടത്ത് കേസില്‍ പങ്കുണ്ടെന്ന് പറയുമ്പോള്‍ അതിന് പിന്തുണക്കുന്നതിന്റെ ഭാഗമായി അവിശ്വാസ പ്രമേയയത്തെ അനുകൂലിക്കേണ്ട ബാധ്യത ബി.ജെ.പി എം.എല്‍.എക്കുണ്ട്. ഇതിലും വ്യത്യസ്തമായ നിലപാടാണ് രാജഗോപാല്‍ സ്വീകരിച്ചത്.
രാജഗോപാലിന്റെ നിയമസഭയിലെ നിലപാടുകള്‍ പാര്‍ട്ടിക്കുള്ളില്‍ നേരത്തെയും വിമര്‍ശനത്തിനിടയാക്കിയിട്ടുണ്ട്. മുമ്പ് പൗരത്വ നിയമ ഭേദഗതിക്കെതിരെ സംസ്ഥാന നിയമസഭ പ്രമേയം പാസാക്കിയപ്പോള്‍ എതിര്‍ത്ത് വോട്ടു ചെയ്യാത്തത് വിവാദമായപ്പോള്‍ അതിനെ ന്യായികരിക്കാന്‍ രാജഗോപാല്‍ പറഞ്ഞത് 139പേരും അനുകൂലിക്കുമ്പോള്‍ ഒരാളുടെ എതിര്‍പ്പിനു പ്രസക്തിയില്ലയെന്നായിരുന്നു. എന്നാല്‍ ബി.ജെ.പി എന്ന പാര്‍ട്ടി തന്നെ എല്‍.ഡി.എഫിനും യു.ഡി.എഫിനും വിരുദ്ധമായിയുള്ളതാണെന്ന സത്യം പലപ്പോഴും ബി.ജെ.പി എം.എല്‍.എ മാറന്നു പോകുന്നു. പൗരത്വ ബില്ല് വിഷയത്തില്‍ എന്ന് കേന്ദ്ര നേതൃത്വത്തിന് വരെ ഒ.രാജഗോപാലിന്റെ നിലപാട് വെല്ലുവിളിയായി. കേന്ദ്രമന്ത്രിയായ വി.മുരളീധരന്‍ ഉള്‍പ്പെടെയുള്ളവര്‍ പരസ്യമായി തന്നെ ബി.ജെ.പി നിലപാട് പിന്നീട് വ്യക്തമാക്കി.
https://www.facebook.com/Malayalivartha
