അജ്ഞാത പ്രാണി കടിച്ച് അപൂര്വരോഗം ബാധിച്ച പെണ്കുട്ടി മരണത്തിന് കീഴടങ്ങി!
അജ്ഞാത പ്രാണി കടിച്ച് അപൂര്വരോഗം ബാധിക്കുകയും ഇരുവൃക്കകളും തകരാറിലാവുകയും ചെയ്ത് ജീവിതം ദുരിതത്തിലായ പത്തനംതിട്ട അടൂര് സ്വദേശി ജെയ്സണ് തോമസിന്റെ മകള് സാന്ദ്ര ആന് ജെയ്സണ് (17) മരണത്തിന് കീഴടങ്ങി. തിരുവല്ല പുഷ്പഗിരി ആശുപത്രിയില് ചികിത്സയിലായിരുന്ന പെണ്കുട്ടി ഹൃദയാഘാതത്തെ തുടര്ന്നായിരുന്നു മരണത്തിന് കീഴടങ്ങിയത്.
2014-ല് അവധിക്കാലത്ത് ഷാര്ജയില് നിന്ന് പത്തനംതിട്ടയിലെ വീട്ടിലേയ്ക്ക് അവധിക്ക് എത്തിയപ്പോഴാണ് സാന്ദ്രയുടെ ജീവിതം മാറ്റിമറിച്ച അഞ്ജാത പ്രാണിയുടെ കടിയേല്ക്കുന്നത്. ചിക്കന് പോക്സിന്റെ രൂപത്തില് ആദ്യം രോഗം ബാധിച്ചു. രോഗം ഭേദമാകാത്തതിനെ തുടര്ന്ന് നടത്തിയ പരിശാധനകളില് ഹെനോക് സ്കോളിന് പര്പുറ എന്ന അപൂര്വ രോഗമാണ് ബാധിച്ചിട്ടുള്ളതെന്ന് കണ്ടെത്തി. പ്രത്യേകയിനം കൊതുകിന്റെ കടിയേറ്റതാണ് ഇതിന് വഴിവച്ചതെന്നാണ് ആരോഗ്യ വിദഗ്ധര് തന്നോട് പറഞ്ഞതെന്നാണ് പിതാവ് ജെയ്സണ് പറയുന്നത്.
ഷാര്ജ അല് ഖാസിമി ആശുപത്രിയിലായിരുന്നു ചികിത്സ തേടിയിരുന്നത്. സാന്ദ്രയ്ക്ക് എണീറ്റ് നില്ക്കാന് പോലും സാധിക്കുമായിരുന്നില്ല. നിത്യേന 11 മണിക്കൂര് ഡയാലിസിസ് നടത്തിയാണ് ജീവന് നിലനിര്ത്തിയിരുന്നത്. ചെറിയ പ്രായമായതിനാല് ഇത്തരം ഡയാലിസിസിനെ ഡോക്ടര്മാര് പിന്തുണച്ചിരുന്നില്ല. എത്രയും പെട്ടെന്ന് വൃക്ക മാറ്റിവച്ചാലേ കുട്ടിയുടെ ജീവന് രക്ഷിക്കാന് സാധിക്കൂ എന്നാണ് ഡോക്ടര്മാരുടെ വിധിയെഴുത്ത്. മാതാവിന്റെ വൃക്ക അനുയോജ്യമാണെങ്കിലും കടുത്ത രക്തസമ്മര്ദമുള്ളതിനാല് മാറ്റിവയ്ക്കല് സാധ്യമല്ലെന്ന് ജെയ്സണ് അറിയിച്ചിരുന്നു.
ഷാര്ജ ഇന്ത്യന് സ്കൂളില് പഠിച്ചിരുന്ന സാന്ദ്ര ഗുരുതര വൃക്ക രോഗം ബാധിച്ച് ചികിത്സയില് കഴിയുന്നതിനിടയിലും പഠനത്തെ കൈവിടാതിരുന്നു. അധികൃതര് അനുവദിച്ച പതിനൊന്നാം ക്ലാസ് വിദ്യാര്ഥിയുടെ സഹായത്തോടെ ഇക്കഴിഞ്ഞ പ്ലസ് ടു പരീക്ഷയെഴുതി 75% മാര്ക്ക് വാങ്ങിയിരുന്നു. തനിക്ക് ക്ലിനിക്കല് സൈക്കോളജിസ്റ്റാകണമെന്നായിരുന്നു കുട്ടിയുടെ ആഗ്രഹം.
യുഎഇയിലെത്തി ദിവസങ്ങള്ക്കകം പാടുകള് വര്ധിക്കുകയും ശരീരം തടിച്ചുവീര്ക്കുകയും ചെയ്തു. രോഗം തലച്ചോറിനെ ബാധിച്ചതോടെ കുറച്ചു നാളുകളില് കണ്ണുകളുടെ കാഴ്ച ശക്തി നഷ്ടമായി. വീണ്ടും ചികിത്സ തേടിയപ്പോള് കുറയുകയും സ്കൂള് പഠനം തുടരുകയും ചെയ്തു. പിന്നീട് നടത്തിയ കിഡ്നി ബയോപ്സിയിലൂടെ വൃക്കകള് 70 ശതമാനം പ്രവര്ത്തന രഹിതമാണെന്ന് തിരിച്ചറിഞ്ഞു.
ലക്ഷത്തില് ഒരാള്ക്ക് സംഭവിക്കുന്ന രോഗമാണ് സാന്ദ്രയെ ബാധിച്ചത്. വൃക്ക മാറ്റിവച്ചാല് മാത്രമേ ജീവന് രക്ഷിക്കാനാകുകയുള്ളൂ എന്ന് ഡോക്ടര്മാര് വിധിയെഴുതിയതിനെ തുടര്ന്ന് കുടുംബം നാട്ടിലേയ്ക്ക് പോയത്. എന്നാല്, ഒ-പോസിറ്റീവ് രക്തഗ്രൂപ്പുള്ളയാളുടെ വൃക്ക മാറ്റിവച്ചാലേ ഈ കൊച്ചുമിടുക്കി ജീവിതത്തിലേയ്ക്ക് തിരിച്ചുവരികയുള്ളൂ എന്നതിനാല് അതിന് തയാറായി ഏതെങ്കിലും മനുഷ്യസ്നേഹി എത്തുമെന്ന പ്രാര്ഥനയോടെയുള്ള കാത്തിരിപ്പിലായിരുന്നു കുടുംബവും കൂട്ടുകാരും.
https://www.facebook.com/Malayalivartha